މިއާމީގެ ކޯޗު މާޓިނޯގެ ތައުރީފް މެސީ އަށް!
އޭނާ ބުނީ މެސީ އަކީ ވަރަށް ވިސްނުންތެރިކަމާއެކު، އެންމެ ހީނުކުރާ ދިމާލަށް ވެސް ބޯޅަ ޖައްސައިގެން ގޯލު ޖަހާނެ ކުޅުންތެރިޔެއް ކަމަށް
މިއާމީން ކުޅުނު މެޗެއްގައި ކޯޗު މާޓިނޯ އަދި މެސީ
އިންޓަރ މިއާމީ އަށް ކުޅެމުން އަންނަ އާޖެންޓީނާގެ ކެޕްޓަން ލިއޮނަލް މެސީ އަށް އެ ޓީމުގެ ކޯޗު ޖެރާޑޯ މާޓިނޯ ވަރަށް ބޮޑަށް ތައުރީފު ކޮށްފި އެވެ.
އޭނާ މިގޮތަށް ވާހަކަ ދެއްކީ އެމެރިކާ ލީގްސް ކަޕްގެ ކުއާޓަރ ފައިނަލުން މޮޅުވެ، މިއާމީ ސެމީ ފައިނަލަށް ދަތުރު ކުރި މެޗަށްފަހު އެވެ. މާޓިނޯ ބުނީ ކުރިން ވެސް އޭނާ އަށް މެސީ އިނގޭ ކަމަށެވެ. އަދި މެސީ އަކީ ކޮން ފެންވަރެއްގެ ކުޅުންތެރިޔެއް ކަން ވެސް އިނގޭ ކަމަށާއި، މެސީގެ ހުނަރާއި، ދަނޑު މަތީގައި އޭނާ ދައްކަމުން އަންނަ ތަފާތު ކުޅުމަކީ އެންމެން ވެސް ހައިރާންވާ ކަމެއް ކަމަށެވެ. ސްޕެއިންގެ ބާސެލޯނާ ގެއިތުރުން އާޖެންޓީނާގެ ޤައުމީ ޓީމުގައި ވެސް މެސީ އަށް އިރުޝާދު ދީފައިވާ މާޓިނޯ ބުނީ، އިދިކޮޅު ޓީމުގެ ގޯލު ކުރިމަތިން ކޮންމެ ހިސާބަކުން ވެސް މެސީ އަކީ ނުރައްކާ ކުޅުންތެރިޔެއް ކަމަށެވެ. އޭނާ ބުނީ މެސީ އަކީ ވަރަށް ވިސްނުންތެރިކަމާއެކު، އެންމެ ހީނުކުރާ ދިމާލަށް ވެސް ބޯޅަ ޖައްސައިގެން ގޯލު ޖަހާނެ ކުޅުންތެރިޔެއް ކަމަށެވެ. އެހެންކަމުން މިއާމީގައި މެސީ ހުރުމަކީ އެ ޓީމަށް ވެސް އަދި އޭނާ ކުރަން އޮތް މަސައްކަތަށް ވެސް ވަރަށް ބޮޑު ފަސޭހައެއް ކަމަށް މާޓިނޯ ވަނީ ބުނެފަ އެވެ.
މީގެ އިތުރުން އޭނާ ބުނީ މިއާމީން ދާދި ފަހުން ހޯދި ދެ ކުޅުންތެރިން ކަމަށްވާ، ފަކުންޑޯ ފާރިއާސް އަދި ތޯމަސް އެވައިލްސް ވެސް ކުރިއަށް ހުރި ފަރިތަކުރުންތަކުގައި ބައިވެރިވާނެ ކަމަށެވެ. ކުރިއަށް އޮތް ސެމީ ފައިނަލް މެޗުގައި އެ ދެ ކުޅުންތެރިންނަށް ކުޅެވޭނެކަން ޔަގީން ނުވި ނަމަވެސް، ޓީމާއެކު ދަތުރު ކުރާނެ ކަމަށް ވެސް މާޓިނޯ ވަނީ ބުނެފަ އެވެ. އޭނާ ބުނީ ޓީމެއްގެ ގޮތުގައި މިއާމީގެ ކުޅުންތެރިން ދައްކަމުން އަންނަ ރޫހާއި، ހިތްވަރަކީ އޭނާ އަށް އޮތް ހިތްހަމަ ޖެހުމެއް ކަމަށެވެ. އެހެންކަމުން މިއާމީ އަށް ލީގްސް ކަޕްގެ ސެމީ މެޗު ކާމިޔާބުކޮށް، ފައިނަލަށް ދެވޭނެ ކަމަށް އޭނާ ދެކެ އެވެ. ތަށީގެ ވާހަކަ ދައްކަން މާޓިނޯ ބޭނުންވަނީ ސެމީ މެޗަށްފަހު އެވެ.
އުމުރުން 60 އަހަރުގެ މާޓިނޯ މިއާމީގެ ކޯޗަކަށް ހަމަޖެއްސީ މިދިޔަ ޖުލައި މަހުގެ 10 ވަނަ ދުވަހު އެވެ.
