ހޮސްޕިޓަލްތަކަކީ ހަނގުރާމައިގެ މައިދާނެއް ނޫން: ޑަބްލިއުއެޗްއޯ

ހޮސްޕިޓަލްތަކަކީ ހަނގުރާމައިގެ މައިދާންތަކެއް ނޫން ކަމަށާއި، ޣައްޒާ ސިޓީގެ އައްޝިފާ ހޮސްޕިޓަލަށް އިސްރާއީލުގެ ހަނގުރާމަވެރިން ވަނުމަކީ އެއްގޮތަކަށްވެސް ބަލައިގަނެވޭނެ ކަމެއް ނޫން ކަމަށް ޑަބްލިއުއެޗްއޯގެ ޑިރެކްޓަރ ޖެނެރަލް ވިދާޅުވެއްޖެ އެވެ.

އެކްސްގައި އާންމު ކުރައްވާފައިވާ މީޑިއާ ބްރީފިންގައި ޑރ. ޓެޑްރޯސް އަދަނޮމް ގެބްރިޔޭސުސް ވިދާޅުވީ ހޮސްޕިޓަލްތަކަކީ ހަނގުރާމައިގެ މައިދާންތަކެއް ނޫން ކަމަށެވެ.

ޓެޑްރޯސް ވިދާޅުވީ ބައިނަލްއަގްވާމީ އިންސާނީ ގާނޫނުގެ ދަށުން ސިއްހީ ހިދުމަތްދޭ ތަންތަނާއި ސިއްހީ ހިދުމަތްތެރިންނާއި އެމްބިއުލާންސް އަދި ބަލި މީހުން ނަކީ ހަނގުރާމައިގެ ހުރިހާ އަމަލަކުން ރައްކާތެރިވާން ޖެހޭ ތަންތަން ކަމަށެވެ.

އިސްރާއީލުން ޣައްޒާގެ އާންމުންނާ ދެކޮޅަށް ހިންގާ ގަތުލުއާންމުތަކުގެ ބޭނުމަކީ ޣައްޒާއަކީ އެ ތަނުގެ އާންމު ރައްޔިތުންނަށް ދިރިނޫޅެވޭ ތަނަކަށް ހެދުންކަމަށް ވަނީ ބެލެވިފައެވެ. އިސްރާއީލުގެ ހަގީގީ ބޭނުމަކީ ހަމާސްއާ ހަނގުރާމަ ކޮށްގެން ހަމާސްގެ އަތްދަށުގައިވާ ޔަހޫދީ އަސީރުން މިނިވަންކުރުން ކަމަށް ވެސް މިހާރު ނުބެލެވެއެވެ.

އިސްރާއީލުން ޣައްޒާގެ އާންމުންނާ ދެކޮޅަށް ހިންގާ ގަތުލުއާންމުތަކުގައި މިހާތަނަށް 11،500 އަށް ވުރެ ގިނަ މީހުން ޝަހީދުކޮށްލާފައިވާއިރު މީގެ ތެރޭގައި ގިނައީ ކުޑަކުދިންނާއި އަންހެނުންނެވެ. ޔަހޫދީންގެ ހަމަލާތަކުގައި ޒަޚަމްކޮށްލާފައިވާ މީހުންގެ އަދަދު 30،000 އަށް އަރާއިރު ބޮމުގެ ހަމަލާތަކުގައި ވައްޓާލާފައިވާ އިމާރާތްތަކުގެ ދަށުވެފައި 3،000 އަށް ވުރެ ގިނަ މީހުން އެބަތިބި ކަމަށް ބެލެވެއެވެ.

ޣައްޒާއަށް އަރައިގަނެގެން އުޅޭ ޔަހޫދީ ބާރުތައް ވަނީ ހަމާސްގެ އަތްދަށުން އެއްވެސް އަސީރަކު މިނިވަންކުރުމުގައި ނާކާމިޔާބުވެފައެވެ. އަދި، ހަމާސްއާއި މުޖާހިދުންގެ އެހެން ޖަމާއަތްތަކުގެ ހަމަލާތަކުގައި ޔަހޫދީ ބާރުތަކުގެ 45 މީހަކު ވަނީ ފާއިތުވި ދެ ހަފުތާގައި މަރުވެފައެވެ.