ޔޫތް ޗެމްޕިއަންޝިޕްގެ ޗެމްޕިއަންކަން ކުނަހަންދޫ ޓީމް ހޯދައިފި

ޓީ20 ޔޫތް ޗެމްޕިއަންޝިޕް އަންހެން ޑިވިޝަންގެ ޗެމްޕިއަންކަން ލ.ކުނަހަންދޫ ކްރިކެޓް ޓީމުން ހޯދައިފިއެވެ.

މާލޭގައި ކުރިއަށްގެންދިޔަ މުބާރާތުގެ ޗެމްޕިއަންކަން ކުނަހަންދޫ ޓީމުން ހޯދީ ފައިނަލުގައި ފުވައްމުލައް ސިޓީ ޓީމާ ވާދަކޮށް 36 ލަނޑުން މެޗު ކާމިޔާބުކޮށްގެންނެވެ. ކުނަހަންދޫ ޓީމުން ވަނީ 20 އޯވަރުގެ ތެރޭގައި ފަސް ކުޅުންތެރިން ނުބައިވިއިރު 125 ލަނޑު ހަދާފައެވެ. ފުވައްމުލަކު ޓީމްގެ 20 އޯވަރުގެ ތެރޭގައި 7 ކުޅުންތެރިން ނުބައިވިއިރު ހެދުނީ 89 ލަނޑެވެ. ކުނަހަންދޫ ޓީމުން އެންމެ ރަނގަޅަށް ކުޅުނީ ނުބައިނުވެ 61 ބޯޅައިން 76 ލަނޑު ހެދި ސުމައްޔާ ހަމީދު އެވެ. ފުވައްމުލައް ސިޓީން އެންމެ ރަނގަޅަށް ކުޅުނީ 16 ލަނޑު ހެދި އައިޝަތު އައިމާއެވެ. މިއީ ކުނަހަންދޫން ވިދިވިދިގެން މުބާރާތް ކާމިޔާބުކުރި ތިންވަނަ ފަހަރެވެ. 2018 އަދި 2019 ވަނަ އަހަރުވެސް މުބާރާތް ކާމިޔާބުކުރީ ކުނަހަންދުއެވެ.

މުބާރާތުގައި ކުނަހަންދޫއާއި ފުވައްމުލައް ސިޓީގެ އިތުރުން ވާދަކުރީ މާލެ ސިޓީގެ ޓީމެވެ.