ހޫނުގަދަ ސަހަރާއެއްގެ މެދުގައި، ގަނޑުފެނުގެ އާރުކާޓީއެއް!

އިރެއްގައި ހަނަފަސް ސަހަރާއެއް ކަމަކު މިއަދު އެއީ ތަރައްޤީއާއި ތަހުޒީބުގެ ލާމަސީލު މިސާލެކެވެ. އިޖާދީ އަދި އިންޤިލާބީ އެތައް ކަމެއް އެތަނެއްގެ ތެރޭގައި ހިނގާ ވިޔަފާރީގެ ވަރުގަދަ މަރުކަޒެކެވެ. ދައްކަން މިއުޅެނީ ދުބާއީގެ ވާހަކައެވެ. އުސް އިމާރާތްތަކުން މަލަމަތި ނަލަކޮށްލާފައި އޮތެއް ކަމަކު، އެއީ ސަހަރާއެއް ނޫން ކަމަކަށް ނުވާނެއެވެ. ފަޅު ނޫނެއް ކަމަކު، އެއީ އަދިވެސް އިންތިހާއަށް ހޫނު ގަދަ ތަނެކެވެ. ނަމަވެސް، ސްރީލަންކާއަށް އުފަން މަރކް ރަނަސިންހައަކީ، ދުބާއީގެ އެ ގަދަ ހޫނުގަނޑުގެ ތެރޭގައި، ގަނޑުފެނުގެ މައުރަޒެއް ހިންގާ، ކުޅަދާނަ ފަންނުވެރިއެކެވެ.

ރަނަސިންހަގެ އައިސް ލައުންޖު ޒީނަތްތެރި ކޮށްފައި ވަނީ އެކި ބައްޓަންތަކާއި ސައިޒުތަކުގެ ގަނޑުފެނުގެ ފަރުމާތަކުންނެވެ. ވަކި މަސައްކަތަކީ، ވަކިތަނަކަށް އުފަންވީތީ، ނުވަތަ ވަކި ތަނެއްގައި ދިރިއުޅެން ޖެހުނީތީ، ނުވަތަ އެވެނިމިވެނި ވަޞީލަތްތަކެއް ފުރިހަމަ ވެފައި ނެތަތީ ނުކޮށް ދޫކޮށްލައިގެން ތިބެން ޖެހޭ މަސައްކަތްތަކެއް ނޫން ކަން، ރަނަސިންހަގެ އައިސް ލައުންޖުން ކިތަންމެ ހާ ރަނގަޅަކަށްވެސް ސާބިތު ކޮށްދެއެވެ.

ދުބާއީގެ އިންތިހާ ގަދަ ހޫނުގަނޑުގެ ތެރެއިން، ރަނަސިންހަގެ އައިސް ލައުންޖަށް ވަދެގެން ދާއިރު އެތަނުގެ ތެރެއިން ފެންނަ ކޮންމެ ފަރުމާއަކުންވެސް ދޭހަ ކޮށްދެނީ، އެކަމަށް ރަނަސިންހަގެ ހިތުގައި އޮތް ވަރުގަދަ ލޯތްބެކެވެ.

ކޮންމެ ފަރުމާއެއްވެސް ނިންމާލާފައި ވަނީ އިންތިހާ ފަރުވާތެރި ކަމާ އެކީގައިކަމީ އޮޅުމެއް ނެތް ޙަޤީޤަތެވެ. ބޮޑު ގަނޑުފެންގަނޑުތަކުގައި އެކި ކަހަލަ ފަރުމާތައް ކުރުމުގެ މަސައްކަތަކީ، ރަނަސިންހަ އަމިއްލައަށް ދަސްކޮށް، ފައްކާ ކުރަމުން ދާ މަސައްކަތެވެ. ދުބާއީގެ ދޭސީންނާއި ފަތުރުންނަށްވެސް ޚާއްޞަކޮށް ރަނަސިންހަ ހިންގާ އައިސް ލައުންޖު، ނުވަތަ 'އިމްޕަލްސް ކްރިއޭޝަންސް އައިސް ސްކަލްޕްޗަރޒް' އިން ހޫނު ބުއިންތަކާއި ލުއި ކާނާގެ ބާވަތްތައްވެސް ލިބެން ހުރެއެވެ.

ގިނަ އެވޯޑްތަކެއްވެސް ހާސިލު ކޮށްފައި ވާ ރަނަސިންހަގެ ދިރިއުޅުން ދުބާއީއަށް ބަދަލު ކުރުމުގެ ކުރިން އޭނާ ވަނީ ބަހްރައިން އަދި މިޞްރުގައިވެސް ދުވަސްތަކެއް ހޭދަ ކޮށްފައެވެ. ގަނޑުފެނުގެ ފަރުމާތައް ކުރުމާއި، އެކިއެކި ހަފުލާތަކަށް ތަންތަން ޒީނަތްތެރި ކުރުމަށް ޚާއްސަ، އޭނާގެ އަމިއްލަ ކުންފުންޏެއް ހެދީ، ދުބާއީ ވަޒަންވެރިވުމަށް ފަހުގައެވެ.

ރަނަސިންހަ ކިޔައިދިން ގޮތުގައި މަސައްކަތުގެ މައިދާނުގައި އޭނާއަށް ކުރިމަތިލާން ޖެހޭ އެންމެ ބޮޑު ގޮންޖެހުމަކީ، އެތެރެއާއި ބޭރުގެ ފިނިހޫނު މިނުގައި ހުންނަ ބޮޑު ފަރަގެވެ.

ރަނަސިންހަގެ ޢުއްމީދަކީ އިތުރު ބަޔަކަށް، ގަނޑުފެނުގައި ކަނޑާ ނެގުމާއި ފަރުމާ ކުރުމުގެ ހުނަރުވެރިކަން ދަސްކޮށްދިނުމެވެ. އަދި އޭނާއަށް ލިބިފައި ވާ، ގަނޑުފެނުގެ ފަރުމާތައް ކުރުމުގެ ހުނަރު، މުޅި ދުނިޔެއާއި ހިއްސާ ކުރުމަކީ އޭނާގެ މިއަދުގެ އަމާޒެވެ.