ކޮލަމްބިއާގެ އެޓޭކިން މިޑްފީލްޑަރު ހަމޭސް ރޮޑްރިގޭޒް ބްރެޒިލްގެ ސައޯ ޕައުލޯ އަށް ބަދަލުވެއްޖެ އެވެ.

މިއީ އުމުރުން 32 އަހަރުގެ ކުޅުންތެރިޔާ އޭނާގެ ކެރިއަރުގައި ކުޅޭނެ 10 ވަނަ ކުލަބެވެ. ކޮލަމްބިއާގެ އެންވިގާޑޯ އިން ސީނިއާ ކެރިއަރު ފެށި ރޮޑްރިގޭޒް ވަނީ ބެންފީލްޑް، ޕޯޓޯ، މޮނާކޯ، ރެއާލް މެޑްރިޑު، ބަޔާން މިއުނިކް، އެވަޓަން، އަލް ރައްޔާން އަދި އޮލިމްޕިއާކޯސް އަށް ކުޅެފަ އެވެ. މީގެ ތެރެއިން އޭނާ އެންމެ ބޮޑަށް ފާހަގަކޮށްލެވުނީ ޕޯޓޯ އާއި ރެއާލްގަ އެވެ. ޕޯޓޯ އަށް ކުޅެދިން 107 މެޗުގައި އޭނާ ވަނީ 32 ލަނޑު ޖަހައިފަ އެެވެ. އެއަށްފަހު މޮނާކޯ އަށް ބަދަލުވެ، އެ ކުލަބަށް 38 މެޗު ކުޅެދިންއިރު، ރެއާލުން އޭނާ ހޯދީ 2014 ވަނަ އަހަރު އެވެ. އޭގެ ފަހުން އެ ކުލަބުގައި ހޭދަކުރި ހަތަރު ސީޒަންގެ ތެރޭގައި ރޮޑްރިގޭޒް ވަނީ ރެއާލަށް 125 މެޗު ކުޅެދީ 37 ލަނޑު ޖަހައިފަ އެވެ، ރެއާލްގައި ހުއްޓާ ބަޔާނުން އޭނާ ހޯދީ ލޯނު އެއްބަސްވުމެއްގެ ދަށުންނެވެ.

ސައޯ ޕައުލޯ އާއެކު ރޮޑްރިގޭޒް ތަފާތު 10 ޤައުމެއްގެ 10 ކުލަބަކަށް ކުޅުނު ކަމަށް ވާނެ އެވެ. ސައޯ ޕައުލޯގެ ކުޅުންތެރިޔެއްގެ ގޮތުގައި އާދިއްތަ ދުވަހުގެ ވަގުތެއްގައި ރަސްމީކޮށް ރޮޑްރިގޭޒް ދައްކާާލުމަށް ވެސް ވަނީ ހަމަޖެހިފަ އެވެ. މިއަހަރުގެ އޭޕްރީލް މަހު އޮލިމްޕިއާކޯސް ދޫކޮށްލަން ނިންމިފަހުން މިހާތަނަށް އޭނާ ރަސްމީ އެއްވެސް މެޗެއް ކުޅެފައެއް ނުވެ އެވެ.