ރައީސް ޞާލިހުގެ ސަރުކާރުން ޣައްޒާގެ ރައްޔިތުންނަށް ހަދިޔާކުރަން ނިންމި އެއް މިލިއަން މަސްދަޅު އަދިވެސް ނުފޮނުވާ

ނިމިދިއަ ރައީސް އިބްރާހީމް މުޙައްމަދު ޞާލިހުގެ ސަރުކާރުން ޣައްޒާގެ ހާލުގައި ޖެހިފައިވާ މުސްލިމު ރައްޔިތުނަން ހަދިޔާކުރަން ނިންމި އެއް މިލިއަން މަަސްދަޅު އަދިވެސް މި ސަރުކާރުން ނުފޮނުވާކަން ހާމަވެއްޖެއެވެ.

ފަލަސްތީނުގައި ހާލުގައި ޖެހިފައިވާ މުސްލިމް އަޚުންނާއި އުޚްތުންނަށް އެއް މިލިއަން މަސްދަޅު ހަދިޔާކުރަން ރައީސް އިބްރާހިމް މުހައްމަދު ޞާލިޙުގެ ސަރުކާރުން ނިންމަވާފައިވަނީ 2023 ވަނަ އަހަރުގެ އޮކްޓޫބަރު މަހުގެ 24 ވަނަ ދުވަހުގައެވެ.

މިދިއަ ސަރުކާރުގެ ފޮރިން މިނިސްޓަރު އަބްދުﷲ ޝާހިދު އޭރު ކުރެއްވި ޓުވީޓެއްގައި ވިދާޅުވީ، ފަލަސްތީނުގައި ހާލުގައި ޖެހިފައިވާ އަޚުންނާއި އުޚްތުންނަށް އެހީތެރިކަން ފޯރުކޮށްދިނުމުގެ ގޮތުން ދެ މިލިއަން މަސްދަޅު ހަދިޔާ ކުރަން ރައީސް ޞާލިޙް ނިންމަވާފައިވާ ކަމަށެވެ. އަދި އެ ހަދިޔާއަކީ ދިވެހީން ފަލަސްތީނާ އެކު ތިބިކަން ހާމަކޮށްދޭ އަލިގަދަ ދަލީލެއްކަމަށް ވެސް އޭރު ޝާހިދު ކުރެއްވި ޓްވީޓުގައި ވެސް ވަނީ ވިދާޅުވެފައެވެ.

ނަމަވެސް ރައީސް ޞާލިހުގެ ސަރުކާރު ނިމި މިހާރު މިއޮތް ރައީސް ޑރ. މުހައްމަދު މުއިއްޒުގެ ސަރުކާރަށް އަހަރަކަށް ވުރެ ގިނަ ދުވަސް ފާއިތުވެފައިވާއިރު، އެ އެއް މިލިއަން މަސްދަޅު ޣައްޒާއާއި ހަމައަށް އަދިވެސް ވަނީ ފޯރުކޮށް ނުދެވިއެވެ.

ރާއްޖެ ޓިވީގެ "ފަށާއިރު" ޕްރޮގްރާމަށް މައުލޫމާތުދެއްވަމުން ފޮރިން މިނިސްޓްރީން ބުނީ، އެއް މިލިއަން މަސްދަޅުގެ ތެރެއިން ހަތަރު ލައްކަ މަސްދަޅު ހިމެނޭ ފުރަތަމަ ޝިޕްމެންޓް އަދި ހުރީ މިސްރުގެ ރެޑްކްރެސެންޓުގެ ބެލުމުގެ ދަށުން އެގައުމުގެ އަލް އާރިޝް ނަމަކަށް ކިޔުނު ގުދަނެއްގައި ކަމަށާއި ބޯޑަރު ހުޅުވުނުހާ އަވަހަކަށް ޣައްޒާއަށް އެ މަސްދަޅު ޝިޕްމެންޓު ފޯރުކޮށްދޭނެ ކަމުގެ މައުލޫމާތު ލިބިފައިވާ ކަމަށެވެ. އަދި އެ ޝިޕްމެންޓް މިހާތަނަށް ވެސް ޣައްޒާއަށް ފޯރުކޮށް ނުދެވި ހުރީ މަސްދަޅުތައް ގެންދިއުމާއި، ވަކިގޮތަކަށް ބަންދުކުރަން ޖެހުމުގެ އިތުރުން އެހެން ކަހަލަ އެކިއެކި ދަތި ތަކާއި ކުރިމަތިވެގެން ކަމަށް ވެސް ފޮރިންމިނިސްޓްރީން ވަނީ ބުނެފައެވެ.

އަދި ބާކީ ހުރި ހަ ލައްކަ މަސްދަޅު ޣައްޒާއަށް ފޮނުވުމަށް ކިހާ މުއްދަތެއް ނަގާނެތޯ ކުރި ސުވާލަށް ޖަވާބުދެމުން ފޮރިން މިނިސްޓްރީން ބުނީ މިހާރުވެސް އެ ޝިޕްމެންޓް ޣައްޒާއަށް ފޮނުވުމުގެ މަސައްކަތް ކުރެވެމުން ދާކަމަށާއި ބޯޑަރު ހުޅުވުނުހާ އަވަހަކަށް މަސްދަޅުތައް ޣައްޒާއަށް ފޮނުވާނޭ ކަމަށެވެ.

ފޮރިންމިނިސްޓްރީން އަންގާރަ ދުވަހު "ފަށާއިރު" ޕްރޮގްރާމަށް ފޯނުން މައުލޫމާތު ދެމުން މިފަދައިން ބުނެފައިވާއިރު، 2024 ވަނަ އަހަރުގެ ސެޕްޓެމްބަރު މަހު، ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ސަރުކާރުގެ ތަރުޖަމާން ހީނާ ވަލީދު ވިދާޅުވެފައި ވަނީ ކުރީ ސަރުކާރުން ފަލަސްތީނަށް ފޮނުވަން ނިންމީ އެއް މިލިއަން މަސްދަޅުގެ ތެރެއިން 7800 މަސް ކޭސް ސެޕްޓެމްބަރު މަހުގެ 15 އަށް ވީ އާދިއްތަ ދުވަހު ފޮނުއްވާނެ ކަމަށާއި އެ ފޮނުވުމުން 40 ދުވަހުގެ ތެރޭގައި މަސްދަޅު ކޭސްތައް އެކޮޅަށް ލިބޭނޭ ކަމަށެވެ. އެއާއި އެކު މިސްރުގެ ރެޑްކްރެސެންޓުން އެ މަސްދަޅުތައް ޣައްޒާގެ ރައްޔިތުންނަށް ހަމައަށް ފޯރަން ފަށާނެ ކަމަށެވެ.

ނަމަވެސް ހީނާ މިހެންވިދާޅުވިތާ ހަތަރު މަސް ފާއިތުވެ، ފަލަސްތީނާ އިސްރާއީލުގެ ހަނގުރާމަ ހުއްޓާލުމުގެ އެއްބަސްވުމެއް ގާއިމް ކުރެވި، މި ހަނގުރާމަ ހުއްޓާލާފައި ވާއިރުވެސް އަދިވެސް މި އެއް މިލިއަން މަސްދަޅުގެ ތެރެއިން ފުރަތަމަ ފޮނުވި 4 ލައްކަ މަސްދަޅު އަދިވެސް ފަލަސްތީނުގެ ރައްޔިތުންނާއި ހަމައަށް ވަނީ ނުފޯރައެވެ.