ނައިބު ރައީސް އެކްސްޕޯ 2020 ދުބާއިއަށް ޒިޔާރަތްކުރައްވައި އެކްސްޕޯ ބައްލަވާލައްވައިފި
30 މާރިޗު 2022 | ބުދަ 01:23ރައީސުލްޖުމްހޫރިއްޔާގެ ނައިބު ވަނީ އެކްސްޕޯގެ ރާއްޖޭގެ ޕެވިލިއަނާއި ސަޢޫދީ ޢަރަބިއްޔާގެ ޕެވިލިއަންއަށް ޒިޔާރަތްކުރައްވާފައި
ނައިބު ރައީސް އެކްސްޕޯ 2020 ދުބާއިއަށް ޒިޔާރަތްކުރެއްވުން
ރައީސުލްޖުމްހޫރިއްޔާގެ ނައިބު ފައިޞަލް ނަސީމް، އެކްސްޕޯ 2020 ދުބާއިއަށް ޒިޔާރަތްކުރައްވައި އެކްސްޕޯ ބައްލަވާލައްވައިފިއެވެ.
ރައީސުލްޖުމްހޫރިއްޔާގެ ނައިބު ވަނީ އެކްސްޕޯގެ ރާއްޖޭގެ ޕެވިލިއަނާއި ސަޢޫދީ ޢަރަބިއްޔާގެ ޕެވިލިއަންއަށް ޒިޔާރަތްކުރައްވާފައެވެ.
ރާއްޖޭގެ ޕެވިލިއަނުން ދައްކުވައިދެނީ މޫސުމަށް އަންނަ ބަދަލުތަކާއި ކުރިމަތިލައި ގުދުރަތީ ދިރުންތައް ދެމެހެއްޓޭނެ ގޮތަށް ދިރިއުޅުމުގެ އާދަތައް ބައްޓަންކޮށްގެން ދިރިއުޅުން ކުރިޔަށްގެންދެވޭނެ ގޮތެވެ. ރައީސުލްޖުމްހޫރިއްޔާގެ ނައިބު ރާއްޖޭގެ ޕެވިލިއަނަށް ކުރެއްވި ޒިޔާރަތުގައި އެމަނިކުފާނު ވަނީ ޕެވިލިއަންގައި ބޭއްވި މާހެފުމެއްގައި ބައިވެރިވެވަޑައިގެން ޕެލިއަންގައި ބައެއް ދިވެހިންނާއި ބައްދަލުކުރައްވައި ޚިޔާލު ބަދަލުކުރައްވާފައެވެ.
ސަޢޫދީ ޢަރަބިއްޔާގެ ޕެވިލިއަނުން ދައްކުވައިދެނީ މީހުންނާއި، ގުދުރަތީ ދިރުންތައް، ތަރިކަ އަދި ފުރުޞަތުތައް ހިމެނޭ މައިގަނޑު 4 ތަނބެއްގެ މައްޗަށް މުސްތަޤުބަލު ބިނާވެފައި އޮންނާނެ ގޮތުގެ ތަސައްވުރެކެވެ.
ރައީސުލްޖުމްހޫރިއްޔާގެ ނައިބު ޔޫ.އޭ.އީ.ގެ ދުބާއީއަށް ވަޑައިގަންނަވާފައި ވަނީ ވަރލްޑް ގަވަރމަންޓް ސަމިޓް 2022ގައި ބައިވެރިވެވަޑައިގެންނެވުމަށެވެ.
