މާދަމާވެސް މުޅި މަޖިލީހުގެ ކޮމިޓީ ބައްދަލުވުމެއް ބާއްވަނީ - ކުނި މެނޭޖްކުރުމުގެ ޤާނޫނަށް އިސްލާހު ގެނައުމާއި މެދު ގޮތެއް ނިންމާނެ
28 ނޮވެމްބަރު 2023 | އަންގާރަ 08:12މި ބިލަކީ މެންބަރުން ވަރަށް ބޮޑަށް ދިރާސާކުރައްވާފައިވާ ބިލެއްކަން ވަނީ ފާހަގަކުރައްވާފައި
މުޅި މަޖިލީހުގެ ކޮމިޓީ ބައްދަލުވުމެއްގެ ތެރެއިން
ބުދަ ދުވަހު ވެސް މުޅި މަޖިލީހުގެ ކޮމިޓީ ބައްދަލުވުމެއް ބާއްވާ، ކުނި މެނޭޖްކުރުމުގެ ޤާނޫނަށް އިސްލާހު ގެނައުމާ މެދު ގޮތެއް ނިންމަވާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު އަސްލަމް އިއުލާންކުރައްވައިފިއެވެ.
އަސްލަމް މިފަދައިން ވިދާޅުވީ އަންގާރަ ދުވަހު ބޭއްވި މުޅި މަޖިލީހުގެ ކޮމިޓީ ބައްދަލުވުމުގެ ރިޔާސަތުގައި އިންނަވާ ވާހަކަފުޅު ދައްކަވަމުންނެވެ. 2023 ވަނަ އަހަރުގެ މުޅި މަޖިލީހުގެ 4 ވަނަ ކޮމިޓީ ބައްދަލުވުމުގައި އޮތީ ސަރުކާރުގެ ފަރާތުން ކޮމަންޑޫ ދާއިރާގެ މެންބަރު މުހައްމަދު ރާޝިދު ހުށަހަޅުއްވާފައިވާ ކުނި މެނޭޖްކުރުމުގެ ޤާނޫނަށް އިސްލާހު ގެނައުމުގެ ބިލުގެ މަސައްކަތެވެ.
މުޅި މަޖިލީހުގެ ކޮމިޓީ އަށް މަޖިލިސް ދިޔައިރު، ކޮމިޓީ ބައްދަލުވުމުގައި ތިއްބެވީ 40 މެންބަރުންނެވެ. މުޅި މަޖިލީހުގެ ކޮމިޓީގެ ކޯރަމް ހަމަވުމަށް ބޭނުންވާ ޤާނޫނީ އަދަދަކީ 29 މެންބަރުންނެވެ.
ކުނި މެނޭޖްކުރުމުގެ ޤާނޫނަށް ގެންނަ އިސްލާހާ މެދު ގޮތެއް ނިންމުމަށް މުޅި މަޖިލީހުގެ ކޮމިޓީ އަށް މި މައްސަލަ ފޮނުވަން ނިންމީ 16 އޮކްޓޯބަރު 2023ގައި ބޭއްވި މަޖިލީހުގެ ބައްދަލުވުމުގައެވެ. މި އިސްލާހު ހުށަހަޅާފައި ވަނީ ކުނި މެނޭޖްކުރުމުގެ ޤާނޫނުގައި ކުނި އެތެރެކުރުމާއި ގުޅޭގޮތުން ބަޔާންކުރާ އުސޫލުތައް ސަރުކާރުގެ ސިޔާސަތުތަކާއި އެއްގޮތް ކުރުމުގެ ގޮތުން، ދިވެހިރާއްޖެ އަށް ކުނި އެތެރެކުރުމަކީ މަނާކަމެއް ކަަމަށް ކަނޑައެޅުމަށް ޤަނޫނަށް ގެންނަން ޖެހޭ އިސްލާހުތައް ގެނައުމަށެވެ. އަދި އެކަމަށް ޓަކައި އިދާރާތަކާއި މުއައްސަސާތަކުން އަދާކުރާ ދައުރު ސާފުކުރުމަށް ވެސް މި އިސްލާހުގައި ހިމަނާފައިވެއެވެ. އެގޮތުން ޖުމްލަ 16 އިސްލާހެއް އެ ޤާނޫނަށް ގެނައުމަށް ވަނީ ހުށަހަޅާފައެވެ.
ކޮމިޓީގައި މި ބިލާއި މެދު ބަހުސް ކުރީ 12:30 އާއި ހަމައަށް ވަގުތު އިތުުރުކޮށްގެންނެވެ. އެގޮތަށް ފާސްކުރީ 32 މެންބަރުންގެ ވޯޓާއި އެކުގައެވެ. ކޮމިޓީގައި ވާހަކަދެއްކެވި މެންބަރުން ވަނީ މި ބިލް ފާސްވުން މުހިންމުކަމަށް ފާހަގަކުރައްވާފައެވެ. އަދި ބައެއް މެންބަރުން ވަނީ މި ބިލް މިހާރު އޮތްގޮތަށް ފާސްކުރަން ފެންނަ ކަމަށް ވަކާލާތުކުރައްވާފައެވެ. ސަބަަބަކީ މި ބިލަކީ މެންބަރުން ވަރަށް ބޮޑަށް ދިރާސާކުރައްވާފައިވާ ބިލަކަށް ވުން ކަމަށް ވެސް ވިދާޅުވިއެވެ. ބައެއް މެންބަރުން ވަނީ މި ސަރުކާރުގެ ފިނޭންސް މިނިސްޓަރާއި އެންވަޔަރަމަންޓް މިނިސްޓަރު މަޖިލީހަށް ހާޒިރުކުރަން ފެނިވަޑައިގަންނަވާ ކަމަށް ވިދާޅުވެފައެވެ. އެހެންނަމަވެސް ކޮމިޓީގައި ވަކި ގޮތަކަށް ނިންމާފައެއް ނުވެއެވެ.
ބުދަ ދުވަހު ވެސް މުޅި މަޖިލީހުގެ ކޮމިޓީ ބައްދަލުވުމެއް އޮންނާނެއެވެ. އެގޮތުން މަޖިލީހުގެ ރައީސް އަސްލަމް ވަނީ މުޅި މަޖިލީހުގެ ކޮމިޓީން ބިލުގެ މަސައްކަތް ކުުރުމަށް ސަބް ކޮމިޓީ އެއް އެކުލަވާލެވިދާނެކަން ފާހަގަކުރައްވާފައެވެ.
