ޖިންސީ ގޯނާގެ ގިނަ ދައުވާތަކެއް އުފުލާފައިވާ ކުރީގެ ޓުއަރިޒަމް މިނިސްޓަރު އަލީ ވަހީދުގެ ޝަރީއަތް އޮންލައިންކޮށް ކުރިއަށް ގެންގޮސްދިނުމަށް ކްރިމިނަލް ކޯޓުގައި އެދިއްޖެއެވެ.

އަލީ ވަހީދުގެ މައްޗަށް ތުހުމަތުކުރެވޭ ޖިންސީ ގޯނާގެ މައްސަލައިގެ ތަހުގީގު ފެށުނު ހިސާބުން އޭނާގެ ޕާސްޕޯޓު އޮތީ ހިފަހައްޓާފައެވެ. އެހެންނަމަވެސް މި މައްސަލައިގައި ޔޫތު މިނިސްޓްރީގެ ސްޓޭޓް މިނިސްޓަރު އައްސަދު އަލީ (އަޑުބަރޭ) ޖާމިނު ކުރުމަށްފަހު އަލީ ވަހީދުގެ ޕާސްޕޯޓު އަލުން ދޫކުރުމަށް ކްރިމިނަލް ކޯޓުން ވަނީ އަމުރުކޮށްފައެވެ. ކްރިމިނަލް ކޯޓުން މިހެން އަމުރުކޮށްފައި ވަނީ، އަލީ ވަހީދުގެ މެޑިކަލް ޗެކަޕެއް ހެދުމަށްފަހު، ޚަބީރެއްގެ ގޮތުގައި ޑރ. ޝާން ހާޒިރުކޮށް އޭނާގެ ހެކި ބަސްނަގައިގެންނެވެ.

އަޑުބަރޭ އާއެކު ހެދިފައިވާ ޖާމިނުވުމުގެ އެއްބަސްވުމުގައިވާ ހަތަރު މަސްދުވަހުގެ މުއްދަތު މިހާރު ވަނީ ހަމަވެފައެވެ. އެއާއެކު ޝަރީއަތުގެ އަޑުއެހުންތައް އޮންލައިންކޮށް ބާއްވައިދޭން އަލީ ވަހީދު ހުށަހަޅުއްވާފައި ވާކަމަށް ކްރިމިނަލް ކޯޓުން މައުލޫމާތުދެއެވެ.

އަޑުބަރޭ ޖާމިނުވި އިގުރާރުގައި ކޯޓުން ކަނޑައަޅާ ދުވަހެއްގައި އެ މީހަކު އަޑުއެހުމަށް ހާޒިރުކުރަންޖެހޭނެ ކަމަށް ބުނެފައި ވެއެވެ. އެހެންނަމަވެސް ކްރިމިނަލް ކޯޓުގެ އަމުރު ހައިކޯޓުގައި އިސްތިއުނާފު ކުރުމުން، އިސްތިއުނާފުގެ އަޑުއެހުމަށް އަލީ ވަހީދު ކޯޓަށް ހާޒިރު ވެފައެއް ނުވެއެވެ. އެހެން ކަމުން، ޖާމިނުވި އިގުރާރުގައިވާ ޝަރުތުތަކާ އަޑުބަރޭ ޚިލާފުވެފައިވާތީ، ޖިނާއީ އިޖުރާއަތުގެ ގާނޫނުގެ 64 ވަނަ މާއްދާގެ ދަށުން ފިޔަވަޅު އަޅައި ދިނުމަށް ދައުލަތުން ވަނީ އެދިފައެވެ.

ޖާމިނުވާ ފަރާތުން އިގުރާރާ ޚިލާފު ވެއްޖެނަމަ އެޅޭނެ ފިޔަވަޅު ތަކެއް ޖިނާއީ އިޖުރާއަތުގެ ގާނޫނުގެ 64 ވަނަ މާއްދާގައި ބަޔާންކޮށްފައިވެއެވެ. އޭގެ ތެރޭގައި ހިމެނެނީ، އެއް އަހަރު ދުވަހަށް ޖަލަށްލުމާއި، ދެ އަހަރު ދުވަހަށް ގޭ ބަންދުކުރުން ނުވަތަ 15000 ރުފިޔާއިން ޖޫރި މަނާކުރުމެވެ. އެހެންކަމުން މި މައްސަލައިގައި އެއް އަހަރު ދުވަހަށް އަޑުބަރޭ ޖަލަށް ލުމަށް ދައުލަތުން ވަނީ އެދިފައެވެ.

އޮންލައިންކޮށް ޝަރީއަތް ކުރިއަށް ގެންގޮސް ދިނުމަށް އަލީ ވަހީދު ހުށަހަޅުއްވާފައި މިވަނީ، ދައުވާތަކުގެ އިތުރު އަޑުއެހުމެއް ބާއްވައި ދިނުމަށް ކްރިމިނަލް ކޯޓުގައި ދައުލަތުން އެދިފައި ވަނިކޮށެވެ.

ޓޫރިޒަމް މިނިސްޓްރީގެ އަންހެން މުވައްޒަފުންތަކަކަށް ޖިންސީ ގޯނާ ކުރި ކަމުގެ ތުހުމަތުގައި އަލީ ވަހީދުގެ މައްޗަށް އުފުލާފައިވާ ދައުވާތަކަކީ ޖިންސީ އަނިޔާކުރުމުގެ ދައުވާ އާއި ޖިންސީ ގޯނާ ކުރުމުގެ ދައުވާ އާއި ޖިންސީ ގޯނާކުރަން އުޅުމުގެ ދައުވާ އާއި ރޭޕް ކުރަން އުޅުމުގެ ދައުވާ އާއި ބޭއަދަބީ ގޮތުގައި ޖިންސީ ގުނަވަން ހާމަކުރުމުގެ ދައުވާ އާއި ހުއްދަނޫން ޖިންސީ މުއާމަލާތެއް ހިންގުމަށް އެދުމުގެ ކުށުގެ ދައުވާއެވެ.