ޕީޕީއެމްގެ އެއްވެސް މެންބަރެއް ޕީއެންސީއަށް ސޮއިކުރާކަށް ނުޖެހޭނެ: ޔާމީން

ޕޮރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ އެއްވެސް މެންބަރެއް ޕީޕަލްސް ނޭޝަނަލް ކޮންގްރެސް (ޕީއެންސީ)އަށް ސޮއިކުރަން ނުޖެހޭނެ ކަަމަށް ކުރީގެ ރައީސް އަދި ޕީޕީއެމްގެ ރައީސް އަބްދުﷲ ޔާމީން ވިދާޅުވެއްޖެއެވެ.

ވ. އާރަށު ޚިޔާނާތުގެ މައްސަލައިގައި ރިޝްވަތު ނެންގެވުމާއި އެ ފައިސާ ލޯންޑަރ ކުރެއްވުމުގެ ކުށް ކުރީގެ ރައީސް ޔާމީނުގެ މައްޗަށް ވަނީ ސާބިތުވެފައެވެ. އެ މައްސަލައިގައި އެމަނިކުފާނުގެ މައްޗަށް ކްރިމިނަލް ކޯޓުން 11 އަހަރުގެ ޖަލު ހުކުމެއް އިއްވާފައިވަނީ ނިމިދިޔަ 2022 ވަނަ އަހަރުގެ ޑިސެމްބަރު މަހުގެ 25 ވަނަ ދުވަހުއެވެ. އެމަނިކުފާނު 01 އޮކްޓޫބަރު 2023 ވީ އާދިއްތަ ދުވަހު ވަނީ ގޭބަންދަށް ބަދަލުކޮށްފައެވެ. އަދި މިދިޔަ ހޮނިހިރު ދުވަހު ޔާމީނަށް ކަރެކްޝަނަލް ސާވިސް އިން ބޭސްފަރުވާއަށް އިތުރު ލުޔެއް ހަމަޖައްސައިދިނުމާއެކު އާދިއްތަ ދުވަހުގެ ރޭ ވަނީ ޕީޕީއެމްގެ އޮފީހަށް ވަޑައިގެން ސަޕޯޓަރުންނާ ބައްދަލުކުރައްވާފައެވެ.

Advertisement

މި ބައްދަލުކުރެއްވުމާއި ގުޅޭގޮތުން ޔާމީންގެ ގާނޫނީ ވަކީލް، ކުރީގެ ނައިބު ރައީސް ޑރ. މުހައްމަދު ޖަމީލު ވިދާޅުވީ ޔާމީނަކީ ދިވެހިރާއްޖޭގެ ސިޔާސީ މަސްރަހުގެ ރަސްގެފާނު ކަމަށެވެ. ޔާމީންއާ ހަވާލާ ދެއްވައި ޖަމީލު ވިދާޅުވީ ޕީޕީއެމަކީ އެންމެ ވަރުގަދަ ސިޔާސީ ޕާޓީ ކަމަށާއި، ޕާޓީގެ އަމާޒަކަށްވާންވާނީ ޒުވާން ޖީލަށް ޕާޓީގެ ސިޔާސަތު ކިޔައިދީ މި ފިކުރު ވިއްކުން ކަމަށެވެ. ޕާޓީގެ އެއްވެސް މެންބަރަކު އެހެން ޕާޓީއަކަށް ނުވަތަ ޕީއެންސީއަށް ފޯމުފުރަން ނުޖެހޭ ކަމަށާއި އެއީ އެއްފިކުރެއްގެ ދެ ޕާޓީ ކަމަށެވެ.

ކުރިއަށް އޮތް ރައްޔިތުން މަޖިލީހުގެ އިންތިޚާބަށް އިޝާރާތް ކުރައްވައި، މަޖިލީހުގެ އިންތިޚާބު ކާމިޔާބު ކުރަން ވަރަށް މަސައްކަތް ކުރަންޖެހޭ ކަމަށް ޔާމީން އެދިވަޑައިގެންނެވި ކަމަށް ޖަމީލު ވިދާޅުވިއެވެ.

ޔާމީނާ ހަވާލާ ދެއްވައި ޖަމީލް ވިދާޅުވީ ޕީޕީއެމްގެ ސިޔާސަތާއި ފަލްސަފާ ނުވިއްކެންވީ ސަބަބެއް ނެތް ކަމަށެވެ.

އާދިއްތަ ދުވަހުގެ ރޭ ޕީޕީއެމްގެ މެންބަރުންނާއި ޔާމީން ބައްދަލުކުރެއްވި އިރު، އިންތިޚާބީ ރައީސް ޑރ. މުހައްމަދު މުއިއްޒާއި ދެ ޕާޓީގެ ލީޑާޝިޕްގެ ބޭފުޅުން އެ ބައްދަލުވުމުގައި ބައިވެރިވެވަޑައިގެންފައެއް ނުވެއެވެ.