"އިސްރާއީލް ޕާސްޕޯޓް މަނާކުރަން ސަރުކާރުން ބޭނުމެއް ނުވޭ، ކުރަނީ ލޮނުމަޑު މަސައްކަތެއް"
7 ފެބުރުއަރީ 2025 | ހުކުރު 12:39ދިވެހި ސަރުކާރުން އިސްރާއީލުގެ ޕާސްޕޯޓު މަނާކުރަން ނުކެރި އޮއްވާ ޣައްޒާ ހަނގުރާމަ ހުއްޓާލަން ވަނީ އެއްބަސްވެފަ
ކުރީގެ ރައީސް ޢަބްދުﷲ ޔާމީން އަދި ޑރ މުޙައްމަދު މުއިއްޒު
އިސްރާއީލް ޕާސްޕޯޓް މަނާކުރުން ލަސްކޮށްފައި ބޭއްވުމަށް ފަހު ފަލަސްތީނުގެ ހައްގުގައި ކަމަށް ބުނެ ސަރުކާރުން ކުރަމުން ދަނީ ލޮނު މަޑު މަސައްކަތްތަކެއް ކަމަށް ކުރީގެ ރައީސް އަބްދުﷲ ޔާމީން އަބްދުލް ޤައްޔޫމް ވިދާޅުވެއްޖެއެވެ.
އެ މަނިކުފާނު އެފަދައިން ވިދާޅުވީ ޕްރޮގްރެސިވް ނޭޝަނަލް ފްރންޓް (ޕީއެންއެފް)ގެ ޖަގަހަ ޖަލްސާގައި ވާހަކަދައްކަވަމުންނެވެ.
ބުރާސްފަތި ދުވަހު އިއްވި ރިޔާސީ ބަޔާނުގައި ރައީސް ޑރ.މުހައްމަދު މުއިއްޒު ވިދާޅުވީ ޣައްޒާގެ ބިމަކީ ފަލަސްތީނުގެ ރައްޔިތުންގެ މިލްކެއް ކަމަށާއި، ޣައްޒާ އިން ރައްޔިތުން ބޭލުމަށް ކުރަމުންދާ އެއްވެސް ކަމަކަށް ރާއްޖެއިން ތާއީދު ނުކުރާނެ ކަމަށެވެ. ރާއްޖެ އަބަދުވެސް އިސްކުރާނީ އަމާންކަން ކަމަށާއި، އެހެން ޤައުމުތަކުގެބިންތައް ހިފައިގަތުމަށް ރާއްޖެއިން ތާއީދު ނުކުރާނެ ކަމަށް އެ މަނިކުފާނު ވަނީ ވިދާޅުވެފައެވެ. އަދި އެކި ފަހަރު މަތިން ފަލަސްތީނުގައި އިސްރާއީލުން ހިންގާ ޖަރީމާތައް ކުށްވެރި ކުރާ ކަމަށް ބުނެ ސަރުކާރުން ދަނީ ބަޔާންތައް ނެރެމުންނެވެ.
އެ މައްސަލަ އަށް އިޝާރާތްކުރައްވާ ކުރީގެ ރައީސް ޔާމީން ވިދާޅުވީ އިސްރާއިލް ޕާސްޕޯޓް މަނާކުރުން ފަސްކުރަމުން ދިއުމުން އެނގެނީ ފަލަސްތީނުގެ ހިމާޔަތުގައި މަސައްކަތް ކުރުމުގެ ހެޔޮ ނިޔަތް ނެތްކަން ކަމަށެވެ. ރާއްޖޭގެ ރައްޔިތުންގެ ޚިޔާލު އެ މައްސަލައިގައި އޮތް ގޮތް ހޯދަން ސަރުކާރުން މަސައްކަތް ނުކުރައްވާ ސަބަބާއި މެދު އެ މަނިކުފާނު ވަނީ ސުވާލު އުފައްދަވާފައެވެ. މީގެ އިތުރުން މަޖިލީހަށް ސަރުކާރުން ފޮނުވާ ގަރާރަކުން ފާސްކޮށްގެން ފަލަސްތީނުގައި ހިންގާ ޖަރީމާތަކާއި މެދު ބަސްބުނާ ފުރަތަމަ ޤައުމަކަށް ރާއްޖެއިން ނުވަނީ ކީއްވެތޯ ވެސް އެ މަނިކުފާނު ވަނީ ސުވާލުކުރައްވާފައެވެ. އެހެންކަމުން އިސްރާއިލް ޕާސްޕޯޓް މަނާކުރުމުގަ ސަރުކާރުގެ ހެޔޮ ނިޔަތެއް ނެތް ކަމަށް އެ މަނިކުފާނު ވިދާޅުވިއެވެ،
ދިވެހި ސަރުކާރުން އިސްރާއީލުގެ ޕާސްޕޯޓު މަނާކުރަން ނުކެރި އޮއްވާ މިދިޔަ ޖެނުއަރީ މަހު ޣައްޒާ ހަނގުރާމަ ހުއްޓާލަން ވަނީ އެއްބަސްވެފައެވެ. މި އެއްބަސްވުމުން ޣައްޒާގައި ހިނގަމުންދާ 15 މަސްދުވަހުގެ ނުރައްކާތެރި ހަނގުރާމަ ނިމުމަކަށް އަންނާނެއެވެ.
20 ނޮވެންބަރު 2024 ގައި މަޖިލީހުގައި ބޭއްވި ޖަލްސާއަށް އިޒްރޭލު ޕާސްޕޯޓުގައި ރާއްޖެއަށް މީހުން އައުން މަނާ ކުރުމަށް މަޖިލިހަށް ހުށަހަޅާފައިވާ ބިލުގެ މައްސަލަ އަވަސް ކުރުމަށް ގޮވާލާ މަޖިލީހަށް ހުށަހެޅި ގަރާރު ބަލައިގަންނަން ފެންނަ ކަމަށް ވޯޓު ދެއްވީ 15 މެންބަރުންނެވެ. ގަރާރު ބޭރުކޮށްލަން 63 މެންބަރުން ވޯޓު ދެއްވި އެވެ.
މީގެ އިތުރުން ޕާސްޕޯޓް ބަނާކުރުމުގެ ބިލުގެ މަސައްކަތް ރައްޔިތުންގެ މަޖިލީހުގެ 241 ކޮމިޓީގައި ޕާކު ކޮށްފައި އޮންނަތާ 150ށް ވުރެ ގިނަ ދުވަސް ވީފަހުން، އެ ބިލުގެ މަސައްކަތް 2025 ވަނަ އަހަރުގެ ފެބްރުއަރީ މަހުގެ ނިޔަލަށް ދިގުދަންމާލަން ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީ (241 ކޮމިޓީ) އިން ފާސް ކުރީ ނިމިދިޔަ ނޮވެމްބަރ މަހުގެ ތެރޭގައެވެ. އެ ނިންމުން ނިންމާފަިއ ވަނީ އެ މަސައްކަތް ޕާކްކޮށްފައި އޮންނާތީ އާއްމުންގެ ފާޑުކިޔުންތައް ނުކަތާ ވަރަށް އިތުރުވުމުން ނިންމެވި ނިންމެވުމެވެ.
