ހިނިތުންވުމެއް ޕާރުސަލްކޮށްލެވިދާނެތަ؟

ހަފުތާ ބަންދާ ދިމާކޮށް ތަފާތު ކަމެއް ކޮށްލުމަކީ ގިނަ ބަޔަކު ކަނޑައަޅާ އަމާޒެކެވެ. އަމަލީގޮތުން އެކަން ހާސިލު ކުރުމުގައި ކުރި ހޯދަމުން އަންނަ އެއް ބަޔަކީ، އެކުވެރި އަރަބި އިމާރާތް (ޔުއޭއީ)ގެ "ޑްރޯ އަ ސްމައިލް" ޖަމްއިއްޔާގެ މެންބަރުންނެވެ. ހިލޭ ސާބަހަށް މަސައްކަތްކުރާ މި ޖަމްއިއްޔާއިން ހަފުތާ ބަންދާ ދިމާކޮށް އިންތިޒާމްކުރާ ހަރަކާތުގައި ގިނަ އަދަދެއްގެ ކުޑަކުދިންނާއި ބޮޑެތި މީހުން ބައިވެރިވެއެވެ. މި ގުރޫޕުގެ މަސައްކަތަކަށް ވަނީ ތާޒާ ކާނާއާއި މޭވާ އަދި ޖޫސް ބަންދުކޮށް، ބޭނުންޖެހިފައިވާ މީހުންނަށް އެ ޕެކްތައް ފޯރުކޮށްދިނުމެވެ.

"ޑްރޯ އަ ސްމައިލް" ޖަމްއިއްޔާއިން މިފަދަ ހަރަކާތެއް ހިންގުމުގެ މައިގަނޑު އެއް މަގުސަދަކީ، ރަނގަޅު ކެއުމެއް ދީގެން ކޮންމެވެސް ބައެއްގެ ދުވަސް އުޖާލާކޮށްދިނުމެވެ. އަނެއް މަގުސަދަކީ، މުޖުތަމައުގެ ކަންކަމުގައި ހިލޭ ސާބަހަށް ޚިދުމަތްކުރުމުގެ މުހިންމުކަން، ކުޑަކުދިންނަށް އަންގައިދީ، އެކުދިންގެ ކިބާގައި އެ އާދަ އަށަގެންނެވުމެވެ. ހަރަކާތުގައި ބައިވެރިވާ ވޮލަންޓިއަރުންގެ ވާހަކަތައް އަޑުއަހާލުމުން، މަގުސަދު ހާސިލުވަމުން ދާ ކަމުގެ އިހުސާސް ކުރެވެއެވެ.

މި ހަރަކާތުގެ ފެށުން އައީ 2018 ވަނަ އަހަރުގެ ތެރޭގައެވެ. މުގުލުގައި ހުރީ އަހުމަދު މުހައްމަދު އަލީއެވެ. މިކަން ފެށިގެން އައީ ހޫނު މޫސުމުގެ ދުވަސްވަރު، ރަތްދަކަ އަވީގެ ގަދަ ހޫނުގައި ލޯބޯ ފިއްސައިގެން ޑެލިވަރީ މަސައްކަތުގައި އުޅުނު ޑްރައިވަރުންނަށް ފިނިފެނާއި ޖޫސް ބެހުމަށް ހިންގި ހަރަކާތެއްގެ ގޮތުގައެވެ.

އަހުމަދު ބުނިގޮތުގައި ދެމަސް ދުވަހުގެ ތެރޭގައި އޭނާ ވަނީ 25000 ފެން ފުޅިއާއި ޖޫސް ފުޅި، މަސައްކަތްތެރިންނަށް ބަހާފައެވެ.

އެއަށްފަހު، "ޑްރޯ އަ ސްމައިލް" ހަރަކާތް ވެފައި އޮތީ މުޅި އަހަރަށް ދެމިގެންދާ މަޝްރޫއަކަށެވެ. "ހިނިތުންވުމުގެ ޕާރުސަލް"ގައި ހިމެނެނީ ތާޒާ ކޭމެއްގެ އިތުރުން، ބޯ ފެނާއި، އެކި ކަހަލަ ބިސްކޯދުގެ އިތުރުން މޭވާއެވެ.

"ޑްރޯ އަ ސްމައިލް"އިން ދަނީ، ހިލޭ ސާބަހަށް މަސައްކަތް ކުރާ އެހެން ޖަމްއިއްޔާއެއް ކަމަށްވާ ފުޑް އޭޓީއެމްއާ ގުޅިގެން ކާމިޔާބު ހަރަކާތްތަކެއް ހިންގަމުންނެވެ.

ޓީމުގެ އަމާޒަކީ، ކޮންމެ ހަފުތާއަކުވެސް 300އެއްހާ "ސްމައިލް ޕެކް"، ބޭނުން ޖެހިފައިވާ އެކިއެކި ފަރާތްތަކަށް ފޯރުކޮށްދިނުމެއެވެ. ދުބާއީގެ އެކި ސަރަހައްދުތަކުގައި މި ހަރަކާތް ކުރިއަށް ގެންދާއިރު، "ސްމައިލް ޕެކް" ލިބޭ ފަރާތްތަކުގެ ތެރޭގައި ކޮންސްޓްރަކްޝަން ސައިޓްތަކުގައި މަސައްކަތްކުރާ މީހުންނާއި، ސެކިއުރިޓީ ގާޑުންގެ ގޮތުގައި މަސައްކަތްކުރާ މީހުންގެ އިތުރުން ބަގީޗާތައް ބަލަހައްޓާ މީހުންނާއި، މުދާ އުފުލާ ޑްރައިވަރުންނާއި، ބޭނުން ޖެހިފައިވާ އެނޫންވެސް މީހުން ހިމެނެއެވެ. ޓީމުގެ ބުރަ މަސައްކަތުން މިހާރުވެސް 13000އްހާ ކޮތަޅުގެ އެހީ ވަނީ ބަހާފައެވެ.