ސީރިއާގެ އަސްކަރީ ވައިގެ މަރުކަޒަކަށް އެމެރިކާ އިން ހަމަލާދީފި

ސީރިއާގެ އިދްލީބަށް ދިން ކެމިކަލް ހަތިޔާރުގެ ރައްދެއްގެ ގޮތުން އެ ސަރަހައްދުގެ މައި އަސްކަރީ އެއާބޭހަށް އެމެރިކާގެ މަނަވަރުތަކުން މިސައިލް ހަމަލާތައް ދީ ވަރަށް ބޮޑަށް ސުންނާފަތި ކޮށްލައިފިއެވެ.

ރިޕޯޓްތައް ބުނާ ގޮތުން އެމެރިކާގެ ރައީސް ޑޮނާލްޑް ޓްރަމްޕްގެ އަމުރަށް މިހާތަނަށް 59 ޓޮމްހޯކް ކްރޫސް މިސައިލް ފޮނުވާލާފައި ވެއެވެ. ސީރިއާ އިން ބުނާ ގޮތުގައި އެމެރިކާގެ މި ހަމަލާގައި ހަ މީހަކު ވަނީ މަރުވެފައެވެ. ޕެންޓަގަނުން ބުނީ މިއީ ސީދާ އަސްކަރީ މަރުކަޒަށް ދިން ހަމަލާއެއް ކަމުން އާންމުންނަށް ގެއްލުމެއް ނުލިބޭނެ ކަމަށެވެ.

މީގެ ކުރިން މެދުއިރުމަތީގެ ހަމަނުޖެހުންތަކާ ވީހާ ވެސް ދުރުގައި ތިބުމުގެ ސިޔާސަތެއް ގެންގުޅުއްވި އަދި އެކަމަށް ވަކާލާތުކުރެއްވި ޓްރަމްޕް ކުއްލި ގޮތަކަށް ނުރުހުންވެ ވަޑައިގެންނެވީ އިދްލީބްގެ ސަރަހައްދަކަށް ސީރިއާ ސަރުކާރުގެ ސިފައިން ދިން ކެމިކަލް ހަމަލާއެއްގައި 100 އަށް ވުރެ ގިނަ މީހުން މަރުވުމުންނެވެ. އަދި ކުޑަކުދިން މަރަށް ތެޅެމުން ދިޔަ މަންޒަރުތައް މީޑިއާގައި އާންމުވުމާ އެކު ޓްރަމްޕް ވަނީ އެކަން ވަރަށް ބޮޑަށް ކުށްވެރިކުރައްވައި ކޯފާ އިސްކުރައްވާފައެވެ. އަދި މި ހަމަނުޖެހުން ނިމުމަކަށް ގެނައުމަށް ގައުމުތަކަށް ޓްރަމްޕް ގޮވާލެއްވިއެވެ.

ކެމިކަލް ހަމަލާ ދިން ކަމަށް އެކި ގައުމުތަކުން ތުހުމަތުކުރަމުންދާ އިރު ސީރިއާ ސަރުކާރުން ބުނީ އެފަދަ ހަމަލާއެއް ނުދޭ ކަމަށާއި އަދި ކެމިކަލް ހަތިޔާރު ދުވަހަކު ވެސް ބޭނުން ނުކުރާނެ ކަމަށެވެ.

މިއީ ސީރިއާގެ ހަނގުރާމައިގައި އެމެރިކާ އިން ސީދާ ގޮތެއްގައި ދިން ފުރަތަމަ ހަމަލާއެވެ. މީގެ ކުރިން އެމެރިކާ ސަރުކާރުން ގެންދިޔައީ އެހެން ގޮތްގޮތުން އެހީތެރިކަން ފޯރުކޮށްދެމުންނެވެ.

ބައެއް ރިޕޯޓްތައް ބުނާ ގޮތުން އެމެރިކާގެ ހަމަލާއަށް ފަހު ދެ ވަނަ ކެމިކަލް ހަމަލާއެއް އިދްލީބަށް ވަނީ އަމާޒުވެފައެވެ. ނަމަވެސް އެކަމުގެ ރަސްމީ އެއްވެސް މައުލޫމާތެއް މިހާތަނަށް ލިބިފައެއް ނުވެއެވެ.