ވިސާމްގެ މައްސަލަ އިސްތިއުނާފު ކުރީ ފުރައްސާރަކުރަން، މައްސަލަ އަނބުރާ ގެންދަންޖެހޭ: ސީޕީޖޭ

ރާއްޖެޓީވީގެ ޒުވާން ނޫސްވެރިޔާ މުޙައްމަދު ވިސާމްގެ މައްސަލަ އިސްތިއުނާފުކުރީ ރާއްޖޭގެ ނޫސްވެރިންނަށް ފުރައްސާރަ ކުރަން ކަމަށާއި އެ މައްސަލަ އަނބުރާ ގެންދިއުމަށް، ނޫސްވެރިންގެ ދިފާއުގައި މަސައްކަތްކުރާ ބައިނަލްއަގުވާމީ ޖަމާއަތެއްކަމުގައިވާ ސީޕީޖޭއިން ބުނެފި އެވެ.

ފުލުހުންގެ ވާޖިބަށް ހުރަސްއެޅި ކަމަށް ބުނާ މައްސަލައިގެ ދައުވާ ވިސާމްގެ މައްޗަށް ސާބިތު ނުވާ ކަމަށް ކްރިމިނަލް ކޯޓުން ކަނޑައަޅާފައިވާއިރު، އެ މައްސަލަ ޕްރޮސިކުއުޓާ ޖެނެރަލް އިސްތިއުނާފުކޮށްފައި ވަނީ އޭޕްރީލް 5، 2017 ގަ އެވެ.

Advertisement

އެއީ އިސްތިއުނާފު ކުރެވޭނެ މައްސަލައެއް ނޫން ކަމަށް ސީޕީޖޭއިން ބުނެ އެވެ.

"ވިސާމްގެ މައްސަލައަކީ އަސްލެއް ނެތް މައްސަލައަކަށްވާއިރު، އެ މައްސަލަ ޕްރޮސިކިއުޓްކޮށް ކުރިއަށް ގެންދިއުމަކީ ޕްރޮސިކިއުޓަ ޖެނެރަލް ރާއްޖޭގެ ހުރިހާ ނޫސްވެރިންނަށް ފުރައްސާރަކުރުން،" ސީޕީޖޭގެ ބަޔާނުގައި ވެއެވެ.

"ވިސާމް އަދާކުރީ ނޫސްވެރިއެއްގެ ވާޖިބު، ދައުވާކުރެވިގެން ނުވާނެ."

ވިސާމްގެ މައްޗަށް ކުށް ސާބިތުނުވާ ކަމަށް ކްރިމިނަލް ކޯޓުން ނިންމި ނިންމުން ހައިކޯޓުގައި އިސްތިއުނާފުކުރުމަށް ޕްރޮސިކިއުޓަރ ޖެނެރަލް ނިންމެވި ނިންމެވުމާ ގުޅިގެން ރާއްޖެޓީވީން އާންމުކުރި ބަޔާނެއްގައި ބުނެފައިވަނީ، ހުކުމް، އިސްތިއުނާފު ކުރެއްވުމަށް ޕްރޮސެކިއުޓަރ ޖެނެރަލް ނިންމެވުމަކީ އެއްވެސް ހާލެއްގައި ބަލައިގަނެވޭނެ ނިންމެވުމެއް ނޫން ކަމަށެވެ. އަދި އެއީ ޕްރޮސެކިއުޓަރ ޖެނެރަލް ނިންމެވި ލަދުވެތި ނިންމެވުމެކަމަށާއި، އެ ނިންމުމަކީ، ނޫސްވެރިން ބިރުގެންނެވުމަށް ނިންމެވި ނިންމެވުމެއްކަމަށް ބުނެފައިވެއެވެ.

ވިސާމުގެ މައްޗަށް ދައުވާ އުފުލާފައިވަނީ 2015 ވަނަ އަހަރުގެ މާޗް 25 ވަނަ ދުވަހު އިދިކޮޅު ފަރާތްތަކުން މާލޭގައި މުޒާހަރާ ކުރަމުންދަނިކޮށް، ފުލުހުން ބަންދުކޮށްފައިވާ ސަރަހައްދަކަށް ވަދެ ފުލުހުންގެ ދައުރަށް ހުރަސް އަޅާފައިވާ ކަމަށް ބުނެ އެވެ. މިދިޔަ އަހަރުގެ އޭޕްރީލް 5 ވަނަ ދުވަހު އުފުލި ދައުވާގެ ހުކުމް އިއްވާފައިވަނީ މިދިޔަ މާޗް މަހުގެ 28 ވަނަ ދުވަހު އެވެ. ދައުވާ އަށް އިންކާރުކޮށް، ދިފާއީ ހެކީންގެ ގޮތުގައި ހަތަރު ހެއްކަކު ވިސާމް އެވެ. ވިސާމުގެ މައްޗަށް ދައުވާ ސާބިތުކުރުމަށް ދައުލަތުން ހުށަހެޅީ ދެ ފުލުހުންނާއި ވީޑިއޯ ފޫޓޭޖެކެވެ.

އެ މައްސަލައިގައި ހުކުމް އިއްވަމުން ގާޒީ އަހުމަދު ޝަކީލް ވިދާޅުވީ ވިސާމުގެ މައްޗަށް ދައުވާ ސާބިތުކުރުމަށް ދައުލަތުން ހުށަހެޅި ވީޑިއޯ ފޫޓޭޖްގެ ޗެއިން އޮފް ކަސްޓޮޑީ ރިޕޯޓް ހުށަހަޅާފައިނުވާތީ ވީޑިއޯގެ ސައްޚަ ކަމާ މެދު ސުވާލު އުފެދޭ ކަމަށެވެ.

އަދި އެ ވީޑިއޯ އިން ވިސާމް ހައްޔަރުކުރާ މަންޒަރު ނުފެންނަ ކަމަށާއި، ވީޑިއޯ އިން ފެންނަނީ ވިސާމު ހައްޔަރުކުރި ފަހުން ނަގާފައިވާ މަންޒަރުތަކެއް ކަމަށް ވެސް ގާޒީ ވިދާޅުވި އެވެ.

މި މައްސަލަ ވިސާމްގެ މައްޗަށް ސާބިތުނުވާއިރު، ނޮވެމްބަރު 2، 2015 ވަނަ އަހަރު ވިސާމް އާއި ލީވާން އަލީ ނާސިރު އަދި ރާއްޖެޓީވީގެ ޗީފް އޮޕަރޭޓިން އޮފިސަރު ހުސައިން ފިޔާޒު މޫސާ ހައްޔަރުކުރި މައްސަލައާ ގުޅިގެން، ވިސާމާއި ލީވާންގެ މައްޗަށް ކުށް ސާބިތުވާ ކަމަށް ކަނޑައަޅައި 28،800ރ. އިން ވަނީ ޖޫރިމަނާކޮށްފަ އެވެ. ފިޔާޒުގެ މައްސަލަ އޮތީ ހުލާސާ ބަޔާން އިއްވުމާ ހަމައިގަ އެވެ.