ސްޕޯޓިން ލަންޑަނާއެކު ޢަލީ ވަޙީދު ފައިނަލްގައި، ބައިނަލްއަޤްވާމީ ކުޅިވަރުގެ ދަނޑުގައި ރާއްޖެއަށް ތާރީޚީ ވަގުތު ކޮޅެއް!

ދިވެހި ކޯޗަކު ޔޫރަޕްގެ އެފް.އޭއެއްގެ މުބާރާތެއްގެ ފައިނަލުގައި ވާދަކުރާ ތާރީޚީ ފައިނަލް އަންނަ ހޮނިހިރު ދުވަހު އޮންނާނެ އެވެ.

ރާއްޖޭގެ ކުރީގެ ޓޫރިޒަމް މިނިސްޓަރު އަދި ނިއުރޭޑިއަންޓް ސްޕޯޓްސް ކްލަބުގެ ކާމިޔާބު ޗެއަރމަންކަމާއި ދިވެހި ޤައުމީ ޓީމުގެ މެނޭޖަރުކަންކޮށްފައިވާ ޢަލީ ވަޙީދު (ބަލަކް) ހެޑް ކޯޗްކަން ކުރާ ސްޕޯޓިން ލަންޑަނާއި ދެކޮޅަށް މި މެޗްގައި ނުކުންނާނީ ވިމްބަލްޑަންގެ ގަދަބާރު ރޭންސްޕާކް ޔުނައިޓެޑެވެ. މިއީ ލަންޑަންގެ ވިމްބަލްޑަން ޑިސްޓްރިކްޓް ލީގުގެ 125 ވަނަ އަހަރުވީ ސެންޗަނަރީ ކަޕް ފައިނަލެވެ. ބައިނަލްއަޤުވާމީ ކުޅިވަރުގެ މައިދާނުގައި ރާއްޖެއަށް ތާރީީޚީ އެ މެޗު ފަށާނީ އަންނަ ހޮނިހިރު ދުވަހުގެ ހަވީރު ރާއްޖެ ގަޑިން 5:30 ގައެވެ.

ޔޫރަޕުގައި ތަޖުރިބާ ހޯދަމުން އަންނަ އަލީ ވަހީދުގެ އިރުޝާދުގެ ދަށުން ސައުތު ލަންޑަން އިން ވަނީ މިދިޔަ އަހަރުގެ މެއި މަހު އިނގިރޭސި އެފްއޭ އެފިލިއޭޓެޑު ލަންޑަނުގެ ވިމްބަލްޑަން ކަޕް ބީގެ ރިހި މެޑަލް ހޯދައިފަ އެވެ. އަދި ގްރެންފެލް މެމޯރިއަލް ކަޕްގެ ރިހި މެޑަލް ވެސް ވަނީ ހޯދައިފަ އެވެ. އަލީ ވަހީދު ވަނީ އިނގިރޭސި ކޯޗިން ފަސް ލެވެލްގެ ތެރެއިން މިހާތަނަށް ދެ ލެވަން ހާސިލުކޮށްފަ އެެވެ. ހަމައެއާއެކު އޭނާ އަންނަނީ ޔުއެފާ ބީ ލައިސަންސް ހާސިލުކުރުމުގެ މަސައްކަތް ކުރަމުންނެވެ.