ތޫފާން ޑެނިއަލްގައި ގިނަ އަދަދެއްގެ ބަޔަކު މަރުވީ ގޭގައި މަޑުކުރަން އެންގުމުގެ ސަބަބުންކަމަށް ކުރާ ތުހުމަތު، އޮފިޝަލުން ދޮގުކޮށްފި

ތޫފާން ޑެނިއަލްގައި ގިނަ އަދަދެއްގެ ބަޔަކު މަރުވީ ގޭގައި މަޑުކުރަން އެންގުމުގެ ސަބަބުން ކަމަށް ކުރާ ތުހުމަތު, ކާރިސާގައި ހަރަކާތްތެރިވި އޮފިޝަލުން ދޮގުކޮށްފިއެވެ.

ބޭރުގެ މީޑިއާތަކުގައި ރިޕޯޓުކޮށްފައިވާ ގޮތުގައި މިދިޔަ ހަފުތާ ބަންދުގައި ކުރިމަތިވި އުދައެރުމުގައި ކާރިސާގައި ގިނައަދަދެއްގެ އާއްމުން ވަނީ މަރުވެފައެވެ. އަދި ގިނަ ބަޔަކު ޒަޚަމްވެފައިވާއިރު، ބައެއް މީހުން ގެއްލިފައިވާ ކަމަށް ރިޕޯޓުކޮށްފައިވެއެވެ. އެގައުމުގެ ބައެއް މީހުން ބުނާގޮތުގައި ގިނަ އަދަދެއްގެ ބަޔަކު މަރުވީ ގޭގައި މަޑުކުރަން އޮފިޝަލުން އެންގުމުންނެވެ.

ނަމަވެސް ލީބިޔާގެ އިރުމަތީ ސަރަހައްދުގެ އޮފިޝަލުން ވަނީ އެ ތުހުމަތުތައް ދޮގުކޮށްފައެވެ.

ބެންގާޒީގައި ހުންނަ ލީބިޔާ ސަރުކާރުގެ ތަރުޖަމާނު އުސްމާން އަބްދުލް ޖަލީލް ވިދާޅުވީ، ޑެރްނާގައި ތިބި މީހުން އެސަރަހައްދުން ދިއުމަށް ސިފައިން އިންޒާރު ދިންކަމަށެވެ. އަދި އެމީހުން ގެއިން ނިކުމެގެން ނުދިއުމަށް ބުނެ ދެކެވުނު ވާހަކަތައް އުސްމާން ވަނީ ދޮގުކުރައްވާފައެވެ.

ރިޕޯޓްތައް ބުނާގޮތުން، ޑެރްނާގެ މަރުކަޒުގައި ހަރަކާތްތެރިވާ ސަލާމަތްކުރާ މީހުންނާއި، އެމްބިއުލާންސް ކްރޫއިންނާއި، ފޮރެންސިކް ޓީމުތަކުން ދަނީ މަރުވެފައިވާ މީހުން ދެނެގަތުމުގެ މަސައްކަތް ކުރަމުންނެވެ. އުދައެރުމުގެ ސަބަބުން މަގުތަކާއި މުވާސަލާތީ ނިޒާމުތައްފަދަ މުހިންމު އިންފްރާސްޓްރަކްޗަރތައް ވަނީ ހަލާކުވެފައެވެ.

މީގެ އިތުރުން ލީބިޔާގެ ހާލުގައި ޖެހިފައިވާ މީހުންނަށް އެހީވުމަށް, އެހީދޭ އިދާރާތަކުން ދަނީ އެ ގައުމަށް ދަތުރުކުރަމުންނެވެ. ނަމަވެސް ބައިނަލްއަގުވާމީ ބޮޑެތި އެހީދޭ އިދާރާތަކުގެ މާބޮޑު އިޝާރާތެއް ނެތްކަމަށް ބޭރުގެ މީޑިއާތަކުގައި ރިޕޯޓުކޮށްފައިވެއެވެ.

ލީބިޔާގައި ފެންބޮޑުވުމުގެ ސަބަބުން މިހާތަނަށް 6،000އާ 11،000 ދެމެދުގެ އަދަދަކަށް މީހުން މަރުވެފައިވެއެވެ. އަދި އެތައް ހާސްބަޔަކު ގެއްލިފައިވާކަމަށް ރިޕޯޓްތައް ބުނެއެވެ. މިކަމާ ގުޅިގެން، ޑެރްނާގެ މޭޔަރު ވަނީ މަރުވި މީހުންގެ އަދަދު 20،000ށްވުރެ މައްޗަށް އަރާނެކަމަށް ލަފާކުރައްވާފައެވެ.