ޖުމްހޫރީ ޕާޓީގެ ލީޑަރު ގާސިމް އިބްރާހިމް ރާއްޖެއިން ބޭރަށް ފުރުން މަނާކޮށް ކްރިމިނަލް ކޯޓުން ނެރެފައިވާ އަމުރު ހައިކޯޓުގެ އިސްތިއުނާފަށް ހުށަހަޅައިފި އެވެ.

ގާސިމްގެ މައްޗަށް ފުލުހުން ތުހުމަތު ކުރާ ރިޝްވަތު ދިނުމުގެ މައްސަލައިގެ ތަހުގީގަށް މިދިޔަ މަހުގެ 29 ވަނަ ދުވަހު ފުލުހުންގެ އިދާރާއަށް ހާޒިރުކޮށް، އެއް މަސް ދުވަހަށް ރާއްޖެއިން ބޭރަށް ފުރުން މަނާކޮށް ކްރިމިނަލް ކޯޓުން ނެރެފައިވާ އަމުރެއް ގާސިމާ ވަނީ ހަވާލުކޮށްފަ އެވެ.

ގާސިމްގެ މައްޗަށް ތުހުމަތު ކުރާ ރިޝްވަތު ދިނުމުގެ މައްސަލައިގައި އޭނާގެ މައްޗަށް ދައުވާކޮށްދިނުމަށް އެދި ފުލުހުން ވަނީ އާދިއްތަ ދުވަހު ޕްރޮސެކިއުޓާ ޖެނެރަލްގެ އޮފީހަށް މައްސަލަ ހުށަހަޅާފަ އެވެ. ޕްރޮސެކިއުޓާ ޖެނެރަލްގެ އޮފީހުން އެކަން ކަށަވަރުކޮށްދެ އެވެ.

ޖުމްހޫރީ ޕާޓީގެ އޮފީސް، މ. ކުނޫޒުގައި ގާސިމްގެ ގާނޫނީ ވަކީލުންގެ ޓީމުން ބުދަ ދުވަހު ބޭއްވި ނޫސްވެރިންގެ ބައްދަލުވުމެއްގައި ގާނޫނީ ވަކީލު މަސްތޫރު ހުސްނީ ވިދާޅުވީ ދަތުރުފަތުރުކުރުމުގެ ހައްގަކީ ގާނޫނު އަސާސީން ކަށަވަރުކޮށްދޭ އަސާސީ ހެއްގެއް ކަމަށެވެ. އަދި އެ ހައްގު ހަނިކުރެވިދާނެ ހާލަތުތަކެއް ވެސް ގާނޫނު އަސާސީގައި ބަޔާން ކޮށްފައިވާ ކަމަށް އޭނާ ވިދާޅުވި އެވެ.

މަސްތޫރު ވިދާޅުވީ ފުލުހުންގެ ތަހުގީގު ނިންމައި އެ މައްސަލަ ޕްރޮސެކިއުޓާ ޖެނެރަލްގެ އޮފީހަށް ފޮނުވާފައިވާއިރު، އެ އަމުރު ދެމިއޮތުމުގެ ބޭނުން މިހާރު ކެނޑިފައިވާ ކަމަށެވެ. އެހެންކަމުން އެ އަމުރު ބުދަ ދުވަހު ހައިކޯޓުގެ އިސްތިއުނާފަށް ހުށަހަޅާފައިވާ ކަމަށް އޭނާ ވިދާޅުވި އެވެ.

އޭނާ ވިދާޅުވީ މައްސަލަ ހައިކޯޓުގައި އިސްތިއުނާފު ކުރި ނަމަވެސް، ގާސިމް ރާއްޖެއިން ބޭރަށް ފުރާވަޑައިނުގަންނަވާނެ ކަމުގެ ޔަގީންކަން ދެއްވާ ކަމަށެވެ. އަދި ގާސިމްގެ މައްޗަށް ކުރާ ތުހުމަތަކީ އެއްވެސް އަސްލެއް ނެތް ސިޔާސީ ގޮތުން އުފައްދާފައިވާ މައްސަލައެއް ކަމަށް އޭނާ ވިދާޅުވި އެވެ.

ގާސިމްގެ މައްޗަށް ކުރާ ތުހުމަތާ ގުޅިގެން އާދިއްތަ ދުވަހު ވެސް ގާސިމް ފުލުސް އޮފީހަށް ހާޒިރުކުރި އެވެ. ފުލުސް އޮފީހަށް ހާޒިރުކޮށް ކޯޓު އަމުރެއްގެ ދަށުން ގާސިމްގެ އަޑުގެ ސާމްޕަލްއަކާއި ފޮޓޯތަކެއް ފުލުހުން ވަނީ ނަގާފަ އެވެ. އެ މައްސަލައިގެ ތަހުގީގުގައި ގާސިމް ބޭނުންކުރެއްވީ ގާނޫނު އަސާސީން ލިބިދޭ ހަނުހުރުމުގެ ހައްގެވެ.