ކ. މާލެ
|
21 ފެބްރުއަރީ 2023 | އަންގާރަ 11:01
މިފަދަ ވެއްޓެއްގައި ތަޢުލީމު ހާސިލު ކުރުމަކީ، އާންމު ކުލާސްރޫމެއްގައި ތިބިގެން ކިޔަވާ ކިއެވުމަށް ވުރެ ރަނގަޅަށް މަޢުލުމާތު ފަޙުމްކޮށްދޭ ކަމެއް
ވީއާރް ޓެކްނޮލޮޖީ
ޣައްޒާގެ ދަރިވަރުން ވީއާރްގެ ދުނިޔެއަކަށް!
 
މިއީ ޣައްޒާގައި ތަރައްޤީ ކުރި މިފަދަ ފުރަތަމަ ކުލާސް
 
މި ސްކޫލުގެ މަންހަޖު މުޅިންހެންވެސް ފަރުމާކޮށްފައި އޮންނަނީ ޢަމަލީ ތަޖުރިބާގެ މައްޗަށް
 
ސައެންސްއާއި ހިސާބު ޢިލްމުގެ އިތުރުން އިންޖިނޭރުކަން ކިޔަވާ، އެކި ގުރޭޑްތަކުގެ ދަރިވަރުން މި ކުލާހަށް ހާޒިރުވެ، ޒަމާނީ ޓެކްނޮލޮޖީގެ ބޭނުން ހިފާ

ހިއްސާކޮށްލަން މިއުޅެނީ އެތައް ގޮތަކުން ފިއްތާލެވިފައި އޮތް ޣައްޒާގެ ތަފާތު ވާހަކައެކެވެ. ކިތަންމެ ދަތި ހާލުގައި އުޅެން ޖެހުނު ކަމުގައި ވީ ނަމަވެސް، ދިރިއުޅުމުގައި އުފާވެރިކަން ތަޖުރިބާ ކުރުމުގެ ފުރުޞަތު، ހީވެސް ނުކުރާ ފަދަ ގޮތަކަށް ލިބިދާނެ ކަމުގެ ޢުއްމީދު އާ ކޮށްދެނިވި ވާހަކައެކެވެ. ދައްކަން މިއުޅެނީ ޒަމާނީ ޓެކްނޮލޮޖީގެ ދުނިޔެއިން އެންމެ ފަހުން ޖާގަ ހޯދި އެއް މީޑިއަމް ކަމަށް ވާ ވަރޗުއަލް ރިއާލިޓީ ނުވަތަ ވީއާރް ޓެކްނޮލޮޖީގެ އެހީގައި ޣައްޒާގައި ކިޔަވައިދޭން ފެށި ވާހަކައެވެ.

ހެޑްސެޓްތަކާއި ވީއާރް ހޭންޑްލްތައް ހިފައިގެން ކުލާސް ތެރޭގައި ތިބި ދަރިވަރުން މިއަދު ދަސްކުރަމުން އެ ދަނީ އިންސާނާގެ ހަށިގަނޑުގައިވާ ސެލްތަކާ ބެހޭ މަޢުލޫމާތެވެ. ކަރުދާހެއްގައި ކުރަހާފައި އޮންނަ ތަސްވީރަކަށް ވުރެ، ވީއާރް ޓެކްނޮލޮޖީގެ އެހީގައި ބަލާލެވޭ ތުރީ-ޑީ ތަސްވީރެއްގެ ތަޖުރިބާ، އެތައް ގުނައެއް ފުރިހަމަ ވާނެ ކަމާ މެދު ދެބަސް ވާނެ ޖާގައެއް ނެތެވެ.

އަހަރެން މިހާރު މި ދަނީ ސެލްގެ ބައިތައް އެއް ކުރަމުން. ހުރިހާ އެއްޗެއްވެސް ވަރަށް ސާފުކޮށް ފެނޭ. ފޮތްތަކުގަ ހުންނަ ގޮތަށް. އެކަމަކު، ވީއާރް ވީމަ މާ ރަނގަޅު. ހުރިހާ ކޮޅަކުން ބަލާލެވޭ ވިއްޔާ އެބަ. އަސްލު ބުނަންޏާ، ފޮތުގަ ހުންނަ ޓޫޑީ ތަސްވީރުތަކަށް ވުރެ މާ މަޖާ މިގޮތަށް ކިއަވަން. އަސްލެއް ނޫން ކަމަށް ވިއަސް، މީގަ އެބަ އަތްލާ ހެދޭ. އަސްލުވެސް މީ ވަރަށް ފުރިހަމަ ތަޖުރިބާއެއް.
އަހުމަދު ޚަލަފް؛ ދަރިވަރެއް

