ދަނޑުބިންތަކާއި ގަސްގަހާގެހިވެސް ޔަހޫދީންގެ ކުރިމަތީގައި 'ނިރުބަވެރި' ވީ ތާ!

ޣައްޒާގެ ދެކުނުގެ ސިޓީއެއް ކަމަށް ވާ ޚާން ޔޫނިސްގައި އޭނާ ދަނޑުވެރިކަން ކުރަން ޚާއްޞަކޮށްފައި ހުރި ގްރީން ހައުސް ވަށައިގެން، އަހުމަދު އަބޫ ޞާލިޙު ހިނގަމުން ދިޔަ އިރު، އޭނާގެ މޫނުމަތިން ފެންނަމުން ދިޔައީ ހިތާމައާއި މަޑުމޮޅިކަމުގެ އަސަރުތަކެވެ. ދިރިއުޅުމުގެ ކަންކަން ހަމަޖެއްސުމަށްޓަކައި ދަނޑުވެރިކަން ކުރަމުން އައި އަބޫ ޞާލިޙުގެ ގްރީން ހައުސްގައި މިއަދު އެއްވެސް ދިރުމެއް ނެތެވެ. ސަފުސަފަށް އިންދާފައި ހުރި ޓޮމާޓޯ ގަސްތައް ހުރީ މިލާ މޯޅިވެއެވެ. ޙަޤީޤަތުގައި މިއީ ޓޮމާޓޯ ގޮވާން ކުރާ ދުވަސްވަރެވެ. ނަމަވެސް، މިއަދު ގަހުން ބިނދެލާނެ އެންމެ ޓޮމާޓޯއެއްވެސް ނެތެވެ.

އޭނާގެ ގްރީން ހައުސް ދޫކޮށް، އެހެން ސަރަޙައްދަކަށް އަބޫ ޞާލިޙު ބަދަލުވީ، އެ ސަރަޙައްދަކީ އަސްކަރީ ޒޯންއަކާ ވަރަށް ކައިރީގައި އޮތް ސަރަޙައްދަކަށް ވެފައި ވާ ކަމުގެ އިންޒާރު ލިބި، ޔަހޫދީންގެ ޤަތުލުޢާންމުން ސަލާމަތް ވުމަށެވެ. ހުސްވި ނޮވެމްބަރު މަހުގެ ފަހުކޮޅު، ހަފުތާއަކަށް ވުރެވެސް ކުރު މުއްދަތަކަށް ޙަމަލާ މަޑުޖައްސާލުމުން، ގްރީން ހައުސްއަށް އަނބުރާ ދިޔައިރު ކަމަކު ދާކަށް ނެތެވެ. ސަލާމަތުން ހަމަ އެންމެ ގަހެއްވެސް ނެތީއެވެ. ދިރިއުޅުމަށް ކުރަމުން އައި މަސައްކަތް ހުއްޓުނީއެވެ.

އަބޫ ޞާލިޙު ބުނި ގޮތުގައި މިއަދު އޭނާ ވަނީ ދަރަނިވެރިވެފައެވެ. މިލާ މޯޅިވެފައި ވާ ގަސްތަކަކީ އޭނާއަށް އާމްދަނީއެއް ލިބެން އޮތް ހަމައެކަނި މަސްދަރެވެ.

އަބޫ ޞާލިޙު، އޭނާގެ ގްރީން ހައުސްއަށް އަނބުރާ ދިޔަ ދުވަހަކީ ހިނދުކޮޅެއްގެ މަޑުޖެހުމަކަށް ފަހު، އިޒްރޭލުގެ ޢުދުވާނީ ޙަމަލާތައް އަނެއްކާވެސް ވަރުގަދައަށް ދޭން ފެށި ދުވަހެވެ. އެ ވަރުންވެސް އޭނާ އުންމީދު ކޮށްގެން ހުރީ، ދާއިމީ ހަމަޖެހުމެއް ލިބިދާނެ ކަމަށެވެ.

ޣައްޒާ ކޮންޓްރޯލް ކުރާ ޙަމާސް ޖަމާޢަތާ ދެކޮޅަށް ކަމަށް ބުނެ ޔަހޫދީން ދެމުންދާ ޙަމަލާތަކުގައި ޣައްޒާގެ ދަނޑުވެރިކަމުގެ ސިނާޢަތަށް ދުވާލެއްގެ މައްޗަށް ލިބޭ ގެއްލުމުގެ އަގު، ގާތްގަނޑަކަށް 2 މިލިއަން އެމެރިކާ ޑޮލަރަށް އަރާނެ ކަމަށް އަންދާޒާ ކުރެވޭ ކަމަށް ސެންޓްރަލް ބިއުރޯ އޮފް ސްޓެޓިސްޓިކްސްއިން ބުނެއެވެ.

ކަނޑާއި ވައިގެ މަގުން ދެމުންދާ ޙަމަލާތަކުގެ އިތުރަށް، އެއްގަމު މަގުންވެސް އިޒްރޭލުންގެ ޙަމަލާތައް ވަރުގަދަ ކޮށްފައި ވާ އިރު، ޣައްޒާގެ އެކި ސަރަޙައްދުގައި ހުރި ގިނަ ޢަދަދެއްގެ ދަނޑުބިންތަކާއި، އެނޫންވެސް ތަންތަނުގައި ހުރި އެތައް ހާސް ގަހެއް ވަނީ ސުންނާފަތި ކޮށްފައެވެ. ބަރު އުޅަނދުފަހަރު ބޭނުންކޮށްގެން ވައްޓާލާފައެވެ.

ދަނޑުބިންތަކާއި ގަސްގަހާގެހިވެސް ޔަހޫދީންގެ ކުރިމަތީގައި 'ނިރުބަވެރި' ވީ ތާއެވެ. ދަނޑުބިންތަކަށް ގެއްލުން ދެނީ ޣައްޒާގެ ރައްޔިތުން ބިކަކޮށް، ޙާލުގައި ޖެއްސުމުގެ ނިޔަތުގައި ކަމަށް ވިއަސް، ގެއްލުން އެދެވެނީ ތިމާވެއްޓަކަށް ނޫންބާއެވެ؟ ވެށީގެ ދިފާޢުގައި މީގެ ކުރިން ކަރުން ނާރު ނަގައި ހަޅޭއް ލަވަމުން ދިޔަ 'އެކްޓިވިސްޓުންނަށް' މި މަންޒަރުތައްވެސް ނުފެންނަނީބާއެވެ؟