ގަތަރަށް ކޮށްފައިވާ ޑިމާންޑްތައް ބަލައެއް ނުގަނެވޭ، އެއީ ހެއްކެއްގެ މައްޗަށް ބިނާވެފައި ޑިމާންޑްތަކެއް ނޫން: ގަތަރުގެ ޚާރިޖީ ވަޒީރު
28 ޖޫން 2017 | ބުދަ 09:09ގަތަރުގެ ޚާރިޖީ ވަޒީރު މިހެން ވިދާޅުވީ އަންގާރަ ދުވަހު އެމެރިކާގެ ޚާރިޖީ ވަޒީރާ އެމެރިކާގައި ބައްދަލު ކުރެއްވުމަށް ފަހު
ގަތަރުގެ ޚާރިޖީ ވަޒީރު ޝެއިޚް މުހަންމަދު ބިން އަބްދުލްރަހްމާން އަލް ސާނީ (ވ) އާއި އެމެރިކާގެ ޚާރިޖީ ވަޒީރު ރެކްސް ޓިލާސަން
ގަތަރާ އެކު ގުޅުން ކަނޑާލާފައިވާ އަރަބި ހަަތަރު ގައުމަކުން ދާދިފަހުން ގަތަރަށް ކޮށްފައިވާ ޑިމާންޑުތަކަކީ ބަލައިގަނެވޭނެ ކަމެއް ނޫން ކަމަށާއި އެމެރިކާ ވެސް ދެކޭ ގޮތަށް ގަލްފުގެ މައްސަލަ ހައްލު ކުރުމަށްޓަކައި ބޭނުން ވަނީ "ބުއްދިއަށް ގަބޫލު ކުރެވޭފަދަ" ހައްލެއް ކަމަށް ގަތަރުން ބުނެފިއެވެ.
ގަތަރުގެ ޚާރިޖީ ވަޒީރު ޝެއިޚް މުހަންމަދު ބިން އަބްދުލްރަހްމާން އަލް ސާނީ އާއި އެމެރިކާގެ ޚާރިޖީ ވަޒީރު ރެކްސް ޓިލާސަން އަންގާރަ ދުވަހު ވޮޝިންޓަން ޑީސީގައި ބައްދަލު ކުރެއްވުމަށްފަހު މިހެން ވިދާޅުވިއިރު އަންގާރަ ދުވަހު ސައުދީ އަރަބިއްޔާގެ ފޮރިން މިނިސްޓަރު ވިދާޅުވެފައި ވަނީ ގަތަރު "ޓެރަރިޒަމަށް" ވާގިވެރިވާ ވުން ހުއްޓާލުމަށް ކުރާ ޑިމާންޑާ މެދު މަޝްވަރާ ކުރުމެއް ނޯންނާނެ ކަމަށެވެ.
އަންގާރަ ދުވަހު ވޮޝިންޓަން ޑީސީގައި ޓިލާސަންއާ ބައްދަލު ކުރެއްވުމަށް ފަހު ސާނީ ވިދާޅުވީ ގަތަރަށް ފިއްތުންތައް ކުރިމަތިކޮށްފައިވާ ގައުމުތަކުން ހުށަހަޅާފައިވާ ހުށަހެޅުންތަކަކީ އެއްވެސް ހެއްކެއްގެ މައްޗަށް ބިނާވެފައިވާ ބުނުންތަކެއް ނޫން ކަމަށާއި އެހެން ކަމުން އެއީ ޑިމާންޑްތަކެއް ނޫން ކަމަށެވެ. މަޝްވަރާތަކަށް ބޭނުން ވަނީ ހަގީގަތުގައި ވެސް އަނެއް ފަރާތުން ބޭނުންވުން ކަމަށާއި އަދި ކޮށްފައިވާ ޑިމާންޑްތަކަށް ބާރުދޭ ހެކި ހުންނަން ޖެހޭނެ ކަމަށް ވިދާޅުވިއެވެ. އަދި ކޮށްފައިވާ ޑިމާންޑްތަކަކީ ހަގީގީ އަދި ތަންފީޒު ކުރެވޭނެ ޑިމާންޑްތަކަކަށް ވާން ޖެހޭނެ ކަމަށާއި މި ކަންކަމަށް ނުފެތޭ ކޮންމެ ޑިމާންޑަކީ ގަބޫލު ކުރެވޭނެ އެއްޗެއް ނޫން ކަމަށެވެ. އަދި އެމެރިކާ އިން ބުނާ ފަދައިން "ބުއްދިއަށް ގަބޫލު ކުރެވޭފަދަ" ޑިމާންޑްތަކަކަށް، ޑިމާންޑްތައް ވާން ޖެހޭނެ ކަމަށް ގަބޫލު ކުރައްވާ ކަމަށް ވެސް އަލް ސާނީ ވިދާޅުވެފައި ވެއެވެ.
ސައުދީ އަރަބިއާ އިސްވެ އޮވެ، ގަތަރު އެކަހެރިކޮށް، ގަތަރަށް އެކި ކަހަލަ ދަތިކުރުމުގެ ފިޔަވަޅުތައް އަޅާފައިވާ މައްސަލަ ހައްލުކުރުމަށް ކުވެއިތު މެދުވެރިކޮށް، ގަތަރަށް ހުށަހަޅާފައިވަނީ ހަމަނުޖެހޭ 13 ޝަރުތު ކަމަށް ގަތަރުންވަނީ ކުރިން ބުނެފައެވެ. ގަތަރަށް ކޮށްފައިވާ ޑިމާންޑްތައް ނުވަތަ ޝަރުތުތަކުގެތެރޭގައި އަލްޖަޒީރާ މީޑިއާ ނެޓްވާކް ބަންދުކުރުމާއި، ގަތަރުގައި ހުރި ތުރުކީގެ އަސްކަރީ ބޭސް ބަންދު ކުރުމާއި އަދި އިރާނާއި ގުޅުން ކަނޑާލުން ހިމެނެއެވެ.
ގަތަރުން ޓެރަރިޒަމަށް ހިތްވަރު ދޭ ކަމަށް ބުނެ ގަތަރާ އޮންނަ ޑިޕްލޮމިޓިކް ގުޅުން އަރަބި ހަ ގައުމަކުން ކަނޑާލާފައިވާއިރު އެގައުމުތަކަކީ ސައުދީ އަރަބިއްޔާ، ޔޫއޭއީ، މިސްރު، ބަހްރައިން, ޔަމަން އަދި ލީބިޔާ އެވެ. ގަތަރާ މެދު ކުރެވޭ އެންމެހާ ތުހުމަތުތައް ގަތަރުން ދޮގު ކުރެއެވެ.ސައުދީ، ޔޫއޭއީ ބަހްރައިން އިން އިން ވަނީ ގަތަރާ އޮންނަ ޑިޕްލޮމެޓިކް ގުޅުން ކަނޑާލުމުގެ އިތުރަށް އެގައުމުތަކުގެ ވައި، ކަނޑު އަދި އެއްގަމު މަގުވެސް ގަަތަރަށް ބަންދުކޮށްފައެވެ.
