ގާނޫނު ތަންފީޒްކުރާ މުވައްޒަފެއްގެ މަސައްކަތަށް ގަސްދުގައި ހުރަސްއެޅުމުގެ ކުށުގެ ދައުވާ ސާބިތުކޮށް، ރާއްޖެޓީވީގެ ނޫސްވެރިޔާ މުހައްމަދު ވިސާމާއި ލީވާން އަލީ ނާސިރު ޖޫރިމަނާކުރުމަށް ކްރިމިނަލް ކޯޓުން ކުރި ހުކުމް އިސްތިއުނާފު ކުރުމަށް ހުށަހަޅައިފި އެވެ.

ކްރިމިނަލް ކޯޓުން ކުރި ހުކުމް މިއަދު އިސްތިއުނާފުކޮށްފައިވާ އިރު ވިސާމާއި ލީވާންގެ މައްޗަށް އުފުލި ދައުވާގެ ޝަރީއަތުގައި ޖެނުއަރީ 24 ވަނަ ދުވަހު ގާޒީ އަހުމަދު ޝަކީލް ވަނީ ވިސާމާއި ލީވާން، ކޮންމެ މީހަކު 28،800 ރުފިޔާ އިން ޖޫރިމަނާކޮށްފައެވެ.

އެދުވަހު ހުކުމް އިއްވަމުން ގާޒީ ޝަކީލު ވިދާޅުވީ ގާނޫނު ތަންފީޒްކުރާ މުވައްޒަފެއްގެ މަސައްކަތަށް ގަސްދުގައި ހުރަސް އެޅުމަކީ ޖުނަހުގެ ކުޑަ ކުށެއް ކަމަށެވެ. އަދި ވިސާމާއި ލީވާނުގެ ކުށުގެ ރެކޯޑެއް މީގެ ކުރިން ނެތްކަން ފާހަގަކުރައްވަމުން ގާޒީ ޝަކީލް ވިދާޅުވީ މި ކުށުގެ އަސާސީ އަދަބަކީ ހަތަރު މަހާއި 24 ދުވަހުގެ ޖަލު ހުކުމެއް ކަމަށެވެ.

ނަމަވެސް، ކުށުގެ ރެކޯޑެއް ނެތުމުން އެކަމަށް ރިއާޔަތްކޮށް އަދަބު ކަނޑައެޅުމުގެ ބާރު މައްސަލަ ބައްލަވާ ގާޒީ އަށް ލިބިފައިވާކަން ފާހަގަކުރައްވާ ގާޒީ ޝަކީލު ހުކުމް ކުރެއްވީ 28،800ރ. އިން ޖޫރިމަނާ ކުރުމަށެވެ.

ވިސާމާއި ލީވާން ޖޫރިމަނާކުރުމަށް ގާޒީ ހުކުމް ކުރެއްވި އިރު، އަދަބު ކަނޑައެޅުމަށް މިދިޔަ މަހު ބޭއްވި އަޑުއެހުމުގައި ދައުލަތުން ހުށަހަޅާފައިވަނީ ވިސާމާއި ލީވާން ހަތަރު މަހާއި 24 ދުވަހަށް ޖަލަށް ލުމަށެވެ.

ވިސާމާއި ލީވާންގެ މައްޗަށް އުފުލި ދައުވާގައި ބުނެފައިވަނީ 2015 ވަނަ އަހަރުގެ ނޮވެމްބަރު ދެ ވަނަ ދުވަހުގެ ރޭ ފުލުހުންނާއި ސިފައިން ގުޅިގެން މާފަންނު ސްޓޭޑިއަމް ސަރަހައްދުގައި އޮޕަރޭޝަނެއް ހިންގަމުން ދަނިކޮށް، އެ ސަރަހައްދުން އަމުރަށް ނުކިޔަމަންތެރިވި މީހަކު ހައްޔަރުކުރުމަށް މަސައްކަތް ކުރަނިކޮށް، އެކަން ހުއްޓުވައި، ފުލުހުންގެ މަސައްކަތަށް ވިސާމާއި ލީވާން ހުރަސް އަޅާފައިވާ ކަމަށެވެ.

ވިސާމުގެ މައްޗަށް ފުލުހުންގެ ދައުރަށް ހުރަސް އެޅުމުގެ ކުށުގެ ދައުވާ ވެސް އުފުލާފައިވާއިރު، ފުލުހެއްގެ ގައިގާ އަތްލި ކަމަށްބުނެ ރާއްޖެޓީވީގެ ސީއޯއޯ ހުސެއިން ފިޔާޒް މޫސާގެ މައްޗަށް ދައުވާ އުފުލާ ޝަރީއަތް ކުރިއަށްދާ އިރު، ކެމަރާމަން އާދަމް ޒަރީރުގެ މައްޗަށް ކޮށްފައިވާ ދައުވާގެ ހުކުމް ކުރުން މި ފެބްރުއަރީ މަހުގެ 27 ވަނަ ދުވަހަށް ވަނީ ތާވަލުކޮށްފަ އެވެ.