އިންޓަރ މިއާމީ އަށް ކުޅެމުން އަންނަ އާޖެންޓީނާގެ ކެޕްޓަން ލިއޮނަލް މެސީ، އެ ކުލަބާ އެކު ސޮއި ކޮށްފައިވާ އެއްބަސްވުން އައު ކުރުމުގެ މަޝްވަރާތައް ފަށާފައިވާ ކަމަށާއި، އެއްބަސްވުން އައު ކުރުމުގެ ފުރުސަތު ބޮޑު ކަމަށް މީޑިއާ ރިޕޯޓުތައް ބުނެފި އެވެ.'

ފްރާންސްގެ ޕެރިސް ސެއިންޓް ޖާމަން (ޕީއެސްޖީ) ދޫކޮށްލުމަށް ފަހު، މެސީ މިއާމީ އަށް ބަދަލުވީ 2023 ވަނަ އަހަރު އެވެ. އެ ކުލަބާ އެކު އޭނާ ސޮއި ކުރީ ދެ އަހަރާ ބައިގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ މިއަހަރުގެ ނިޔަލަށެވެ.

މީޑިއާ ތަކުގައި ބުނެފައިވާ ގޮތުން މިއާމީ އިން އޮތީ މެސީގެ އެއްބަސްވުން އައު ކުރަން ބޭނުންވެފަ އެވެ. މީގެ ކުރިން އެ ކުލަބުގެ އިސްވެރިން ވެސް ވަނީ، މިއާމީ އިން މެސީގެ އެއްބަސްވުން އައު ކުރަން ބޭނުންވާ ކަމަށް ބުނެފަ އެވެ. އަދި އެކަމާ ގުޅުން ހުރި މަޝްވަރާތައް ވެސް ކުރިއަށް ގެންދާނެ ކަމަށް ވަނީ ބުނެފަ އެވެ.

އެމެރިކާގެ މީޑިއާ ތަކުގައި ބުނެފައިވާ ގޮތުން، މިހާރު މިއާމީ އިން އަންނަނީ މެސީ އާއެކު އައު އެއްބަސްވުމެއްގެ މަޝްވަރާތައް ކުރިއަށް ގެންދަމުންނެވެ. އެހެން ނަމަވެސް، މިހާތަނަށް ވަކި ގޮތެއް ނިމިފައި ނުވާ ކަމަށާއި، ކުރިއަށް އޮތް ދުވަސް ތަކުގެ ތެރޭގައި އެކަމަށް ގޮތެއް ނިމޭނެ ކަމަށް ވަނީ ބުނެފަ އެވެ.

މީގެ އިތުރުން މީޑިއާ ތަކުގައި ބުނެފައިވާ ގޮތުން އަންނަ އަހަރުގެ ފީފާ ވޯލްޑް ކަޕް އެމެރިކާ ގައި އޮންނައިރު، މެސީ މިއާމީގެ އެއްބަސްވުން އައު ކުރާނެ ކަމަށް ވަރަށް ބޮޑަށް ބެލެވެ އެވެ. އެގޮތުން އެމެރިކާގައި ވޯލްޑް ކަޕް އޮންނާނީ، މެސީ ހުރީ އެ ޤައުމުގައި ކުޅެން ބޭނުންވެފައި ކަމަށް ވަނީ ބުނެފަ އެވެ.

މެސީ ވަނީ މިހާތަނަށް މިއާމީ އަށް ކުޅެދިން 75 މެޗުގައި 62 ލަނޑު ޖަހައިފަ އެވެ. އެ ކުލަބާ އެކު އޭނާ ވަނީ ލީގްސް ކަޕްގެ އިތުރުން، ސަޕޯޓާސް ޝީލްޑް ވެސް ކާމިޔާބު ކޮށްފަ އެވެ. މެސީ ގެނައުމަށް ފަހު، މިއާމީ އިން ވަނީ ބައެއް މަޝްހޫރު ކުޅުންތެރިން ވެސް އެ ކުލަބަށް ގެނެސްފަ އެވެ.

މިއާމީ އިން މެސީގެ އެއްބަސްވުން އައު ކުރުމުގެ މަޝްވަރާތައް ކުރިއަށް ގެންދަމުން އަންނައިރު، ބައެއް އެހެން ކުލަބު ތަކުން އޮތީ މެސީ ހޯދުމުގެ ޝައުޤުވެރިކަން ފާޅު ކޮށްފަ އެވެ. އެގޮތުން ސައުދީ ޕްރޯ ލީގުގެ އަލް ޙިލާލް އިން މެސީ ގެންނަން ބޭނުންވާ ކަމަށް މީޑިއާ ތަކުގައި ވަނީ ބުނެފަ އެވެ.