އަލީ ވަހީދުގެ މައްސަލައިގެ އަޑުއެހުން ކެންސަލް ކުރީ އޮންލައިންކޮށް ޝަރީއަތް ކުރިއަށް ގެންދަން އެދިފައިވާތީ

ޖިންސީ ގޯނާގެ ގިނަ ދައުވާތަކެއް އުފުލާފައިވާ ކުރީގެ ޓުއަރިޒަމް މިނިސްޓަރު އަލީ ވަހީދުގެ ޝަރީއަތް އޮންލައިންކޮށް ކުރިއަށް ގެންގޮސްދިނުމަށް އެދިފައިވާތީ، ބުރާސްފަތި ދުވަހަށް ތާވަލުކުރި ޝަރީއަތް ކެންސަލްކޮށްފިއެވެ.

ޔޫތު މިނިސްޓްރީގެ ސްޓޭޓް މިނިސްޓަރު އައްސަދު އަލީ (އަޑުބަރޭ) ޖާމިނުކުރުމަށްފަހު އަލީ ވަހީދު ބޭސްފަރުވާއަށް ވަޑައިގެންނެވުމަށް ޕާސްޕޯޓު ދޫކުރުމަށް ކްރިމިނަލް ކޯޓުން ވަނީ އަމުރުކޮށްފައެވެ. ޖާމިނުވުމުގެ އެއްބަސްވުމުގެ މުއްދަތު ހަމަވުމުން، ކްރިމިނަލް ކޯޓުން ބުރާސްފަތި ދުވަހަށް އަޑުއެހުމެއް ތާވަލުކުރިއެވެ.

ޖާމިނުވުމުގެ އެއްބަސްވުމުގައިވާ ހަތަރު މަސްދުވަހުގެ މުއްދަތު ހަމަވުމާއެކު ޝަރީއަތުގެ އަޑުއެހުންތައް އޮންލައިންކޮށް ބާއްވައިދޭން އަލީ ވަހީދު ހުށަހަޅުއްވާފައި ވާކަމަށް ކްރިމިނަލް ކޯޓުން މައުލޫމާތުދެއެވެ. އެހެންނަމަވެސް އަޑުއެހުންތައް އޮންލައިންކޮށް ކުރިއަށް ގެންދިޔުމާމެދު ކްރިމިނަލް ކޯޓުން ނިންމި ގޮތެއް އަދި ހާމަކޮށްފައެއް ނުވެއެވެ.

ޕްރޮސެކިއުޓާ ޖެނެރަލް އޮފީހުގެ ޕަބްލިކް ޕްރޮސެކިއުޓާ އަހުމަދު ޝަފީއު 'ރާއްޖެއެމްވީ' އަށް ވިދާޅުވީ، ބުރާސްފަތި ދުވަހަށް ތާވަލުކުރި އަޑުއެހުން ކެންސަލްކުރީ އޮންލައިންކޮށް ޝަރީއަތް ކުރިޔަށް ގެންދަން އަލީ ވަހީދު ހުށަހަޅުއްވާފައި ވުމުން ކަމަށް ކްރިމިނަލް ކޯޓުން އެ އޮފީހަށް އަންގާފައި ވާކަމަށެވެ. އެހެން ނަމަވެސް އަލީ ވަހީދުގެ ފަރާތުން ހުށަހަޅުއްވާފައިވާ އެއްވެސް ލިޔެކިޔުމެއް މިހާތަނަށް ލިބިފައި ނުވާކަމަށް ޝަފީޢު ވިދާޅުވިއެވެ.

ޓޫރިޒަމް މިނިސްޓްރީގެ އަންހެން މުވައްޒަފުންތަކަކަށް ޖިންސީ ގޯނާ ކުރިކަމުގެ ތުހުމަތުގައި އަލީ ވަހީދުގެ މައްޗަށް އުފުލާފައިވާ ދައުވާތަކަކީ ޖިންސީ އަނިޔާކުރުމުގެ ދައުވާ އާއި ޖިންސީ ގޯނާ ކުރުމުގެ ދައުވާ އާއި ޖިންސީ ގޯނާކުރަން އުޅުމުގެ ދައުވާ އާއި ރޭޕްކުރަން އުޅުމުގެ ދައުވާ އާއި ބޭއަދަބީ ގޮތުގައި ޖިންސީ ގުނަވަން ހާމަކުރުމުގެ ދައުވާ އާއި ހުއްދަނޫން ޖިންސީ މުއާމަލާތެއް ހިންގުމަށް އެދުމުގެ ކުށުގެ ދައުވާއެވެ.