ހުޅަނގުގައި ޤުރުއާން އެންދުން: ޣައްޒާގެ ޒުވާނުން ޙިފްޡު ކުރުމުގެ ރޭހުގައި ކުރިއަށް!

ކީރިތި ޤުރުއާން ޙިފްޡު ކުރުން ނުވަތަ ހިތުން ދަސްކުރުމަކީ ދުނިޔެއާއި އާޚިރަތުގެ ޙަޔާތް ބާއްޖަވެރި ކުރުމަށް އެދޭ މީހާއަށް، އެކަމުގައި ވަޒަން ކުރަންވެސް ނޭނގޭ މިންވަރުގެ ހެޔޮ ދަރުމައާއި ޘަވާބު އެކުލެވިގެންވާ މަތިވެރި އަޅުކަމެކެވެ. މާތް ﷲއަށްޓަކައި ކީރިތި ޤުރުއާން ހިތުން ދަސްކޮށްފި މީހެއްގެ ދިރިއުޅުން ބާއްޖަވެރިވެދެއެވެ. ކިތަންމެ ދަތި ޙާލެއްގައި އުޅެން ޖެހުނު ކަމުގައި ވީނަމަވެސް، ކީރިތި ޤުރުއާން ހިތުދަސްކުރުމަކީ ކުރެވިދާނެ ކަމެއްކަން ޘާބިތުކޮށްދެމުންދާ އެއް ބަޔަކީ ޣައްޒާގެ ކުޑަކުދިންނޭ ދެންނެވުމަކުން ދޮގަކަށް ނުވާނެއެވެ.

ހުރިހާ ކޮޅަކުން ފިއްތާލާފައި އޮތް ޣައްޒާގެ ކުޑަ ކުދިންގެ ކިބާގައި އޮތް ނުގުޑާ، ވަރުގަދަ ޢަޒުމުގެ ނަތީޖާއަކަށް ވީ، ކީރިތި ޤުރުއާން ހިތުދަސްކުރުމުގެ ރޫޙު އާލާވެގެން ދިއުމެވެ. ކީރިތި ޤުރުއާން ހިތުދަސްކުރަން އެދޭ ކުދިންނަށް ޚާއްސަކޮށްގެން ޣައްޒާގައި ހިންގާ މަރުކަޒުތަކަށް ޙާޟިރުވާ ފުރާވަރު ޢުމުރުގެ ދަރިވަރުންގެ ޢަދަދު ދަނީ އިތުރު ވަމުންނެވެ. ހުރިހާ ކުދިންގެވެސް އުއްމީދަކީ މާތް ﷲގެ ކަލާމްފުޅު ހިތުން ދަސްކުރުމެވެ.  

ކީރިތި ޤުރުއާން ހިތުދަސްކޮށްދިނުމުގެ މަޤުޞަދުގައި މުޅި އަހަރު ދުވަހު ޣައްޒާގައި ޕްރޮގްރާމްތައް ހިންގިނަމަވެސް، ހޫނު މޫސުމުގެ ޗުއްޓީއާ ދިމާކޮށް ޤުރުއާން ހިތުދަސްކުރުމަށް އެދި ހުށަހަޅާ ދަރިވަރުންގެ ޢަދަދު އެތައް ގުނައެއް އިތުރުވެގެންދެއެވެ.

މި ދުވަސްވަރަކީ ވިލާތުގެ ބައެއް ޤައުމުތަކުގައި ކީރިތި ޤުރުއާންގެ ކޮޕީތައް އެންދުމުގެ ޖަރީމާތައް ގިނަ ޢަދަދަކަށް ހިންގަމުންދާ ދުވަސްވަރެއް ކަމުން، ދަރިންނަށް ކީރިތި ޤުރުއާން ކިޔަވަން ދަސްކޮށްދިނުމަށް މައިންބަފައިންގެ ހިތުގައި އޮންނަ ޝައުޤުވެރިކަންވެސް ބޮޑުވަމުން އަންނަ ކަމަށް މަރުކަޒުތަކުން ފާހަގަކުރެއެވެ.

ކީރިތި ޤުރުއާން ހިތުން ދަސްކުރުމުގެ ވަރުގަދަ ޢަޒުމުގައި ސާބިތުވެ ތިބި ދަރިވަރުންގެ ފަރާތުންވެސް އިވުނީ ހިތް ފުރިގެންދާ ފަދަ ބަސްތަކެކެވެ. އެ ކުދިން ކިޔައިދިން ގޮތުގައި، ކީރިތި ޤުރުއާން ދަސްކުރުމަށް ވަޤުތު ހުސްކޮށްލުމާއެކު، ނަފުސަށް ގެއްލުން ދޭ އޮންލައިން ގޭމްތަކާއި ސޯޝަލް މީޑިއާ އެޕްލިކޭޝަންތަކުގައި ވަޤުތު ބޭކާރުކުރާ ކުރުމަށް ހުއްޓުމެއް އާދެއެވެ.

ޤުރުއާން ހިތުދަސްކުރުމަށް، މައިންބަފައިންވެސް ދަރިންނަށް ބާރުއަޅައި އެކި ގޮތް ގޮތުން އެކަމަށް ހިތްވަރުދީހަދައެވެ.

ކީރިތި ޤުރުއާން ހިތުދަސްކުރުމަކީ އެކަމުގައި ގިނަގުނަ ފައިދާތަކެއް އެކުލެވޭ ކަމެކެވެ. ކީރިތި ޤުރުއާން ދަސް ކުރުމަކީ ހިތާއި ނަފުސު ޠާހިރު ކޮށްދޭ ކަމެކެވެ. ތިމާ ދުނިޔެއަށް ފޮނުއްވުނު ސަބަބު ފަހުމްވުމަށް ފަސޭހަކޮށްދޭ ކަމެކެވެ. ހެޔޮ މަގަށް ވާޞިލުކޮށްދޭ ކަމެކެވެ. ކީރިތި ޤުރުއާން ހިތުދަސްކުރުމަކީ ﷲގެ ޙަޟްރަތުގައި އެމީހެއްގެ ޤަދަރު އުފުލިގެންދާ ކަމެކެވެ.