ކުޅިވަރަކީ އަންހެން ކުދިންނަށް އޮތް ކަމެއް ނޫން ކަމަށް ބުނަމުން ދާ ބަޔަކަށް ގޮންޖެހުމުގައި ލަމާ ދެމި ހުރީ ސާބިތުކަމާއެކު!

ފަލަސްޠީނުގެ ޣައްޒާއަށް އުފަން، ޢުމުރުން 21 އަހަރުގެ ލަމާ އަލް-މަޞްރީ ދެކެމުން ދަނީ ހަމަ އެންމެ ހުވަފެނެކެވެ. ބޭސްބޯލްގެ ރޮނގުން މަޝްހޫރު ކުޅުންތެރިއަކަށްވެ، ބައިނަލްއަޤުވާމީ ފެންވަރުގައި ވާދަ ކުރުމަކީ، އެ ޒުވާން އެތުލީޓު ދެކެމުންދާ ހަމަ އެކަނި ހުވަފެނެވެ.

މިދިޔަ 12 އަހަރެއްހާ ދުވަހުގެ ތެރޭގައި ޣައްޒާގައި ބޭއްވި ކުޅިވަރުގެ އެކިއެކި މުބާރާތްތަކުން ލަމާ ވަނީ އެތައް މެޑަލްއެއް ހޯދާފައެވެ. ފަލަސްޠީނުގެ ބޭސްބޯލް5 ޓީމުގެ ކެޕްޓަން ޢަމާޒު ހިފާފައި ހުރީ، އޭނާގެ މެޑަލް ހަރުގަނޑަށް، ބައިނަލްއަޤުވާމީ ސިއްކަ ޖެހި މެޑަލްތައްވެސް އިތުރު ކުރުމަށެވެ.

ޣައްޒާގެ އާދާކާދަ އޮންނަ ގޮތުން، ކުޅިވަރުގެ މައިދާނުގައި ނަގާ ކިޔަމުން ދަނީ ފިރިހެނުންނެވެ. އަންހެން އެތުލީޓުންނަށް ތަފާތު އެކި ކަހަލަ ހުރަސްތަކާއި ގޮންޖެހުންތަކާ ކުރިމަތިލާން ޖެހެއެވެ. ތަމްރީނުތައް ކުރިއަށް ގެންދާނެ ތަންތަން ނުލިބުމާއި، ވަޞީލަތްތަކުގެ މަދު ކަމާއި، ފަންޑުގެ ދަތިކަމަކީ ޣައްޒާގެ އަންހެން އެތުލީޓުންނަށް ކުރިމަތިލާން ޖެހޭ ބައެއް ގޮންޖެހުންތަކެވެ. ކަން އެހެން އޮތް ނަމަވެސް، ފުޓުބޯޅަ، ބާސްކެޓްބޯޅަ، ބޭސްބޯލް އަދި ބޮކްސިންގްގައި ބައިވެރިވާ އަންހެނުންގެ ޢަދަދު ދަނީ އިތުރު ވަމުން ކަމަށް ޕަލަސްޓީނިއަން ފެޑަރޭޝަން އޮފް ބޭސްބޯލް އެންޑް ސޮފްޓްބޯލްގެ ރެކޯޑްތަކުން ދައްކައެވެ.

ޣައްޒާއަށް އެންމެ ފުރަތަމަ ބޭސްބޯލް ތަޢާރަފު ވެގެން ދިޔައީ 2017 ވަނަ އަހަރުގެ ތެރޭގައެވެ. އެކަމުގައި އިސްކޮށް ހުރީ ޣައްޒާއަށް ނިސްބަތްވާ ކޯޗެކެވެ. އޭނާ ވަނީ ޣައްޒާގެ ފުރަތަމަ އަންހެން ޓީމުވެސް އެކުލަވާލާފައެވެ. ޣައްޒާގެ އަންހެން ޓީމުން ބޭސްބޯލް5 ކުޅެން ފެށީ ދާދިފަހުންނެވެ. ބޭސްބޯލް5 އަކީ އެތައް ޒަމާނެއް ވަންދެން ޣައްޒާގެ މަގުތަކުގައި ކުޅެމުން ދިޔަ ކުޅިވަރެއްގެ ޒަމާނީ ވާޜަންއެއް ކަމަށް ލަމާ ސިފަ ކުރިއެވެ.

ބޭސްބޯލް5 ނުވަތަ ބީ5 އަކީ ޒަމާނުއްސުރެ ދުނިޔޭގެ އެކި ކަންކޮޅުތަކުގައި ކުޅެމުން އަންނަ ބޭސްބޯލްއާއި ސޮފްޓްބޯލް ގޭމްތަކުގެ އަޕްޑޭޓްއެކޭވެސް ބުނެވިދާނެއެވެ. 5 އިނިންގްސް ކުޅޭ ބީ5 މެޗެއްގައި ކުޅޭ ކޮންމެ ޓީމެއްގައި ހިމެނޭނީވެސް 5 ކުޅުންތެރިންނެވެ.