ފުލުހުންެގެ ދައުރަށް ހުރަސްއެޅި ކަމަށް ބުނެ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު އަހުމަދު މަޚުލޫފްގެ މައްޗަށް އިއްވި ހަ މަސް ދުވަހުގެ ޖަލު ހުކުމް ތަންފީޒްކޮށް ނިމުނުތާ، ދެ މަސް ވީއިރު ވެސް އިސްތިއުނާފު އަޑުއެހުންތައް ނުފަށާތީ އާއިލާ އިން ކަންބޮޑުވުން ފާޅުކޮށްފި އެވެ.
ފުލުހުންގެ ދައުރަށް ހުރަސްއެޅި ކަމަށް ބުނެ މަޚުލޫފް ހަ މަސް ދުވަހަށް ޖަލަށް ލުމަށް ކްރިމިނަލް ކޯޓުން ހުކުމްކުރީ މިދިޔަ އަހަރުގެ ޖުލައި 25 ވަނަ ދުވަހު އެވެ. އެ ހުކުމް އިސްތިއުނާފަށް ހުށަހަޅާފައިވާއިރު، އިސްތިއުނާފު ޝަރީއަތް ނުފަށަނީސް މިއަހަރުގެ ޖެނުއަރީ 17 ވަނަ ދުވަހު ހުކުމް ތަންފީޒްކޮށް ވަނީ ނިމިފަ އެވެ.
ރާއްޖެއެމްވީ އަށް މައުލޫމާތު ދެއްވަމުން މަޚުލޫފް އަނބިކަނބަލުން ނަޒްރާ ނަސީމް ވިދާޅުވީ އިސްތިއުނާފު ޝަރީއަތް ނުބައްވައި މިހާ ގިނަ ދުވަސް ފާއިތުވުމަކީ ކަންބޮޑުވާންޖެހޭ ކަމެއް ކަމަށާއި މިކަމުން ހާމަވަނީ ހައިކޯޓުގެ ޒިންމާދާރުކަން ކުޑަކަން ކަމަށެވެ. އަދި ހުކުމް އެއްކޮށް ތަންފީޒްކޮށް ނިމިގެން ގޮސް މިހާ ގިނަ ދުވަސް ފާއިތުވިއިރު ވެސް، އިސްތިއުނާފު ނުފެށުމުން ހާމަވަނީ އަދުލު އިންސާފުގެ ނިޒާމު އޮތް ހާލަތު ކަމަށް ވެސް ނަޒްރާ ވިދާޅުވި އެވެ.
ނަޒްރާ ވަނީ ވީހާ ވެސް އަވަހަކަށް މަޚުލޫފްގެ އިސްތިއުނާފު ޝަރީއަތް ފަށައި، އިންސާފު ގާއިމްކޮށްދިނުމަށް ގޮވާލައްވާފަ އެވެ.
އިސްތިއުނާފު ނުފަށައި ލަސްވަމުންދާތީ މިދިޔަ އަހަރުގެ ސެޕްޓެމްބަރުގައި މަޚުލޫފް ފަރާތުން ހައިކޯޓުގެ އިސް ފަނޑިޔާރު އަބްދުﷲ ދީދީ އަށް ސިޓީއެއް ފޮނުވާފައި ވެސް ވެއެވެ. ނަމަވެސް، ފަނޑިޔާރު އަބްދުﷲ ދީދީގެ ސެކްޝަނަށް ފޮނުވާފައި އެ މައްސަލަ ނުފެށިގެން އުޅޭ ސަބަބެއް ހާމައެއް ނުކުރެ އެެވެ.
މަޚުލޫފްގެ އިސްތިއުނާފު ލަސްވަމުންދާ ސަބަބު ހޯދުމަށް ތަކުރާރުކޮށް ރާއްޖެއެމްވީ އިން ކުރި މަސައްކަތް ވެސް ވަނީ ކާމިޔާބުވާގޮތް ނުވެފަ އެވެ.
ހުކުމް ތަންފީޒްކޮށް ނިމިގެން ދިޔަތާ ދެ މަސް ދުވަސްވީއިރު ވެސް، އިސްތިއުނާފު ޝަރީއަތް ފަށާފައި ނުވާތީ މަޚުލޫފް އަނބިކަނބަލުން ވަނީ މީގެ ކުރިން ވެސް ކަންބޮޑުވުން ފާޅުކުރައްވާފަ އެވެ.
މަޚުލޫފްގެ މައްޗަށް ޖުމްލަ 10 މަހާއި 24 ދުވަހުގެ ޖަލު ހުކުމްތަކެއް އިއްވާފައިވާއިރު، މިހާރު ތަންފީޒް ކުރައްވަމުން ގެންދަވަނީ ފުލުހުންގެ ދައުރަށް ދަތިކުރި ކަމަށް ބުނެ އިއްވާފައިވާ ހަތަރު މަހާއި 24 ދުވަހުގެ ޖަލު ހުކުމެވެ. އެ ހުކުމް ތަންފީޒްކޮށް ނިންމައި މަޚުލޫފް މިނިވަން ވާނީ ޖޫން މަހުގެ 6 ވަނަ ދުވަހު އެވެ.
