ކުޅު ޖެހި މައްސަލައިގައި ސުއަރޭޒް އަށް ހަ މެޗުގެ ސަސްޕެންޝަނެއް

ލީގްސް ކަޕްގެ ފައިނަލް މެޗުގައި ސީޓަލް ސައުންޑާސްއާ ދެކޮޅަށް ކުޅުނު މެޗުގައި، އިންޓަރ މިއާމީ އަށް ކުޅެމުން އަންނަ އުރުގުއޭގެ ލުއިސް ސުއަރޭޒް، އިދިކޮޅު ޓީމުގެ އޮފިޝަލެއްގެ ގަޔަށް ކުޅު ޖެހި މައްސަލައިގައި އޭނާ އަށް ފިޔަވަޅު އަޅައިފި އެވެ.

މިދިޔަ ހޯމަ ދުވަހު ކުޅުނު ލީގްސް ކަޕްގެ ފައިނަލް މެޗުގައި މިއާމީ ވަނީ، ސީޓަލް ސައުންޑާސް އަތުން ބަލިވެފަ އެވެ. އެ މެޗަށް ފަހު ސުއަރޭޒް ވަނީ، އިދިކޮޅު ޓީމުގެ އޮފިޝަލެއްގެ ގަޔަށް ކުޅު ޖަހައިފަ އެވެ. އެކަމާ ގުޅިގެން ސުއަރޭޒްއާ ދެކޮޅަށް ފިޔަވަޅު އަޅާފައިވާއިރު، އޭނާ ވަނީ ހަ މެޗަށް ސަސްޕެންޑު ކޮށްފަ އެވެ.

ލީގްސް ކަޕްގެ ޑިސިޕްލިނަރީ ކޮމެޓީ އިން ނެރުނު ބަޔާނެއްގައި ބުނެފައި ވަނީ، ސުއަރޭޒްގެ ސަސްޕެންޝަން އޮންނާނީ އަންނަ އަހަރުގެ މުބާރާތުގެ މެޗުތަކަށް ކަމަށެވެ. ނަމަވެސް، ސުއަރޭޒްގެ އަމަލާ ގުޅިގެން، މޭޖާ ލީގު ސޮކާ (އެމެރިކާ ލީގު) އިން ބޭނުންވާ ނަމަ، ސުއަރޭޒް އަށް އިތުރު ފިޔަވަޅެއް އެޅިދާނެ ކަމަށެވެ.

ސުއަރޭޒްގެ އަމަލާ ގުޅިގެން އޭނާ ވަނީ އިންސްޓަގްރާމްގައި ކުރި ޕޯސްޓެއްގައި އެކަމަށް މައާފަށް ވެސް އެދިފަ އެވެ. މެޗަށް ފަހު ހިނގައި ދިޔަ ކަންތައްތަކާ ގުޅިގެން މައާފަށް އެދޭކަން ހާމަކޮށް ސުއަރޭޒް ބުނީ، އެކަން ހިނގައި ދިޔައީ ވަރަށް ބޮޑު ނުތަނަވަސްކަމެއްގެ ތެރޭގައި ހުރުމުން ކަމަށެވެ. އެކަމުގެ ސަބަބުން، ހިނގަން ނުޖެހޭ ކަންތައްތަކެއް ހިނގާފައިވާ ކަަމަށް ސުއަރޭޒް ބުންޏެވެ.

އިތުރަށް ސުއަރޭޒް ބުނީ، އޭނާ އަށް ކުށެއް ކުރެވިފައިވާ ކަމަށާއި، އެކަމާ ނިހާޔަތަށް މައާފަށް އެދެން ބޭނުންވާ ކަމަށެވެ. ސުއަރޭޒް ބުނީ އޭނާ އަށް ކުރެވުނު ކަމެއްގެ ސަބަބުން، އޭނާގެ އާއިލާ އާއި ކުލަބަށް އެއްވެސް ކަމެއް ރައްދުވާން ބޭނުން ނުވާ ކަމަށެވެ. އެހެންކަމުން އޭނާ އަށް ކުރެވުނު ކަަންތަކާ މެދު ހިތާމަ ކުރާ ކަމަށާއި، އޭނާ އަށް ކުރެވުނު ކުށް ޤަބޫލު ކުރުމަށް ފަހު، މައާފަށް އެދުމުގެ ފުރުސަތު ގެއްލުވާލަން ބޭނުން ނުވާ ކަމަށެވެ.

ކުރީގެ ކުލަބު ގްރެމިއޯ ދޫކޮށްލުމަށް ފަހު، ސުއަރޭޒް މިއާމީ އަށް ބަދަލުވީ 2024 ވަނަ އަހަރު އެވެ. ސުއަރޭޒް ވަނީ މިހާތަނަށް މިއާމީ އަށް ކުޅެދިން 77 މެޗުގައި 38 ލަނޑު ޖަހައިފަ އެވެ. އެ ކުލަބާ އެކު އޭނާ ވަނީ ސަޕޯޓާސް ޝީލްޑު ކާމިޔާބު ކޮށްފަ އެވެ.

ލީގްސް ކަޕް އިން އަންނަ އަހަރުގެ މުބާރާތަށް ސުއަރޭޒް ސަސްޕެންޑު ކޮށްފައިވާއިރު، މިއާމީ އާއެކު އޭނާ ސޮއި ކޮށްފައިވާ އެއްބަސްވުމުގެ މުއްދަތު މި ސީޒަންގެ ނިޔަލަށް ހަމަވާނެ އެވެ. ނަމަވެސް އެއްބަސްވުމުގެ މުއްދަތު ހަމަވުމުގެ ކުރިން، ސުއަރޭޒް މިއާމީގެ އެއްބަސްވުން އައު ކުރުމުގެ ފުރުސަތު އޮތް ކަމަށް މީޑިއާ ތަކުގައި ވަނީ ބުނެފަ އެވެ. އަދި އެކަމާ ގުޅޭ މަޝްވަރާތައް ކުރިއަށް ގެންދާނެ ކަމަށް ވެސް ބުނެފައިވެ އެވެ.