ސައެންސްއާއި ހިސާބު ޢިލްމުގެ އިތުރުން އިންޖިނޭރުކަން ކިޔަވާ، އެކި ގުރޭޑްތަކުގެ ދަރިވަރުން މި ކުލާހަށް ހާޒިރުވެ، ޒަމާނީ ޓެކްނޮލޮޖީގެ ބޭނުން ހިފައެވެ. މިއީ ޣައްޒާގައި ތަރައްޤީ ކުރި މިފަދަ ފުރަތަމަ ކުލާހެވެ. މި ކުލާސް ހުންނަނީ އަލް-ބަސްމާ މޮޑަރން ސްކޫލްގައެވެ. މި ސްކޫލުގެ މަންހަޖު މުޅިންހެންވެސް ފަރުމާކޮށްފައި އޮންނަނީ ޢަމަލީ ތަޖުރިބާގެ މައްޗަށެވެ. އުނގެނޭ އެއްޗެއްގެ މަޢުލޫމާތު، ޒަމާނީ ޓެކްނޮލޮޖީގެ އެހީގައިވެސް ލިބިދޭ ފަދަ ގޮތަކަށެވެ.

ކިއެވުން މާ ފަސޭހަވެއްޖެ ކަމުގެ އިޙުސާސް ކުރެވޭ. މޮޑެލްތައް ހުންނަ ގޮތް ފަޙުމްވާން މީގެ ކުރިން ވަރަށް އުނދަގޫ. އެކަމަކު ވީއާރް ކުލާހާއެކީ އެކަން ބަދަލުވެއްޖެ. މިހާރު ކިއެވާ ވަގުތަކީ ވަރަށް އުފާވެރި، މަޖާ ވަގުތަކަށްވެސް ވެއްޖެ. ހުރިހާ ކަމެއްވެސް ވަރަށް ފަސޭހަވެއްޖެ.
ނާހިރު ހަބޫޝް؛ ދަރިވަރެއް

އަލް-ބަސްމާ މޮޑަރން ސްކޫލްގެ ޕަބްލިކް ރިލޭޝަންސް އޮފިސަރ، އަހުމަދު އަލް-ނާތޫރު ވިދާޅުވީ، މިފަދަ ވެއްޓެއްގައި ތަޢުލީމު ހާސިލު ކުރުމަކީ، އާންމު ކުލާސްރޫމެއްގައި ތިބިގެން ކިޔަވާ ކިއެވުމަށް ވުރެ ރަނގަޅަށް މަޢުލުމާތު ފަޙުމްކޮށްދޭ ކަމެއް ކަމަށެވެ.

މީ ވީއާރް ޓެކްނޮލޮޖީއާއެކީ ޣައްޒާގައި ތަރައްޤީ ކުރި މިފަދަ ފުރަތަމަ ސްކޫލް. މުޅި ފަލަސްޠީނުގެވެސް މިފަދަ ފުރަތަމަ ސްކޫލް. އަހަރަމެންގެ މައިގަނޑު މަޤްޞަދަކަށް ވީ، ސައެންސްގެ ކުރިމަގު، ދަރިވަރުންނަށް ތަސައްވުރު ކޮށްދީ، ޢަމަލީ ގޮތެއްގައި މުޤައްރަރު ފަޙުމްކޮށްދިނުން. ސްޓެމް މެތޮޑޮލޮޖީ ބޭނުން ކުރަނީ. އިންޖިނީއަރިންގް، ސައެންސްއާއި ހިސާބުގެ އިތުރުން އެހެން މާއްދާތައްވެސް ޝާމިލުވޭ، ސްކޫލް މުޤައްރަރުގެ އިތުރުން.
އަހުމަދު އަލް-ނަތޫރު؛ އަލް-ބަސްމާ މޮޑަރން ސްކޫލްގެ ޕީއާރް އޮފިސަރ

ފަލަސްޠީނުގައި ޤާނޫނު ހަމަޖެހިފައި އޮންނަ ގޮތުން، ޢުމުރުން 6 އަހަރާއި 15 އަހަރާ ދެމެދުގެ ކުދިން ސްކޫލަށް ހާޒިރުވެ، ތަޢުލީމު ހާސިލު ކުރުން ލާޒިމެވެ. ތަޢުލީމު ފޯރުކޮށްދިނުމަށް، ބައިނަލްއަޤުވާމީ އެކިއެކި ފަރާތްތަކާއެކު އެހީއާއެކު ހިންގަމުންދާ މަޝްރޫއުތަކުގެ ނަތީޖާއެއްގެ ގޮތުން ހުޅަނގު އައްސޭރިއާއި ޣައްޒާގައި ލިޔަންކިއަން ދަންނަ މީހުންގެ ނިސްބަތް، މަޑުމަޑުން ނަމަވެސް ދަނީ އިތުރުވަމުންނެވެ.

އެންމެ ފަހުން އަޕްޑޭޓް ކުރީ: 2 މަސް ކުރިން
ރިވިއު ކުރީ: މަރްