ދިޔަނެރު ފަޅާ ގުޅޭގޮތުން މުއިއްޒު ހެއްދެވީ އިތުރުފުޅެއް
16 ސެޕްޓެމްބަރު 2023 | ހޮނިހިރު 05:23މަސައްކަތާގުޅޭ މަޝްވަރާތައް ކުރެވި، އެކަމުގެ އަމަލީ މަސައްކަތް މިހާރު ވަނީ ފެށިފައި
ނޭޝަނަލް ބޯޓިންގ އެސޯސިއޭޝަންގެ ރައީސް، އިސްމާއީލް ހަމީދު (ހައިރައިސް އިއްސެ)
ސަފާރީތައް ބަނދަރުކުރަން ޚާއްސަކޮށް ދިޔަނެރު ފަޅުގައި ތަރައްގީކުރާ ބަނދަރުގެ މަސައްކަތާ ގުޅޭގޮތުން ޕީއެންސީގެ ކެންޑިޑޭޓު ޑރ. މުހައްމަދު މުއިއްޒު ދައްކަވާފައިވާ ވާހަކަފުޅުތައް, ނޭޝަނަލް ބޯޓިންގ އެސޯސިއޭޝަންގެ ރައީސް އިސްމާއީލް ހަމީދު (ހައިރައިސް އިއްސެ) ދޮގު ކުރައްވައިފިއެވެ.
ހޮނިހިރު ދުވަހު ރާއްޖެޓީވީގެ ފަށާއިރު ޕްރޮގްރާމްގައި އިއްސެ ވިދާޅުވީ، ސަފާރީ ބޯޓުތައް އަޅާނެ އެކަށީގެންވާ ފަޅެއް ނެތުމުގެ ކަންބޮޑުވުން އަބަދުވެސް އޮންނަކަމަށެވެ.
އިއްސެ ވިދާޅުވީ، ކުރީގެ ރައީސް އަބްދުﷲ ޔާމީނުގެ ވެރިކަމުގައި ދިޔަނެރު ފަޅު ލިބިދާނެތޯ އެސޯސިއޭޝަނުން ސަރުކާރާ މަޝްވަރާތައް ކޮށްފައިވާނެ ކަމަށެވެ.
އެހެންނަމަވެސް ވ. އާރަށާ އެ ފަޅު މާ ކައިރީގައި އޮތުމުން، ސެކިއުރިޓީ ސަބަބުތަކަށް ކަަމަށް ވިދާޅުވެ އޭރުގެ ޑިފެންސް މިނިސްޓަރ އާދަމް ޝަރީފް އެކަމަށް ދެކޮޅު ހެއްދެވިކަމަށް އިއްސެ ވިދާޅުވިއެވެ.
އެއަށްފަހު މި ސަރުކާރު އައިސް އެ މަޝްރޫއުގެ މަސައްކަތުގައި މަޝްވަރާތައް ކުރެވި، އެކަމުގެ އަމަލީ މަސައްކަތް މިހާރު ފެށިފައިވާކަން އިއްސެ ފާހަގަ ކުރެއްވިއެވެ.
އިއްސެ ވިދާޅުވީ، ކޮވިޑުގެ ސަަބަބުންނާއި އެކި ސަބަބުތަކާހުރެ އެ މަސައްކަތް ފެށުން ލަސްވެގެން ދިޔަ ނަމަވެސް، މިހާރު މަޝްރޫއުގެ އަމަލީ މަސައްކަތް ފެށި، ޕްލޭންތައްވެސް އެ އެސޯސިއޭޝަނާ ސަރުކާރުން ހިއްސާކޮށްފައި ވާކަމަށެވެ.
އިއްސެ އެހެން ވިދާޅުވެފައިވާއިރު، ދާދި ފަހުން ޕީޕީއެމްގެ ކެނޑިޑޭޓު ޑރ. މުއިއްޒު ވަނީ ދިޔަނެރު ފަޅާއި ގުޅޭގޮތުން ވަރަށް ކޯފާ އިސްކުރައްވައި ނޫސްވެރިއަކާ ވާހަކަދައްކަވާފައެވެ. އެގޮތުން އެ ޕްރޮޖެކްޓަކީ ޔާމީނުގެ ވެރިކަމުގެ ޕްރޮޖެކްޓެއްކަން ފާހަގަ ކުރައްވައި މުއިއްޒު ވަނީ، މި ސަރުކާރަށް އެކަމުގެ ކްރެޑިޓް ނެގެން ނެތްކަމަށް ވިދާޅުވެފައެވެ.
އިއްސެ ވިދާޅުވީ، ފުރިހަމަ އާރާއި ބާރާއެކު ޕީޕީއެމް ވެރިކަމުގައި އޮތްއިރު އެކަންކަން ކުރައްވާފައި ނުވާކަމަށާއި، މުއިއްޒުވެސް އޭރު އެންމެ ކުޑަމިނުން ބައްދަލުވެސް ކުރައްވާފައި ނުވާކަމަށެވެ.
މި އިންތިޚާބުގައިވެސް ޑރ. މުއިއްޒު ފިޔަވައި ދެން ތިއްބެވި ހުރިހާ ކެނޑިޑޭޓުންވެސް އެ އިންޑަސްޓްރީގެ އެދުމަށް އިޖާބަދެއްވައި ބައްދަލު ކުރެއްވިކަން އިއްސެ ފާހަގަކުރެއްވިއެވެ.
އިއްސެ އިތުރަށް ވިދާޅުވީ، މިހާރު ސަރުކާރުން އެ ޕްރޮޖެކްޓު ހިންގަން ފަށާފައިވާއިރު، އެކަން އެސޯސިއޭޝަނުން އުފަލާއެކު ފާހަގަކުރައްވާ ކަމަށެވެ.
ނޭޝަނަލް ބޯޓިންގ އެސޯސިއޭޝަނަކީ 50ށްވުރެ ގިނަ އަހަރުވެފައިވާ އެސޯސިއޭޝަނެކެވެ. މުހިއްމު ކުންފުނިތަކާއި ޖަމިއްޔާތަކުގައިވެސް މި އެސޯސިއޭޝަންގެ މެމްބަރުން ހިމެނެއެވެ.
