އަޑުބަރޭ އެނބުރި ރާއްޖެ އަތުވެއްޖެ
އަޑުބަރޭ ވަނީ މޯލްޑިވްސް ކަރެކްޝަނަލް ސަރވިސްއާ އަމިއްލައަށް ހަވާލުވެފައި
އަޑުބަރޭ ރާއްޖެ އައުން
ކުރީގެ ޓޫރިޒަމް މިނިސްޓަރު އަލީ ވަހީދުގެ ޕާސްޕޯޓު ދޫކޮށްލަން ކްރިމިނަލް ކޯޓުން ކުރި އަމުރުގައި ޖާމިނުވި, ޔޫތު މިނިސްޓްރީގެ ކުރީގެ ސްޓޭޓް މިނިސްޓަރު އައްސަދު އަލީ (އަޑުބަރޭ) އަމިއްލައަށް އެނބުރި ރާއްޖެ އަތުވެއްޖެއެވެ.
އަޑުބަރޭ ރާއްޖެ އައިސްފައިވާކަން ހާމަކުރައްވާފައިވަނީ ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅު ކުރެއްވި ޓްވީޓެއްގައެވެ. އަދި އޭނާގެ މައްޗަށް ކޮށްފައިވާ ހުކުމް ތަމްފީޒުކުރުމަށް މޯލްޑިވްސް ކަރެކްޝަނަލް ސަރވިސްއާ އަމިއްލައަށް ހަވާލުވެފައިވާކަމަށް ސީޕީ ވިދާޅުވިއެވެ. އޭނާ މިހާރު ހުރީ ކަރެކްޝަންސްގެ ބެލުމުގެދަށުގައެވެ.
ކްރިމިނަލް ކޯޓުގެ ޗިޓާ ހަވާލުވެ، ކޯޓަށް ހާޒިރުވެފައި ނުވުމާއި، ކޯޓުގެ ހުރުމަތް ކެނޑޭފަދަ އަމަލުތަކެއް އަޑުބަރޭގެ ފަރާތުން ފެނިފައިވާތީ, އޭނާގެ މައްޗަށް 15 ދުވަހުގެ ޖަލު ހުކުމެއް އިއްވާފައިވަނީ 2 ފެބްރުއަރީގައެވެ. އޭނާ އެނބުރި ރާއްޖެ ގެނައުމަށް ކަރެކްޝަންސްއިން ވަނީ މީގެ ކުރިން މަސައްކަތްކޮށްފައެވެ.
ކްރިމިނަލް ކޯޓުގައި މި މައްސަލަ ބެއްލެވި ގާޒީ ހަސަން ސައީދު ވަނީ, އަޑުބަރޭ ޖާމިނުވުމުގެ އިގުރާރާ ޚިލާފުވެ، ކޯޓުގެ ހުރުމަތް ކެނޑުމަށް ކޮށްފައިވާ ކަންކަމަށް ރިއާޔަތް ކުރައްވައި، އޭނާ 15 ދުވަހަށް ޖަލަށް ލުމަށް ހުކުމް ކުރައްވާފައެވެ. އަޑުބަރޭގެ ޣައިރު ހާޒިރުގައި އެ ހުކުމް ކުރެއްވިއިރުވެސް އޭނާ ހުރީ ރާއްޖެއިން ބޭރުގައެވެ.
ގާޒީ ހަސަން ސައީދު ކުރެއްވި މިހުކުމުގައިވަނީ އަލީ ވަހީދު އަނބުރާ ރާއްޖެ ގެނައުމަށް އަޑުބަރޭ ކުރި މަސައްކަތެއް ފެންނަން ނެތް ކަމަށެވެ.
އޭގެ ބަދަލުގައި ތަކުރާރުކޮށް އަޑުބަރޭ ބުނަމުން ގެންދިޔައީ އޭނާ ޖާމިނުވީ 4 މަހަށް ކަމަށާއި، އެ މުއްދަތުގައި އޭނާ ހާޒިރު ކުރުމަށް ކޯޓުން އަންގާފައި ނުވާކަމަށްކަން ގާޒީ ފާހަގަކުރެއްވިއެވެ. މިއީ ކޯޓާމެދު ނުބައި ތަސައްވުރެއް އުފެއްދުންކަން ފާހަގަކުރައްވައި ގާޒީ ވަނީ, މި މުޅި މައްސަލާގައި އަޑުބަރޭގެ އިހުމާލު އެބައޮތްކަމަށް ވިދާޅުވެފައެވެ.
އަލީ ވަހީދު އަދިވެސް ހުންނެވީ ފިއްލަވައިގެން ރާއްޖެއިން ބޭރުގައެވެ. އޭނާ ގެނައުމުގެ މަސައްކަތްވެސް އިންޓަރޕޯލް މެދުވެރިކޮށް ފުލުހުން ގެންދަނީ ކުރަމުންނެވެ.
