ޔުނައިޓެޑަށް ބަދަލުވެ ރޫނީގެ 10 ނަމްބަރު ހަމޭސް އަތުލަނީ
ހަމޭސް ވަނީ ރެއާލް އަށް ކުޅުނު 106 މެޗުގައި 34 ލަނޑު ކާމިޔާބުކޮށްފައި
ރެއާލްއަށް ކުޅެމުން އަންނަ ހަމޭސް ރޮޑްރިގޭޒް
މެންޗެސްޓާ ޔުނައިޓެޑަށް ބަދަލުވެ ވޭން ރޫނީގެ 10 ނަމްބަރު ރެއާލް މެޑްރިޑަށް ކުޅެމުން އަންނަ ހަމޭސް ރޮޑްރިގޭޒް އަތުލަން އުޅޭކަމަށް ރިޕޯޓްތައް ބުނެފިއެވެ.
ޑޮންބަލޮން އިން ބުނީ މި ސީޒަނަށްފަހު ހަމޭސް ރެއާލް ދޫކޮށް ޔުނައިޓެޑަށް ބަދަލުވާނެ ކަމަށާއި، އޭނާ އަށް ދިނުމަށް ހަމަޖެހިފައިވަނީ ކެޕްޓަން ވޭން ރޫނީގެ 10 ނަމަބަރު ޖޯޒީ ކަމަށެވެ.
މީގެއިތުރުން ރިޕޯޓްތައް ބުނާގޮތުން މޮރީނިއޯ ދެކޭ ގޮތުގައި ރޫނީގެ ރިޕްލޭސްމެންޓަށް ޔުނައިޓެޑަށް ގެންނަން އެންމެ ރަނގަޅީ ހަމޭސްއެވެ. އެގޮތުން މޮރީނިއޯ ވަނީ މި ސީޒަނަށްފަހު ހަމޭސް އެޓީމަށް ގެނައުމަށް ޔުނައިޓެޑަށް އަންގާފައެވެ.
މި ސީޒަނަށްފަހު އެހެން ކުލަބަކަށް ހަމޭސް ބަދަލުވާނެ ކަމަށް ރިޕޯޓްތައް ބުނަމުން އަންނައިރު، ދާދި ފަހުން އޭނާ ބުނީ ކޮންމެ ދުވަހަކު ވެސް ރެއާލްއާ އެކު ތަމްރީން ހަދަނީ ކުޅުމުގެ ފުރުސަތު ލިބޭނެކަމަށް ކަމަށާއި، ރަނގަޅު ކަންތަކާ ރަނގަޅު ނޫން ކަންތައް ވެސް ދިމާވާ ކަމަށެވެ. އެހެންނަމަވެސް ބޭނުމީ ކުލަބުގައި މަޑުކުރަން ކަމަށެވެ.
ހަމޭސް ބުނީ ކުރިއާ އަޅާ ބަލާއިރު، ކުޅެން ލިބޭ ފުރުސަތު ވެސް އިތުރުވަމުން އަންނަ ކަމަށެވެ. ހަމޭސް ބުނީ މަޑުމަޑުން ހުރިހާ ކަމެއް ވެސް ރަނގަޅުވަމުން އަންނަ ކަމަށާއި، ތަފާތު ފެނިގެންދާނެ ކަމަށެވެ.
މިފަހަރުގެ ސީޒަނުގެ ކުރީކޮޅު ރެއާލްގެ ފުރަތަމަ 11 ގައި ހިމެނިގެން ހަމޭސް ކުޅުނު ކަމުގައިވީ ނަމަވެސް ފަހަކައް އައިސް އޭނާއަށް ވަނީ ރެއާލްގެ ފުރަތަމަ 11 އިން ޖާގަ ލިބޭ ގޮތް ނުވެފައެވެ.
ރެއާލް މެޑްރިޑާއި 2014 ވަނަ އަހަރު ގުޅުނު ހަމޭސް ރޮޑްރިގޭޒް ވަނީ މިހާތަނަށް ރެއާލް މެޑްރިޑަށް 106 މެޗު ކުޅެދީ 34 ލަނޑު ކާމިޔާބު ކޮށްދީފައެވެ. މީގެއިތުރުން އޭނާ ވަނީ ރެއާލްއާއެކު ޔުއެފާ ޗެމްޕިއަންސް ލީގު، ޔުއެފާ ސުޕާ ކަޕް ދެފަހަރު އަދި ފީފާ ކްލަބް ވޯލްޑްކަޕް އެއްފަހަރު ކާމިޔާބުކޮށްފައެވެ.
