އަލިފުށީގެ މަގުތައް ތަރައްގީގެ ކުރުމުގެ މަސައްކަތެއް ކުރިއަކަށް ނުދޭ، ރައްޔިތުން ތިބީ ކަންބޮޑުވުމެއްގެ ތެރޭގައި: ބިގޭ

ރ. އަލިފުށީގެ މަގުތައް ތަރައްގީގެ ކުރުމުގެ އަމަލީ އެއްވެސް މަސައްކަތެއް ނުކުރި ނަމަވެސް އެމަސައްކަތަށް ނަގާފައިވާ މުވައްޒަފުން މިސަރުކާރުން ވަކިކޮށްފައިވާ ކަމަށް އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެއެވެ.

ހޯމަ ދުވަހު ރާއްޖެޓީވީގެ ފަށާއިރު ޕްރޮގްރާމްގައި ވާހަކަދައްކަވަމުން ބިގޭ ވިދާޅުވީ ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި އަލިފުށީގެ ބޮޑެތި މަގުތަކުގައި ތާރުއަޅައި، ތަރައްގީ ކުރުމަށް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)އާ ހަވާލުކޮށް، އެއްބަސްވުމުގައި ސޮއިކޮށްފައިވާ ކަމަށެވެ. ނަމަވެސް ރައީސް ޑރ.މުހައްމަދު މުއިއްޒު ވެރިކަމަށް ވަޑައިގަންނަވާ އަލުން، މި މަޝްރޫއު ފެށުމަށްޓަކައި އައު ރަސްމިއްޔާތެއް ބާއްވާފައިވާ ކަމަށް އޭނާ ވިދާޅުވިއެވެ.

މިއަދާ ހިސާބަށް މަގުތައް ތަރައްގީ ކުރުމުގެ އެއްވެސް އަމަލީ މަސައްކަތެއް ފެށިފައިނުވާކަން ފާހަގަކުރައްވައި ބިގޭ ވިދާޅުވީ މިއީ ރައްޔިތުންގެ ވަރަށް ބޮޑު ކަންބޮޑުވުމެއް ކަމަށެވެ. ނަމަވެސް މި މަސައްކަތް ކުރުމަށް ކުރީ ސަރުކާރުގައި ނަގާފައިވާ މުވައްޒަފުން ވަޒީފާއިން ވަކިކޮށް، މިސަރުކާރުން ބޭނުންވާ މީހުންނަށް ވަޒީފާތައް ހަމަޖައްސާފައިވާ ކަމަށް ބިގޭ ވިދާޅުވިއެވެ.

މީގެ އިތުރުން ބިގޭ ވިދާޅުވީ ނުހައްގުން ވަޒީފާއިން ވަކިކޮށްފައިވާ މީހުންގެ މައްސަލަތައް ލޭބަރ ޓްރައިބްނަލަށް މައްސަލަ ހުށަހެޅި ޝަރީއަތުގެ އަޑު އެހުންތައް ކުރިއަށްދާ ކަމަށެވެ. އަދި ރައްޔިތުންގެ ހައްގުތައް ލިބޭނެ ކަމަށް އުންމީދުކުރާ ކަމަށް އޭނާ ވިދާޅުވިއެވެ.

ރައީސް ސާލިހުގެ ސަރުކާރުގައި މިރަށުގެ ބޮޑެތި މަގުތަކުގައި ތާރު އެޅުމަށްޓަކައި އާރްޑީސީއާ ހަވާލުކުރީ. މިރަށުގައި ސައިޓް ހެދި ބޭނުންވާ މުވައްޒަފުން ނެގި ވަރަށް ގިނަ މަސައްކަތްތަކެއް ކުރެވުނު. ވަރަށް ގިނަ ސާމާނު ވެސް ގެނެސްފައިވޭ. މިހިސާބަށް ގޮސްފައި ކަން ދިމާކުރި ގޮތުން އަޅުގަނޑުމެންގެ ވެރިކަމުގެ 5 އަހަރު ނިމުނީ. ދެން މިއައި ސަރުކާރުން އެ މިސަރުކާރުން ކުރާ ކަމެއްކަން ދެއްކުމަށްޓަކައި އެބޭފުުޅުން މިތަނަށް ވަޑައިގެން އެތަން އަލުން އައު މަޝްރޫއެއް ފައްޓަވައި ދެއްވުމަށް އިފްތިތާހް ކުރުވުމުގެ ގޮތުން ހަރަކާތްތަކެއް ހިންގެވި. ދެން ފެނުނީ ދުވަސްކޮޅެއް ފަހުން އަޅުގަނޑުމެން މަގާމުތަކަށް ގެނެސްފައި ޚާއްސަކޮށް މިރަށުގެ ވަރަށް ގިނަ އަންހެން ބޭފުޅުންނާއި ފިރިހެން ބޭފުޅުން ހިމެނޭ ގޮތަށް މުވައްޒަފުންގެ ގޮތުގައި އަޅުގަނޑުމެން ސަރުކާރުން ވަޒީފާ ދެއްވި ބޭފުޅުންގެ ތެރެއިން ގާތްގަނޑަކަށް 28 އަކަށް ބޭފުޅުން ވަޒީފާއިން ވަކިކުރިތަން. އަދި ވަކިކޮށްފައި ހަމަ އެ ބާރު މިނުގައި މިސަރުކާރަށް ވަފާތެރިކަމަށް މިސަރުކާރަށް ގަބޫލުކުރެވޭ ބޭފުޅުން ކޮޅެއް މިތަނުގައި މަގާމުތަކަށް ވަޒީފާ ހަމަޖައްސަވައިދެއްވި.

އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ)

ގާތްގަނޑަށް 3000 މީހުން ދިރިއުޅެމުން އަންނަ އަލިފުށީގެ މަގުތަކުގައި އަޑިގުޑަންތައް ގިނައެވެ. އެކަމުގެ ސަބަބުން އެއްގަމު އުޅަނދު ދުއްވާ މީހުންނަށާއި ހިނގަބިނގާވެ އުޅޭ މީހުންނަށްވެސް އެތަކެއް ގެއްލުންތަކެއް ކުރިމަތިވެއެވެ.

މި މައްސަލަތައް ހައްލު ކޮށްދިނުމަށް ކުރީ ސަރުކާރުން 16 އޭޕްރީލް 2023 ގައި އަލިފުށީ މަގުތަކުގައި ތާރުއަޅަން، ޕްލޭނިންގް މިނިސްޓްރީން، އާރްޑީސީއާ ހަވާލުކޮށް، އެއްބަސްވުމުގައި ސޮއިކޮށްފައިވެއެވެ.

މި މަޝްރޫއުގެ ދަށުން އަލިފުށީގެ 3.8 ކިލޯމީޓަރު މަގުގައި ތާރު އެޅުމަށް ހަމަޖެހިފައިވެއެވެ. އަދި މަގުތަކުގައި ފެން ހިންދާ ނިޒާމް ގާއިމްކުރުމާއެކު މަގުތަކުގައި މަގު ބައްތި ޖެހުމަށް ވެސް ވަނީ ނިންމާފައެވެ.

އަލިފުށީ ބޮޑެތި މަގުތައް ޑިޒައިންކޮށް ހެދުމުގެ މަސައްކަތް އާރްޑީސީއާ ހަވާލުކޮށްފައިވަނީ 90.96 މިލިއަން ރުފިޔާއަށެވެ.

އެއީ 540 ދުވަހުގެ ތެރޭގައި ނިންމުމަށް ހަވާލު ކޮށްފައިވާ މަޝްރޫއެކެވެ.