ތޫފާން "ޑެނިއަލް" ގެ ސަބަބުން ލީބިޔާގައި ފެންބޮޑުވެ އެތައް ހާސް ބަޔަކު މަރުވެއްޖެ

ލީބިޔާގައި ފެންބޮޑުވުމުގެ ސަބަބުން އެތައް ހާސް ބަޔަކު މަރުވެއްޖެއެވެ.

"ސްޓޯމް ޑެނިއަލް" އާއި ގުޅިގެން އެ ޤައުމުގެ ސަރުކާރުންވަނީ އާދިއްތަ ދުވަހު އެ ސަރަހައްދަށް ކުއްލި ހާލަތު އިއުލާނުކޮށްފައެވެ.

މި ތޫފާނުގެ ސަބަބުން އެ ގައުމުގެ އިރުމަތީގެ ބައެއް ސިޓީތަކަށްވަނީ ވަރަށް ބޮޑަށް އަސަރުކޮށްފައެވެ. އެގޮތުން، ބެންގާޒީ، ސޫސޭ، ޑެރްނާ އަދި އަލްމަރްޖް އަށް ވަރަށް ބޮޑަށް އަސަރުކޮށްފައިވެއެވެ.

މި ކާރިސާއާއި ގުޅިގެން ލީބިޔާގެ ސްކޫލްތަކާއި، ތެލުގެ ބޮޑެތި ބަނދަރުތަކުގެ އިތުރުން ފިހާރަތައްވަނީ ބަންދުކޮށްފައެވެ.

މީގެއިތުރުން، މަރުވި މީހުންގެ އަދަދު އިތުރުވާނެކަމަށް ލަފާކޮށް ލީބިޔާގެ ރެޑް ކްރޮސްއިން ބުނެފައިވަނީ، މި ތޫފާނާއި ގުޅިގެން 150ކަށް ގެ ހަލާކުވެފައިވާކަމަށެވެ.

މި ކާރިސާއާއި ގުޅިގެން، އިރުމަތީ ބޮޑުވަޒީރު އުސާމާ ހަމަދު ލީބިޔާގެ ޓީވީ ޗެނަލަކަށް ވިދާޅުވީ "ގެއްލިފައިވާ މީހުންގެ އަދަދު އެތައް ހާހަށްއަރާފައިވާއިރު، މަރުވި މީހުންގެ އަދަދު 2،000 އަށް ވުރެ ގިނަކަމަށެވެ. އަދި ޑެރްނާގެ މުޅި އަވަށްތައް ގެއްލިފައިވާކަމަށްވެސް އޭނާ ވިދާޅުވިއެވެ.