ރޯނުވަށާ މެޝިނެއް ހަދަން ޖެހުނީ ލީލި ހިފައިގެން އަންހެންވެރިން އަންނާތީ އަންހެނުން ހިތްހަމަ ނުޖެހެން ފެށީމަ!

ހެނދުނު 7ން ފެށިގެން ރޭގަނޑު ވަރަށް ދަންވަދެން ވޯކްޝޮޕްގައި ބުރަ މަސައްކަތް ކުރާ ހާރޫނަށް އެންމެ މީރު ކެއުމަކީ ކުޅަވަކާއި، ހަކުރާ މޮޑެގެންނެވެ. މިހާރު ވެސް ކުއްޅަވަކެއް ޗިސްކޮށްލައިގެން ގެންނާށޭ އަންހެނުން ކައިރީގައި ބުނީމަ ހަކުރުކޮޅެއް އަޅައިގެން މޮޑެގެން ގެންނަ ކަމަށާއި، އޭނާގެ މައިގަނޑު ކެއުމަކީ އޭއީ ކަމަށް ހާރޫން ބުންޏެވެ.

ހދ. ކުޅުދުއްފުއްޓަށް އުފަން ހާރޫން މުހައްމަދަކީ ކުޅަދާނަ މަސައްކަތްތެރިއެކެވެ. ބޮޑެތި މަސައްކަތްތަކުގައި ވަރަށް ގިނަ މީހުން އޭނާގެ އެހީތެރިކަން ހޯދައެވެ. ދިރިއުޅުމުގައި ކުރަންޖެހޭ މަސައްކަތްތަކުގެ ތެރެއިން އޭނާއަށް ނޭނގޭ ނުވަތަ ނުކުރެވޭ މަސައްކަތެއް ނެތޭ ބުންޏަސް ދޮގަކަށް ނުވާނެއެވެ. ހާރޫނަކީ ތަފާތު ގިނަ މެޝިންތައް އުފައްދާ، އެކި ކަހަލަ އިންޖީނުތައް މަރާމާތުކޮށް، ރޭނުމާއި، ވާޑާމުގެ އެކި މަސައްކަތްތައްކޮށް، ބަދީގޭގައި ހިފާގެންގުޅޭ ތަކެތި އުފައްދާ ބޮޑެތި މަސައްކަތްތައް ކުރާ މޮޅު މީހެކެވެ.

ރާއްޖެޓީވީގެ ފަށާއިރު ޕްރޮގްރާމްއަށް ހާރޫން ކިޔައިދިން ގޮތުގައި، މަސައްކަތަށް އޭނާ ނުކުމެވުނީ މަންމަގެ ސަބަބުންނެވެ. ހުރިހާ މަސައްކަތެއް ކުރަމުން އަންނަ ހާރޫންގެ މަންމަ އޭނާއަށް ދިން ނަސޭހަތަކީ ކުޅިވަރުގައި ދުވަސްތައް ހޭދަކުރުމުގެ ބަދަލުގައި މަސައްކަތުގައި މަސްއޫލުވުމަށެވެ. އެގޮތުން ހަނދި ބާއްވަން ކިޔައިދީ، ރާނަން ދަސްކޮށްދިނީ އޭނާގެ މަންމަ އެވެ. މަންމަގެ ނަސޭހަތާއެކު އުމުރުން 9 އަހަރުގައި ފެށި މަސައްކަތުން އޭނާއަކީ އޭރު އެރަށުގައި އެންމެ އަވަހަށް ރާނާ އެކަކެވެ. ހާރޫން ކިޔަދިން ގޮތުގައި 7 ބަރިއަށް އުސްކޮށް 150 ފޫޓު ދިގު ފާރުތައް އެއްދުވަސްތެރޭގައި އޭރު އޭނާ ރާނާ ނިންމައެވެ. އަދި އެރަށުގެ ގިނަ ފާރުތަކާއި، ގެތައް އޭނާ ވަނީ ރާނާދީފައެވެ.

ރޭނުމުގެ މަސައްކަތް ކުރަމުން ހާރޫން ވަނީ ލަކުޑި ވަޑާމުގެ މަސައްކަތް ދަސްކޮށްފައެވެ. ހާރޫން ފުރަތަމަ ވަޑާން ކުރަންފެށިއިރު ލަކުޑި ކޮށަނީ މަސްވަޅި ނުވަތަ ދިގުވަޅިން ކަމަށް އޭނާ ބުންޏެވެ. އެހެންވެ، އޭނާގެ ބައްޕަ އޭނާއަށް ނަމެއް ދިން ކަމަށާއި، އެނަމަކީ ދިގުވަޅިވަޑާން ކަމަށް ހާރޫން ބުންޏެވެ. އުމުރުން 10 އަހަރުގައި އަދަރާދަގޮނޑި ހަދައި ވިއްކަން ފެށިއެވެ. ލަކުޑިން އޭނާއަށް ނުހެދޭނެ އެއްޗެއް ނެތެވެ. އެގޮތުން މިއަދު އޭނާ ދަނީ ލަކުޑިން ހަދަންޖެހޭ ތަފާތު އެކިއެކި އޯޑުތައް ނަގައި އެތަކެތި ހަދައިދެމުންނެވެ.

