މެންޗެސްޓާ ޔުނައިޓެޑް ދޫކޮށްލުމަށް ފަހު ޖަރުމަންގެ ކުރީގެ މިޑްފިލްޑަރު ބަސްޓަން ސްވައިންސްޓައިގާ އެމެރިކާގެ ޗިކާގޯ ފަޔާއަށް ބަދަލުވެއްޖެ އެވެ.

ސްވައިންސްޓައިގާ ޗިކާގޯ އަށް ސޮއިކުރިކަން އެކްލަބުން ވެސް ކަށަވަރުކޮށްދީފައިވާއިރު، ޔުނައިޓެޑުން ވެސް ވަނީ އޭނާ އެ ކްލަބް ދޫކޮށްލިކަން ކަށަވަރުކޮށްދީފައެވެ.

ޔުނައިޓެޑް ދޫކޮށްލުމަށް ފަހު ސްވައިންސްޓައިގާ ޗިކާގޯ އަށް ބަދަލުވީ 4.5 މިލިއަން ޑޮލަށެވެ. ރިޕޯޓްތައް ބުނާ ގޮތުން އޭނާ އެ ކްލަބާއެކު އެއްބަސްވުން ހަދާފައި ވަނީ އެއް އަހަރު ދުވަހުގެ އެއްބަސްވުމެކެވެ. 

ގިނަ ކްލަބްތަކުން ޝައުގުވެރިކަން ފާޅުކޮށްފައިވާ ސްވައިންސްޓައިގާ ހޯދުމަށް އޭނާގެ ކުރީގެ ކްލަބް ބަޔާން މިއުނިކުން ވެސް މަސައްކަތްކޮށްފައިވާއިރު، ޗައިނާގެ ކްލަބްތަކުން ވެސް އޭނާ ހޯދުމަށް ބޮޑެތި ހުށަހެޅުންތަކެއް ހުށަހެޅި އެވެ.

ޗިކާގޯ އަށް ބަދަލުވުމަށް ފަހު ސްވައިންސްޓައިގާ ބުނީ އޭނާގެ ކެރިޔަރުގައި އަބަދުވެސް ބަލަނީ ފުރުސަތުތަކަށް ކަމަށާއި، އެގޮތުން މި ނިންމުމަކީ ވެސް ރަނގަޅު ނިންމުމެއް ކަމަށް ދެކޭ ކަމަށެވެ.

މީގެ އިތުރުން އޭނާ ބުނީ ޗިކާގޯގެ ޖެނެރަލް މެނޭޖަރާ ވާހަކަ ދައްކާފައިވާ ކަމަށާއި، ކްލަބުގެ ޕްރޮޖެކްޓާ އެއްގޮތަށް މަސައްކަތްތަކެއް ކޮށްދީ ކާމިޔާބީތައް ހޯދައިދިނުމަށް ކެތްމަދުވެފައިހުރި ކަމަށެވެ.

ބަޔާން މިއުނިކުން ކެރިޔަރު ފެށި ސްވައިންސްޓައިގާ ވަނީ އެ ކްލަބުގައި ހޭދަކުރި 13 ސީޒަނުގައި ކުޅުނު 500 މެޗުގައި 68 ލަނޑު ކާމިޔާބުކޮށްފައެވެ. މީގެ އިތުރުން އޭނާ ވަނީ އެ ކްލަބާއެކު 8 ޖަރުމަން ލީގު، 7 ޖަރުމަން ކަޕް، ޔުއެފާ ޗެމްޕިއަންސް ލީގުގެ އިތުރުން ޔުއެފާ ސުޕާކަޕް އަދި ފީފާ ކްލަބް ވޯލްޑްކަޕް ވެސް ކާމިޔާބުކޮށްފައެވެ.

ޖަރުމަން ގައުމީ ޓީމާއެކު 2006 ވަނަ އަހަރު އަދި 2010 ވަނަ އަހަރު ވޯލްޑްކަޕްގެ ތިންވަނަ ހޯދާފައިވާ ސްވައިންސްޓައިގާ ވަނީ 2014 ވަނަ އަހަރު ޖަރުމަން ޓީމާއެކު ވޯލްޑްކަޕް ކާމިޔާބުކޮށްފައެވެ. އޭނާ ޔުނައިޓެޑަށް ބަދަލުވީ 2015 ވަނަ އަހަރުގެ ސީޒަންގަ އެވެ. އެގޮތުން އޭނާ ވަނީ އެ ކްލަބަށް ކުޅުނު 35 މެޗުގައި ދެ ލަނޑު ކާމިޔާބުކޮށްފައެވެ.