ޕާކިސްތާނުގެ ކުރީގެ ރައީސް ޕަރްވޭޒް މުޝައްރަފް އަވަހާރަވެއްޖެ

ޕާކިސްތާނުގެ ކުރީގެ ރައީސް ޕަރްވޭޒް މުޝައްރަފް އަވަހާރަވެއްޖެއެވެ.

ޕަރްވޭޒް އަވަހާރަވީ މަދުން ނޫނީ ނުފެންނަ ބައްޔަކަށް ފަރުވާ ހޯއްދަވަމުން ގެންދަވާތާ ގިނަ ދުވަސްތަކެއްވި ފަހުން ދުބާއީގައި ހުންނަވަނިކޮށް އާދީއްތަ ދުވަހުއެވެ. އަވަހާރަވިއިރު އުމުރުފުޅަކީ 79 އަހަރެވެ.

2016 ވަނަ އަހަރުން ފެށިގެން ދުބާއީގައި ދިރިއުޅުއްވަމުން ގެންދެވީ ޕަރްވޭޒަށް ޖެހިވަޑައިގެންނެވީ މަދުން ނޫނީ ނުފެންނަ ވައްތަރުގެ ބައްޔެއް ކަމުގައިވާ އެމިލޮއިޑޯސިސްއެވެ. މި ބަލި ޖެހެނީ އާދަޔާ ހިލާފު ޕްރޮޓީންއެއް ކަމުގައިވާ އެމިލޮއިޑް އެތެރެހަށީގެ ގުނަވަންތަކުގައި އުފެދި ހަށިގަނޑުގެ އާންމު ހިނގުމަށް އަސަރުކުރަން ފެށުމުންނެވެ.

ޖޫން 10 ވަނަ ދުވަހު ޕަރްވޭޒްގެ އާއިލާއިން ނެރުނު ނޫސްބަޔާނެއްގައި ބުނެފައިވަނީ ޕަރްވޭޒްގެ ހާލުކޮޅު ގޯސްވަމުންދާ ކަމަށާއި، ރަނގަޅުވާނެކަމުގެ އުއްމީދެއް ނެތް ކަމަށެވެ. އަދި އެތެރެހަށީގެ ގުނަވަންތައް ރަނގަޅަށް މަސައްކަތް ނުރާ ކަމަށެވެ. ނަމަވެސް އެއިރު އޮންނެވީ ވެންޓިލޭޓަރުގައި ނޫން ކަމަށާއި، ބަލީގެ ސަބަބުން އެޑްމިޓްކޮށްގެން ފަރުވާ ދެމުން އަންނަތާ 3 ހަފްތާވެފައިވާ ކަމަށެވެ.

2007 ވަނަ އަހަރު ޕާކިސްތާނުގެ ގާނޫނު އަސާސީ ސަސްޕެންޑް ކުރި މައްސަލައިގައި ކުރީގެ ރައީސް ޕަރްވޭޒްގެ މައްޗަށް ގައުމަށް ގައްދާރުވިކަމުގެ ކުށުގެ ދައުވާ އުފުލާފައިވެއެވެ.

ޕަރްވޭޒް ޕާކިސްތާނުގައި ވެރިކަން ކުރައްވާފައިވަނީ 1999ން ފެށިގެން 2008 އާއި ހަމައަށެވެ. އަދި އެ މަނިކުފާނަކީ ޕާކިސްތާނުގެ ކުރީގެ ބޮޑުވަޒީރު ބޭނަޒީރު ބުއްޓޫ އަވަހާރަކޮށްލި މައްސަލައާއި ރަތް މިސްކިތުގެ އިމާމް އަދި ދީނީ ލީޑަރު އަބްދުލް ރާޝިދު ގާޒީ އަވަހާރަކޮށްލި މައްސަލައިގައި ދައުވާ އުފުލާފައިވާ އަދި ފިއްލަވައިގެން އުޅުއްވި ބޭފުޅެކެވެ.

މުޝައްރަފަކީ މިލިޓަރީ ލީޑަރެކެވެ. އެމަނިކުފާނަށް ހަތަރު ތަރި ލިބިވަޑައިގެންފައިވާއިރު ޕާކިސްތާނުގައި އަސްކަރީ ވެރިކަމެއް ކުރައްވާފައިވަނީ 1999 ވަނަ އަހަރު ލޭއޮހޮރުވުމަކާއެކު ކުރި ބަޣާވާތަކަށްފަހުއެވެ. އެއަށްފަހު އަމިއްލަފުޅަށް އަރުވާލެވިގެން ހުންނަވަނީ ދުބާއީގައެވެ.