ގަލްފުގެ ޤައުމުތަކާއި ޤަތަރާއި ދެމެދު އޮތް މައްސަލަތައް އަމިއްލައަށް ހައްލުކުރުމަށް، އދ ގެ ސަލާމަތީ މަޖިލީހުން ޤަތަރަށް އަންގައިފިއެވެ.

އދ ގެ ސަލާމަތީ މަޖިލީހުން ޤަތަރަށް މިފަދައިން އަންގާފައިވަނީ ޤަތަރުގެ ފޮރިން މިނިސްޓަރު ޝައިޚް މުޙައްމަދު ބިން ޢަބްދުއްރަޙުމާން އަލް ޡާނީ އެ މަޖިލީހާއި ބައްދަލުކުރައްވައި، ޤަތަރާއި ދެކޮޅަށް ޤަލްފުގެ ޤައުމުތަކުން އަޅާފައިވާ ފިޔަވަޅުތަކަށް ހައްލެއް ހޯދައިދިނުމަށް އެދުމުންނެވެ.

ޤަތަރުގެ އެދުމަށް ޖަވާބުދެއްވަމުން، އދ ގެ ސަލާމަތީ މަޖިލީހުގެ ރައީސް، ޗައިނާގެ އެމްބެސެޑަރު، ލިއު ޖީޔީ ވިދާޅުވީ، އެ މައްސަލަތައް ޙައްލުކުރެވޭނީ، މައްސަލައިގައި ހިމެނޭ ޤައުމުތައް އެކުގައި މަޝްވަރާކޮށް، އެކުގައި މަސައްކަތްކޮށްގެން ކަމަށެވެ. އަދި މި މައްސަލައިގައި އެ ނޫންގޮތެއް އޮތްކަމަށް ސަލާމަތީ މަޖިލީހަށް ޤަބޫލު ނުކުރެވޭ ކަމަށްވެސް އެމްބެސެޑަރު ލިއު ޖީޔީ ވިދާޅުވީއެވެ.

އެމަނިކުފާނު ވިދާޅުވީ، ކޮންމެ ގޮތަކުން ނަމަވެސް، ގަލްފުގެ ޤައުމުތަކުން މިހާރު އުފެދިފައިވާ މައްސަލަ ހައްލު ކޮށްފިނަމަ އެކަމަށް މަރުހަބާ ވިދާޅުވާނެ ކަމަށެވެ.

މީގެ އެއްމަސްދުވަސް ކުރިން، ޖޫން 5 ވަނަ ދުވަހު ސައުދީ އަރަބިއާ އާއި، އެ ޤައުމުގެ ނުފޫޒުގެ ދަށުގައިވާ ޤައުމުތަކަކުން ޤަތަރާއި ސިޔާސީ، އިޤުތިޞާދީ ގުޅުން ކަނޑާލައި، ޤަތަރައި ދެކޮޅަށް ވަނީ ދަތިކުރުމުގެ ފިޔަވަލު އަޅާފައެވެ.