ސީރިޔާ ސަރުކާރުން ކެމިކަލް ހަތިޔާރު ބޭނުން ކުރާނަމަ އޭގެ ރައްދުގައި އެމެރިކާ އިން އާ ހަމަލާތަކެއް ދޭން ޖެހިދާނެ ކަމުގެ އިންޒާރު އެމެރިކާ ސަރުކާރުން ހޯމަ ދުވަހު ދީފިއެެވެ.

ވައިޓް ހައުސްގެ ތަރުޖަމާނު ޝޯން ސްޕައިސާ ވިދާޅުވީ ތުއްތު ކުދިންނަށް ގޭހުން ހަމަލާ ދޭނަމަ ނުވަތަ ރައްޔިތުންގެ ބޮލަށް ބޮން އަޅާނަަމަ ރައީސް ޑޮނަލްޑް ޓްރަމްޕްގެ ފަރާތުން އޭގެ ރައްދު ފެންނާނެ ކަމަށެވެ. އިތުރަށް ޝޯން ސްޕައިސާ ވިދާޅުވީ ރައީސް ބައްޝާރުލް އަސަދު ވެރިކަމުގައި ހުންނަވާހާ ހިނދަކު ސުލްހަވެރި ސީރިޔާއެއް ހިޔާލަށް ނުގެނެވޭ ކަމަށެވެ.

ސީރިޔާ ސަރުކާރުން ދިން ކެމިކަލް ހަމަލާއާއި ގުޅިގެން ރައްދުގައި އާ ހަމަލާތަކެއް ދޭން ޖެހިދާނެ ކަމުގެ އިންޒާރު އެމެރިކާ ސަރުކާރުން ދިން އިރު، ޖީ7 ގެ ފޮރިން މިނިސްޓަރުން ގެންދަވަނީ ސީރިޔާގެ އިދްލީބަށް ދިން ކެމިކަލް ހަމަލާއާއި ގުޅިގެން ކަންކުރާނެ ގޮތެއް ކަނޑައެޅުމަށް މަޝްވަރާ ކުރައްވަމުންނެވެ. އެ ބައްދަލުވުންތައް ބާއްވަނީ އިޓަލީގެ ލުކްކާގަ އެވެ.

ސީރިޔާގެ އިދްލީބަށް މި މަހުގެ 4 ވަނަ ދުވަހު ދިން ކެމިކަލް ހަމަލާ އާ ގުޅިގެން 80 އަށް ވުރެ ގިނަ މީހުން މަރުވެ 500 އަށް ވުރެ ގިނަ މީހުންނަށް ފަރުވާ ދޭން ޖެހުނެވެ. މިހަމަލާއާ ގުޅިގެން ބައިނަލްއަގްވާމީ މުޖުތަމައު އިން އިނގިލި ދިއްކުރަނީ ރައީސް ބައްޝާރުލް އަސަދުގެ ސަރުކާރަށެވެ. ނަމަވެސް އަސަދުގެ ސަރުކާރުން ބުނަމުން ދަނީ އެފަދަ ހަމަލާއެއް ނުދޭ ކަމަށެވެ.

ކެމިކަލް ހަމަލާގެ ރައްދުގައި ސީރިޔާގެ ވައިގެ ބޭސްއަށް 59 ކްރޫސް މިސައިލް ބޭނުންކޮށްގެން އެމެރިކާއިން ހަމަލާދީފައިވާއިރު، އެމެެރިކާގެ ޑިފެންސް ސެކްރެޓަރީ ޖޭމްސް މެޓިސް ވިދާޅުވީ އެމެރިކާއިން ދިން ހަމަލާގައި ސީރިޔާގައި އޮޕަރޭޓު ކުރާ ޖެޓުތަކުގެ 20 އިން ސައްތަ ހަލާކުވި ކަމަށެވެ.