ވ. އާރަށު ޚިޔާނާތުގެ މައްސަލާގައި ކުރީގެ ރައީސް އަބްދުﷲ ޔާމީންގެ ފަރާތްޕުޅުންނާއި ޔޫސުފް ނައީމްގެ ފަރާތުން ހުށަހަޅާފައިވާ އިސްތިއުނާފުގެ އަޑުއެހުން ކެންސަލްވެއްޖެއެވެ.

މި އަޑުއެހުން ތާވަލުކޮށްފައި އޮތީ ބުދަ ދުވަހުގެ މެންދުރު 14:00 އަށެވެ. އަޑުއެހުން ކެންސަލްކޮށްފައިވަނީ ދައުލަތުގެ ވަކީލުން ބަލިވެ އުޅޭތީ ދައުލަތުން އެދިގެންނެވެ.

މި މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ 16 އޯގަސްޓު 2023 ގައެވެ. އެ ދުވަހު ކުރިއަށްދިޔައީ ދައުލަތުން އިސްތިއުނާފަށް ދީފައިވާ ރައްދާ ގުޅޭގޮތުން އިސްތިއުނާފު ހުށަހެޅި ފަރާތުން ވާހަކަ ދެއްކުމެވެ.

ޔާމީނުގެ ވަކީލުން ބުނެފައިވަނީ، މަގާމުގެ ނުފޫޒު ފޯރުވުމަށް ޔާމީނު ކުރެއްވި ކުޑަ މިންވަރެއްގެ އަމަލެއްވެސް ދައުލަތަށް ދެއްކިފައި ނުވާކަމަށެވެ.

މި އަޑުއެހުމުގައި ޔާމީން ވިދާޅުވީ، ދަށު ކޯޓުން ފަނޑިޔާރުން ނިންމެވުމަށް ވާސިލުވި ސަބަބުތަކާ ގުޅޭގޮތުން މައުޟޫއީ ބަހުސްގެ ތެރެއިން އެއްވެސް ކަމެއް ސާފުކުރައްވާފައި ނުވާކަމަށެވެ.

ދައުލަތުގެ ވަކީލުން ވަނީ މި މައްސަލާގައި ގެއްލިފައިވަނީ ފަސްލައްކަ ރައްޔިތުންގެ ހައްގުކަން ފާހަގަކޮށް، މި މައްސަލާގައި ދަށު ކޯޓުން ނިންމާފައިވާ ނިންމުމަށް ބަދަލެއް ގެންނަންޖެހޭ ތަނެއް ނެތްކަމަށް ކަނޑައަޅުއްވައިދެއްވުމަށް އެދިފައެވެ.

މަނީ ލޯންޑަރިންގއާއި ރިޝްވަތު ގަބޫލުކުރުމުގެ ކުށުގެ ދައުވާ ސާބިތުވެ، ޔާމީނަށް 11 އަހަރުގެ ޖަލު ހުކުމެއް ވަނީ އިއްވާފައެވެ. އަދި 5 މިލިއަން ޑޮލަރުން ވަނީ ޖޫރިމަނާވެސް ކޮށްފައެވެ. ނަމަވެސް ޔާމީނުގެ ފަރާތްޕުޅުން ހުށަހެޅި، ހުކުމް ތަންފީޒުކުރުން ފަސްކުރުމުގެ މައްސަލަ ބަލައި ހައިކޯޓުން ވަނީ، ޖޫރިމަނާއާގުޅޭ ބައިގެ ހުކުމް ތަންފީޒުކުރުން ފަސްކުރުމަށާއި، ޖަލު އަދަބު ތަންފީޒުކުރުން ފަސް ކުރެވެން ނެތް ކަމަށް ނިންމާފައެވެ.

އާރަށު ޚިޔާނާތުގެ މައްސަލާގައި ޔޫސުފް ނައީމަށް ކޮށްފައިވަނީ ރިޝްވަތު ދިނުމުގެ ކުށުގެ ދައުވާއެވެ. އެ ދައުވާ ސާބިތުވެ، އޭނާ 3 އަހަރާއި 2 މަހާއި 12 ދުވަހަށް ޖަލަށް ލުމަށް ކްރިމިނަލް ކޯޓުން ވަނީ ހުކުމްކޮށްފައެވެ.