އިންޓަރޕޯލް ރެޑް ނޯޓިސް ނެރެގެން ކުރީގެ ޓޫރިޒަމް މިނިސްޓަރު ޢަލީ ވަޙީދު ރާއްޖެ ގެނައުމަށް މަސައްކަތް ކުރަމުންދާ ކަމަށް ފުލުހުން ބުނެފިއެވެ.

ފުލުހުން އާދީއްތަ ދުވަހު ބުނީ އޭނާގެ މައްޗަށް ސުޕްރީމް ކޯޓުން ކުރި ހުކުމް ތަންފީޒު ކުރުމަށް ރާއްޖެ ގެނައުމަށް އިންޓަރޕޯލް މެދުވެރިކޮށް, ކުރަން ޖެހޭ ކަންކަން ކުރަމުން އަންނަ ކަމަށެވެ. އަދި ފުލުހުންގެ ފަރާތުން "ޕޮލިސް ޓު ޕޮލިސް ކޯޕަރޭޝަން" މެދުވެރިކޮށްވެސް އިތުރަށް މަސައްކަތް ކުރަމުން އަންނަ ކަމަށް ފުލުހުން ބުނެފައިވެއެވެ.

އިންޓަރޕޯލް ރެޑް ނޯޓިސް ނެރެގެން ޢަލީ ވަޙީދު ރާއްޖެ ގެނައުމަށް މަސައްކަތް ކުރަމުންދާ ކަމަށް ފުލުހުން ފުލުހުން ބުނެފައިވާއިރު، މަޝްހޫރު ޤާނޫނީ ވަކީލު މުޙައްމަދު ނިޝާން އިބްރާހީމް ވިދާޅުވެފައިވަނީ, އޭނާ އަނބުރާ ރާއްޖެ ގެނައުމަށް އިންޓަރޕޯލްގެ އެހީތެރިކަމަށް އެދެންޖެހޭ ކަމަށާއި، އެނޫން ގޮތަކަށް އޭނާ ރާއްޖެއަށް ނުގެނެވޭނެ ކަމަށެވެ. ނިޝާން ވިދާޅުވީ ޢަލީ ވަޙީދުގެ މައްޗަށް އިއްވާފައިވާ 2 މަހާއި 12 ދުވަހުގެ ޖަލު ހުކުމް, ޖަލުގައި ބަހައްޓައިގެން ތަންފީޒު ކުރަން ޖެހޭ ކަމަށެވެ. އަދި އެ ހުކުމް ތަންފީޒު ނުކޮށްފިނަމަ ދިވެހިރާއްޖޭގެ ޝަރުޢީ ކޯޓުތަކާ މެދު, އަދި ދައުލަތުގެ ޤާނޫނީ ވެރިކަމާމެދު ރައްޔިތުން ދެކޭ ގޮތް ބަދަލުވާނެ ކަމަށެވެ.

ޖިންސީ ގޯނާއާ ގުޅުން ހުރި 6 ދައުވާއެއް އޭނާގެ މައްޗަށް އުފުލާފައިވާއިރު، މިހުރިހާ ދައުވާއަކަށް އޭނާ އިންކާރުކުރައްވާފައި ވެއެވެ. ޢަލީ ވަޙީދު ބޭސްފަރުވާއަށް ރާއްޖެއިން ބޭރަށް ވަޑައިގަތުމަށް އެދިވަޑައިގަތުމުން ކޯޓު އަމުރެއްގެ ދަށުން ޕާސްޕޯޓު ދޫކުރީ ހަތަރު މަހަށެވެ. އަދި އެކަން ކުރީ އަސްޢަދު ޢަލީ (އަޑުބަރޭ) ޖާމިނުވާގޮތަށެވެ. އެހެންނަމަވެސް ހަތަރު މަސް ފާއިތުވެ، ޝަރީއަތް ފެށުނު އިރު ވެސް އޭނާ އެނބުރި ރާއްޖެއަށް ވަޑައެއްނުގަންނަވައެވެ. އަދި އެކަމުގެ ޒިންމާ އަޑުބަރޭ ވެސް ނަގާފައެއް ނުވެއެވެ.

ޕާސްޕޯޓު ދޫކުރި މައްސަލަ ދައުލަތުން ހައިކޯޓާއި ސުޕްރީމް ކޯޓުގައި ވެސް އިސްތިއުނާފުކުރިއެވެ. ނަމަވެސް، ޢަލީ ވަޙީދު އުޅޭ އެޑްރެސް ނޭނގޭ ކަމަށް ބުނެ، ޗިޓް ނުފޮނުވިގެން އޭނާގެ ޕާސްޕޯޓް ހިފަހައްޓައިދޭން ހައިކޯޓަށާއި ސުޕްރީމް ކޯޓަށް ހުށަހެޅި މައްސަލަ ވެސް ވަނީ ބޭރު ކޮށްލާފައެވެ. ޢަލީ ވަޙީދުގެ ޕާސްޕޯޓް ހިފަހައްޓަން ކުރިމިނަލް ކޯޓުގައި އެދުމުން އެ އަމުރު ނެރެނުދިން މައްސަލަ ޕީޖީން ހައި ކޯޓަށް ހުށަހެޅިއެވެ. އެހެންނަމަވެސް ޢަލީ ވަޙީދުގެ ޣައިރު ހާޒިރުގައި މައްސަލަ ކުރިއަށް ނުގެންދެވޭނެ ކަމަށް ބުނެ، ހައި ކޯޓުން މައްސަލަ ބަލައިގެންފައެއް ނުވެއެވެ.

ހައިކޯޓުގެ ރެޖިސްޓްރަރގެ އެ ނިންމުން ރިވިއުކޮށްދޭން 10 އޮގަސްޓްވީ އަންގާރަ ދުވަހު ޕްރޮސިކިއުޓަރ ޖެނަރަލްގެ ފަރާތުން ވަނީ އަނެއްކާވެސް އެ މައްސަލަ ހައި ކޯޓުގެ ފަނޑިޔާރުންގެ ބެންޗަށް ހުށަހަޅާފައެވެ. އެކަމާމެދު އަދި ހައިކޯޓުން ވަކި ގޮތެއް ނުނިންމަވައެވެ.