ޔޫއޭއީގެ އައު ރައީސަކަށް ޝައިޚް މުހައްމަދު ބިން ޒައިދު

ޔުނައިޓެޑް އަރަބް އެމިރޭޓްސްގެ ރައީސް ޝައިޚް ޚަލީފާ ބިން ޒައިދު އަލް ނަހްޔާން އަވަހާރަވުމާ ގުޅިގެން އެ މަގާމަށް ޝައިޚް މުހައްމަދު ބިން ޒައިދު އިންތިޚާބުކޮށްފިއެވެ.

ރައީސްކަމުގެ މަގާމަށް ޝައިޚް މުހައްމަދު ބިން ޒައިދު އިންތިޚާބުކޮށްފައިވަނީ ފެޑެރަލް ސުޕްރީމް ކައުންސިލުގެ އިއްތިފާގުންނެވެ. އެއާއެކު، އޭނާ ވެވަޑައިގެންފައިވަނީ އެ ގައުމުގެ 3 ވަނަ ރައީސަށެވެ.

އެކަމާ ގުޅޭގޮތުން މިނިސްޓްރީ އޮފް ޕްރެސިޑެންޝަލް އެފެއަރޒުން ނެރެފައިވާ ބަޔާނެއްގައި ބުނެފައިވަނީ، ގާނޫނު އަސާސީގެ 51 ވަނަ މާއްދާއަށް ރިއާޔަތްކޮށް، ޝައިޚް މުހައްމަދު ބިން ޒައިދު ރައީސްކަމަށް އިންތިޚާބުކޮށްފައިވަނީ ސުޕްރީމް ކައުންސިލުގެ އިއްތިފާގުން ކަމަށެވެ.

މަޤާމަށް އިންތިޚާބުކުރުމާ ގުޅިގެން އޭނާ ވަނީ، މަގާމުގެ ޒިންމާތައް އެންމެ ފުރިހަމައަށް އަދާ ކުރެއްވުމަށް މަސައްކަތް ކުރައްވާނެކަމަށް ވިދާޅުވެފައެވެ.

އޭނާ އެ މަގާމަށް އައްޔަނުކުރުމާއެކު ގިނަ ބަޔަކު ގެންދަނީ މަރުހަބާކިޔަމުންނެވެ. ކުރިއަށް އޮތް ދުވަސްތަކުގައި ފޮރިން ޑިޕްލޮމެޓުންނާއި ލީޑަރުން އޭނާގެ އަރިހަށް ޒިޔާރަތްކުރައްވާނެކަމަށް ބެލެވޭކަމަށް އެ ގައުމުގެ ނޫސްތަކުން ވަނީ ރިޕޯޓުކޮށްފައެވެ.

ޝައިޚް ޚަލީފާ ބިން ޒައިދު އަވަހާރަވިއިރު އުމުރުފުޅަކީ 73 އަހަރެވެ. ޔޫއޭއީގެ ރަސްމީ ނޫސް އިދާރާއިން ރިޕޯޓުކޮށްފައިވާގޮތުން، ރައީސް ޝައިޚް ޚަލީފާ އަވަހާރުވުމުގެ ހިތާމައިގައި ޔޫއޭއީގެ ދިދަ ވެސް 40 ދުވަސް ވަންދެން ބައިދަނޑިއަށް ތިރިކުރުމަށް ވަނީ ނިންމާފައެވެ. އަދި ކުރިއަށް އޮތް 3 ދުވަހު ސަރުކާރު ބަންދުކުރުމަށްވެސް ވަނީ ނިންމާފައެވެ.

އެމަނިކުފާނު އަވަހާރަވީ އަހަރުތަކެއް ވަންދެން އާލާސްކަންފުޅާ އުޅުއްވުމަށްފަހު ކަމަށް ރިޕޯޓުތައް ބުނެއެވެ.