ކާބުލްގައި ހުންނަ އެންމެ ބޮޑު އަސްކަރީ ހޮސްޕިޓަލަށް ދިން ހަމަލާއެއްގައި 30 އަށްވުރެ ގިނަ މަރު

އަފްގާނިސްތާނުގެ ވެރިރަށް ކާބުލްގައި ހުންނަ އެންމެ ބޮޑު އަސްކަރީ ހޮސްޕިޓަލަށް ބުދަދުވަހު ހަތިޔާރު އަޅައިގެން ތިބި ބަޔަކު ވަދެ ހަމަލާދީ 30 މީހުންނަށްވުރެ ގިނަ މީހުން މަރާލައިފިއެވެ.

ޑޮކްޓަރުންގެ ޔުނިފޯމުގައި ތިބި ބަޔަކު ބަޑި އާއި ގްރެނޭޑް ހިފައިގެން އެންމެ ފުރަތަމަ ހޮސްޕިޓަލުގެ ގޭޓަށް ގޮވާތަކެތިން ހަމަލާދިނެވެ. އަދި އެއަށްފަހު ހަތިޔާރު އަޅައިގެން ތިބި މީހުން ހޮސްޕިޓަލްގެ ތެރެއަށް ވަދެ ސްޓާފުންނާއި އަދި ބަލި މީހުންގެ ގަޔަށް ބަޑިޖަހަން ފެށިއެވެ.

މިހާދިސާގައި 50 މީހުންނަށްވުރެ ގިނަ މީހުން ޒަޚަމްވިއެވެ.

އެހެންނަމަވެސް އެތައް ގަޑިއިރެއްގެ މަސައްކަތުން، އަފްގާން އަސްކަރިއްޔާ އިން ހަތިޔާރު އެޅި މީހުންނާ ހަމަލާ ބަދަލުކޮށް، ހޮސްޕިޓާ އަސްކަރިއްޔާގެ ކޮންޓްރޯލްގެ ދަށަށް ގެނައެވެ. އަދި ހޮސްޕިޓަލަށް ހަމަލާ ދިން ހަތިޔާރު އެޅި މީހުން އަސްކަރިއްޔާ އިން މަރާލިއެވެ.

ކާބުލްގެ އެންމެ ބޮޑު އަސްކަރީ ހޮސްޕިޓަލަށް ދިން ހަމަލާގެ ޒިންމާ އިސްލާމިކް ސްޓޭޓް (އައިއެސް) އިން އުފުލާފައިވާއިރު، ތާލިބާނުން ބުނެފައިވަނީ ތާލިބާނުންގެ އެއްވެސް ބައިވެރިވުމެއް ހަމަލާގައި ނޯންނާނެ ކަމަށެވެ.

ހަމަލާ އާއި ގުޅިގެން އަފްގާނިސްތާނުގެ ރައީސް އަޝްރަފް ޣަނީ ވިދާޅުވީ، 400 އެދުގެ ހޮސްޕިޓަލަށް ދިން ހަމަލާ އަކީ "އިންސާނީ އަގުތަށް ހަލާކުކޮށްލުން ކަމަށާއި، ހުރިހާ ދީނެއްގައިވެސް ހޮސްޕިޓާ ފަދަ ތަންތަނަށް ހަމަލާ ދިނުމަކީ އޮންނަ ކަމެއް ނޫން ކަމަށާއި، ހޮސްޕިޓަލަށް ހަމަލާ ދިނުމަކީ މުޅި އަފްގާނިސްތާނަށް ހަމަލާ ދިނުން ކަމަށެވެ."