އެމެރިކާއާއެކު ޔޫކްރޭނުން ހަތިޔާރު އުފެއްދުމުގެ މަސައްކަތް ފަށާނެ ކަމަށް ޒެލެންސްކީ ވިދާޅުވެއްޖެއެވެ.
ޔޫކްރޭނާއި އެމެރިކާ ގުޅިގެން ހަތިޔާރު އުފައްދަން ފެށުމަށް އެއްބަސްވެފައިވަނީ ކިއެވްގައި ވައިގެ ދިފާއީ ނިޒާމުތައް އުފައްދަން ފެށޭނެ ފިޔަވަޅެއްގެ ގޮތުން ކަމަށް ރައީސް ޒެލެންސްކީ ހާމަކުރައްވާފައިވަނީ އެމެރިކާއަށް ކުރެއްވި ދަތުރުފުޅު ނިންމަވާލައްވާ ދެއްވި ތަގުރީރުގައެވެ.
ޒެލެންސްކީ ވިދާޅުވީ ދިގު މުއްދަތުގެ އެއްބަސްވުމުގެ ސަބަބުން ރަޝިޔާގެއަތްދަށުން އަރައި ގަނެވި، ހަނގުރާމައިގެ ސަބަބުން އިގްތިސާދު ފަނާވެފައިވާ ޔޫކްރޭނުގައި ވަޒީފާތަކާއި އާ ސިނާއީ މަރުކަޒެއް އުފެދިގެންދާނެ ކަމަށެވެ.
ޒެލެންސްކީ ވިދާޅުވީ އެމެރިކާގެ ދަތުރުފުޅަކީ ވަރަށް މުހިންމު ދަތުރުފުޅެއް ކަމަށާއި، އެ ދަތުރުފުޅުގައި ޔޫކްރޭނުން އެމެރިކާއާ އެކު ބޭނުންވާ ހަތިޔާރު އުފެއްދުމަށް ދިގުމުއްދަތުގެ އެއްބަސްވުމެއް ހަދާނެ ކަމަށެވެ.
ޔޫކްރޭނުން އަމިއްލަ ހަތިޔާރު އުފެއްދުން ވީހާވެސް އިތުރު ކުރުމަށް މަސައްކަތްތައް ކުރުމަށް ނިންމާފައިވަނީ ފާއިތުވެދިޔަ 19 މަސް ދުވަހުގެ ތެރޭގައި މުޅި ޔޫކްރޭނަށް ރަޝިޔާއިން ދިން ވައިގެ ހަމަލާތަކުގައި ބޮޑެތި ގެއްލުންތަކެއް ލިބި އެތައް ބަޔަކު މަރުވެފައި ވާތީއެވެ.
ޒެލެންސްކީ ވިދާޅުވީ ޔޫކްރޭންގައި ހަތިޔާރު އުފެއްދުން ބަލަހައްޓާ މިނިސްޓްރީ ފޯ ސްޓްރެޓެޖިކް އިންޑަސްޓްރީސް އިން ޔޫކްރޭނުގައި ކުރިއަށް އޮތްތަނުގައި ކުރެވިދާނެ މަސައްކަތްތަކާ ގުޅޭ ގޮތުން އެމެރިކާގެ 2،000ށް ވުރެ ގިނަ ޑިފެންސް ކުންފުންޏާއި ތިން ޖަމިއްޔާއަކާ އެކު އެއްބާރުލުމުގެ އެއްބަސްވުންތަކުގައި ސޮއިކޮށްފައިވާ ކަމަށެވެ.