ލަކުޑީގެ މަސައްކަތަށް އޭނާގެ އަތްފަރިތަ މިންވަރަށް ކަނބުރުވެރިކަމުގެ މަސައްކަތްތަކަށް ވެސް ހާރޫންގެ އަތް ފަރިތައެވެ. ހާރޫން ކިޔައިދިން ގޮތުގައި އޭނާ ވަނީ ކުޑައިރު، އަވައްޓެރި ގެއެއްގައި ހުންނަ ކަނބުރުގެއަކަށް ގޮސް އެމަސައްކަތް ވެސް ދަސްކޮށްފައެވެ. ކަނބުރުވެރިކަމުގެ ގިނަ މަސައްކަތްތައް ކުރަމުންދާއިރު، ވަޅި ހެދުމާއި، ތާސް ހެދުމުގެ މަސައްކަތަށް އޭނާ މިއަދު މަޝްހޫރެއެވެ.

މީގެ އިތުރުން މިހާތަނަށް އައިރު ހާރޫން ވަނީ ގިނަ މެޝިންތަކެއް ވެސް އުފައްދާފައެވެ.

އޭނާ އެންމެ ފުރަތަމަ އުފެއްދީ ގައު އަޅާ މެޝިނެކެވެ. ފަހަރަކު ދެގައު އެޅޭގޮތަށް ހެދި މެޝިން ވިއްކާލުމަށްފަހު، މިހާރު ވަނީ ރޯނު ވަށާ މެޝިންތަކެއް އުފައްދާފައެވެ. މިހާރު އުފައްދާފައިވާ މެޝިނުން ކުޑަ ކުއްޖަކަށް ވެސް ރޯނު ވެށޭނެ ކަމަށް އޭނާ ބުނެއެވެ. ރޯނާ މެޝިނު އުފައްދަންޖެހުނީ ލީލި ހިފައިގެން އޭނާ ގާތަށް އަންހެންވެރިން މާގިނައިން އަންނާތީ އަންހެނުން މާބޮޑަށް ހިތްހަމަނުޖެހެން ފެށުމުން ކަމަށް ރޯނުވަށާ މެޝިނު ހަދަން ނިންމި ސަބަބު ކިޔައި ދެމުން ހާރޫން ބުންޏެވެ. އަދި ފޯއްކޮށާ މެޝިން، ހުނިގާނާ މެޝިން އަދި ހަނޑޫމުގުރާ މެޝިންތައް އުފައްދާފައިވެއެވެ. މިހާރު ވެސް ކޮންމެ ދުވަހަކަށް ފޯއްކޮށާ މެޝިނެއްގެ އޯޑަރު އަންނަ ކަމަށާއި، އެމަސައްކަތްތައް ކުރަމުންދާ ކަމަށް އޭނާ ބުންޏެވެ.

ދުވަހުގެ ގިނަ ވަގުތު މަސައްކަތުގައި ހޭދަކުރާ ހާރޫންގެ މަސައްކަތްތަކަށް އިތުރު އާރޯކަމެއް އަންނާނީ އޭނާގެ އަންހެނުން ކުރަމުންދާ މަސައްކަތުގެ ސަބަބުންނެވެ. ހާރޫން ބުނި ގޮތުގައި އޭނާ އަންހެނުންނަކީ ފިރިހެނަކަށް ދޫނުކުރާވަރުގެ ބުރަ މަސައްކަތްކުރާ މީހެކެވެ. އެގޮތުން އެއީ މަހާނާ ގައު ހަދައި ގިނަ ވަގުތު މަސައްކަތުގައި ހޭދަކުރާ މީހެއް ކަމަށް ހާރޫން ބުންޏެވެ. ކައިވެނިކުރިއިރު، އެއީ ކީއްކުރާ މީހެއްކަން ނޭނގޭ ކަމަށާއި، އެއީ ގެވެހި މީހެއް ނޫން ކަމަށާއި، އެކަމަކު ވަރަށް މަސައްކަތްތެރި ހީވާގި އަންހެނެއްކަން އެނގޭ ކަމަށް ހާރޫން ބުންޏެވެ.

ސަތަރިކޮޅެއް އަޅައިގެން ފެށި މަސައްކަތް ފުޅާވެ، ބޮޑު ވޯކްޝޮޕެއްގައި މަސައްކަތް ކުރަމުންދާއިރު، އޭނާ އެންމެ ދެރަވާ އެއްސަބަބަކީ މިފަދަ މަސައްކަތްތައް ކުރާނެ ޒުވާނުން މަދުވުމެވެ. ދަސްކޮށްދޭން ބުނާ އެންމެނަށް މަސައްކަތްތައް ދަސްކޮށްދިން ނަމަވެސް ދަސް ކުރަން ބޭނުންވެގެން މަސައްކަތަށް އަންނަ ޒުވާނުން ވަރަށް މަދުކަން އޭނާ ފާހަގަކުރިއެވެ. އެހެންކަމުން ރަނގަޅު އާމްދަނީއެއް ލިބޭ މިފަދަ މަސައްކަތްތަކަށް ޒުވާނުން ނުކުތުމަށް އޭނާ އެދެއެވެ. ކުރަހައިގެން މިންޖަހައިގެން ހާރޫން މަސައްކަތް ނުކުރި ނަމަވެސް އޭނާގެ ސިކުނޑީގައި ކުރަހައިގެން ކުރިއަށް ގެންދާ މި ބުރަ މަސައްކަތްތައް މިއަދު އާއްމު ރައްޔިތުން ވަނީ ބަލައިގަނެފައެވެ. އަދި މިއަދު ހާރޫން އެންމެ ބޮޑު ހިތްހަމަޖެހުމަކީ ވެސް އޭނާ ކުރާ މަސައްކަތް އާއްމުން ބަލައިގަނެ، ލިބޭ ޝުކުރުގެ ބަސްތެކެވެ.