ޔަހޫދީ ދައުލަތުން ދިން ވައިގެ އިތުރު ހަމަލާ ތަކެއްގައި ޣައްޒާގެ ގިނަ އަދަދެއްގެ އަންހެނުންނާއި ކުޑަކުދިންތަކެއް ޝަހީދުކޮށްލައިފިއެވެ.
އަލްޖަޒީރާއިން ބުނެފައިވާގޮތުގައި، ޣައްޒާއަށް އަމާޒުކޮށް ދިން ވައިގެ ހަމަލާ ތަކުގައި 54 މީހުން ޝަހީދުކޮށްލާފައިވާ ކަމަށާއި، އޭގެ ތެރޭގައި ކުޑަކުދިންނާއި އަންހެނުން ވެސް ހިމެނޭ ކަމަށެވެ.
ސިއްހީ އިދާރާއަކާއި ހަވާލާދީ އަލްޖަޒީރާއިން ބުނެފައިވަނީ އިސްރާއިލުން ދިން ހަމަލާ އަމާޒުކޮށްފައި ވަނީ ޣައްޒާގެ ދެކުނުގައި ހުރި ގެއަކަށް ކަމަށެވެ. ނަމަވެސް ގެއްލުން ލިބުނީ ޣައްޒާގެ ދެކުނުގެ ކޮން ހިސާބަކަށް ކަމެއް ސާފެއް ނުވެއެވެ. މީގެ ކުރިން ޚާން ޔޫނިސް އާއި ރަފާހް ސަރަހައްދުގައި ހުއްޓުމެއް ނެތި ބޮން އަޅާފައިވާ ކަމަށް އަލްޖަޒީރާގައި ވަނީ ރިޕޯޓްކޮށްފައެވެ.
ހަމަލާތަކުގައި ގިނަ އަދަދެއްގެ ބަޔަކަށް އަނިޔާވެފައިވާ ކަމަށް ވެސް މީޑިއާތަކުގައި ވަނީ ރިޕޯޓްކޮށްފައެވެ.
ފަލަސްތީން-އިސްރާއިލް ހަނގުރާމައިގެ އެންމެ ފަހުގެ މައުލޫމާތުތަކަށް ބަލާއިރު، މިހާތަނަށް 2800ށް ވުރެ ގިނަ ޣައްޒާގެ ރައްޔިތުން ވަނީ ޝަހީދުކޮށްލާފައެވެ.
އިސްރާއީލުން ހުއްޓުމެއް ނެތި ބޮން އަޅަމުންދާއިރު، އިތުރު އެތައް ސަތޭކަ ބަޔަކު ޝަހީދުވެ، ބަންދުކުރެވިފައިވާ ޣައްޒާގައި ބާކީ އޮތީ އެންމެ "24 ގަޑިއިރުގެ ފެނާއި ކަރަންޓާއި ތެޔޮ" ކަމަށް ދުނިޔޭގެ ސިއްހަތު ޖަމިއްޔާއިން ވަނީ އިންޒާރު ދީފައެވެ.
އަނެއްކޮޅުން، އިސްރާއިލުން ވަނީ ޣައްޒާ ވަށައިގެން އެތައްހާސް ސިފައިން ރުކުރުވާލާފައެވެ. އަދި އެއްގަމު މަގުން ޣައްޒާއަށް ކޮންމެ ވަގުތެއްގައި ވެސް ވަދެގަނެ،ހަމަލާތައް ދޭންފަށާފާނެ ކަމަށް ބެލެވޭ ކަމަށް މީޑިއާތަކުން ވަނީ ރިޕޯޓްކޮށްފައެވެ.
