ރާއްޖޭގެ ގައުމީ ފުޓްބޯޅަ ޓީމުގެ ކޯޗު ޑަރެން ސްޓެވާޓް ސިޑިން ވެއްޓި އަނިޔާވެގެން އޭޑީކޭގައި ފަރުވާ ދިނުމަށްފަހު ދޫކޮށްލައިފިއެވެ.
ރާއްޖެ އެމްވީއަށް މައުލޫމާތު ދެއްވުމުން އެފްއޭއެމްގެ ޖެނެރަލް ސެކްރެޓަރީ ހުސައިން ޖަވާޒް ވިދާޅުވީ ކޯޗަށް އަނިޔާވެފައި ވަނީ ބުދަ ދުވަހުގެ މެންދުރު އޭނާ މާލެ އައިސް ފްލައިޓުން ފައިބަނިކޮށް ސިޑިން ވެއްޓިގެން ކަމަށެވެ.
އެހެން ނަމަވެސް މާބޮޑު ސީރިއަސް އަނިޔާއެއް ކޯޗަށް ލިބިފައި ނުވާ ކަމަށާއި އޭޑީކޭ ހޮސްޕިޓަލްގައި ފަރުވާ ދިނުމަށްފަހު މިހާރު ކޯޗު ދޫކޮށްލަފައިވާ ކަމަށެވެ.
" ކޯޗުގެ މަތީ ތުންފަތް ކައިރުން ފަޅައިގެން ގޮސްފައިވާތަން ފެހުމަށްފަހު މިހާރު ވަނީ ދޫކޮށްލާފައި" ޖަވާޒް ބުންޏެވެ.
ކޯޗަށް އަނިޔާވެފައިވާއިރު، މިއަހަރަކީ ގައުމީ ޓީމަށް ވަރަށް ވެސް މުހިންމު މުބާރާތްތަކެއް އޮތް އަހަރެކެވެ. އެގޮތުން ސާފް ޗެމްޕިއަންޝިޕް ފުޓްބޯޅަ މުބާރާތަށާއި އޭޝިއަން ކަޕް ކޮލިފައިންގް އަށް ޓީމް އެކުލަވާލާ ފަރިތަކުންތައް މާލަސްތަކެއް ނުވެ ފަށާނެ ކަމަށް އެފްއޭއެމް އިން ވަނީ ބުނެފައެވެ.
ކޯޗް ސްޓެވާޓް މީގެ ކުރިން ގައުމީ ޓީމާއި ހަވާލުވެފައިވަނީ އޭޝިއަން ކަޕްގެ ކޮލިފައިންގެ ޕްލޭއޮފްގައި މިދިޔަ އަހަރު ލާއޯސް އާއި ދެކޮޅަށް ކުޅުނު ދެ މެޗަށެވެ. އެގޮތުން ލާއޯސްއާ ދެކޮޅަށް ކުޅުނު މެޗް 0-4 ގެ ނަތީޖާއަކުން ރާއްޖެ މޮޅު ވެފައިވާއިރު، ދެވަނަ މެޗް ނިމިފައިވަނީ އެއްވަރުވެގެންނެވެ. މީގެ އިތުރުންވެސް އޭނާގެ އިރުޝާދުގެ ދަށުން ބަންގްލަދޭޝް އާއި ދެކޮޅަށް މިދިޔަ އަހަރު ކުޅުނު އެކުވެރިކަމުގެ މެޗް ރާއްޖެ އިން ކާމިޔާބުކޮށްފައިވަނީ 5-0 ލަނޑުގެ ނަތީޖާ އަކުންނެވެ.
ލާއޯސް އަތުން މޮޅުވުމާއެކު ރާއްޖެ އޭއެފްސީ އޭޝިއަން ކަޕް ކޮލިފައިވެފައިވާއިރު، މުބާރާތުގެ ގްރޫޕް ސްޓޭޖުގައި ރާއްޖެ ކުޅޭ ފުރަތަމަ މެޗުގައި އަންނަ މާޗް މަހުގެ 28 ވަނަ ދުވަހު ނުކުންނާނީ ފަލަސްތީނާ ދެކޮޅަށެވެ. މިމެޗް ކުޅުމަށް ހަމަޖެހިފައި ވަނީ ރާއްޖޭގައެވެ.
