ކުރީގެ ޓޫރިޒަމް މިިނިސްޓަރު އަލީ ވަހީދު އިނގިރޭސި ވިލާތުގައި ހުންނަވަނިކޮށް އެ ގައުމުން އޭނާ ހައްޔަރުކުރީ ގާނޫނާ ޚިލާފަށް ކަމަށް ކަނޑައަޅައި، ބަދަލުގެގޮތުގައި 20،000 ޕައުންޑް ދޭން އެ ގައުމުން ނިންމާފައިވާކަމަށް، އަލީ ވަހީދުގެ ވަކީލުން ބުނެފިއެވެ.

ބުދަ ދުވަހު އަލީ ވަހީދު ވަނީ އޭނާގެ ގާނޫނީ ވަކީލުން ނެރުއްވި ބަޔާނެއް އެކްސްގައި ހިއްސާކުރައްވާފައެވެ.

އަލީ ވަހީދު އިނގިރޭސި ވިލާތުގައި ބޭސްފަރުވާ ކުރައްވަމުންދަނިކޮށް 2021 ވަނަ އަހަރުގެ އޮގަސްޓު މަހުގެ ތެރޭގައި އެގައުމުގެ ފުލުހުން ކުއްލި ގޮތަކަށް އަލީ ވަހީދު ހައްޔަރުކުރުމާ ގުޅިގެން އެ ބަޔާނުގައި ބުނެފައިވަނީ އަލީ ވަހީދު، ރާއްޖެ އަދި އިނގިރޭސިވިލާތުގެ އިމިގްރޭޝަން ގާނޫނާ ޚިލާފުނުވާކަމުގެ ޔަގީންކަން, ބަންދުކުރި ފުރަތަމަ ހިސާބުން ފެށިގެންވެސް އޭނާގެ ލޯ ފާމަށް އެކަމުގެ ސާބިތު ހެކިތައް ހިއްސާކޮށްފައި ވާކަމަށެވެ. އަދި ދެ ގައުމުގެ ގާނޫނުތައް ތަންދޭ އެންމެ މަތީ ދަރަޖައެއްގައި އޭނާގެ ހުރިހާ ގާނޫނީ ހައްގުތައް ރައްކާތެރިކޮށް އަދި މަސްލަހަތު ހިމާޔަތްކުރުމުގެ މަސައްކަތް އިނގިރޭސި ވިލާތުގެ ވަކީލުންގެ ޓީމަކާ ގުޅިގެން އޭނާގެ ލޯފާމުން މަސައްކަތް ކުރިކަމަށް ބުނެފައިވެއެވެ.

ބަޔާނުގައި ބުނީ، ވަކީލުންގެ ޓީމުން ކުރެވުނު މަސައްކަތުގެ ނަތީޖާއެއްގެ ގޮތުން އަލީ ވަހީދު ބަންދުން މިނިވަންވެވަޑައިގަތް ކަމަށެވެ. އަދި އޭނާ ބަންދުކުރީވެސް އެއްވެސް ހަގީގަތެއް ނެތް ތުހުމަތެއްގެ މައްޗަށް ބިނާކޮށް، އިނގިރޭސިވިލާތުގެ ގާނޫނާވެސް ޚިލާފަށްކަން ހާމަވާކަމަށެވެ. އަދި ގާނޫނާ ޚިލާފަށް އަލީ ވަހީދު އިނގިރޭސިވިލާތުން ހައްޔަރުކުރި މައްސަލާގައި އެގައުމުގެ ސަރުކާރުގެ މައްޗަށް ދައުވާކުރުމުގެ ކުރިން، ގުޅިފައިވާ ވަކީލުންގެ ޓީމުން އެގައުމުގެ ސަރުކާރާއެކު ކުރި މަޝްވަރާތަކާއެކު، އެ ހައްޔަރަކީ ގާނޫނާ ޚިލާފު ހައްޔަރެއްކަމަށް އެގައުމުގެ ކަމާބެހޭ އިދާރާތަކުން އެއްބަސްވެފައިވާކަމަށެވެ.

ގާނޫނާ ޚިލާފަށް އެގައުމުގެ ފުލުހުން މެދުވެރިކޮށް އަލީ ވަހީދު ހައްޔަރު ކުރުމުގެ އަމަލަށްޓަކައި އިނގިރޭސި ސަރުކާރުގެ ފަރާތުން އޭނާގެ ކިބައިން މައާފަށް އެދިފައިވާކަމަށާއި، އިތުރަށް ގާނޫނާ ޚިލާފު އެ ހައްޔަރުގެ ސަބަބުން ލިބިގެންދިޔަ ގެއްލުމުގެ ބަދަލެއްގެ ގޮތުގައި 20000.00 ސްޓަރލިންގ ޕައުންޑް ދިނުމަށްވެސް އިނގިރޭސި ސަރުކާރުން ނިންމާފައިވާކަމަށް ބަޔާނުގައި ބުނެފައިވެއެވެ.

ޖިންސީ ގޯނާގެ ގިނަ ދައުވާތަކެއް އަލީ ވަހީދުގެ މައްޗަށް ކޮށްފައިވަނިކޮށް، އަލީ ވަހީދު އިނގިރޭސި ވިލާތަށް ވަޑައިގަތީ ބޭސްފަރުވާއަކަށެވެ. އެއީ 10 ފެބްރުއަރީ 2021ގައެވެ.

މި ދައުވާތައް ކޮށްފައިވަނީ، ޓުއަރިޒަމް މިނިސްޓަރުގެ މަގާމުގައި ހުންނަވައިގެން އެ މިނިސްޓްރީގެ ގިނަ އަދަދެއްގެ އަންހެން މުވައްޒަފުންތަކަކަށް ޖިންސީ ގޯނާކުރެއްވިކަމުގެ ތުހުމަތުގައެވެ. އަދި އެ ދައުވާތައް ޕްރޮސެކިއުޓަރ ޖެނެރަލް އޮފީހުން އަނބުރާ ގެންދިއުމާ ގުޅިގެން، 2 އަހަރު ދުވަހު އިނގިރޭސިވިލާތުގައި އުޅުއްވުމަށްފަހު އޭނާ ރާއްޖެ ވަޑައިގަތީ 11 ޖުލައި 2023ވީ އަންގާރަ ދުވަހުއެވެ. އަލީ ވަހީދު ވަނީ މި ތުހުމަތުތައް ދޮގުކުރައްވާފައެވެ.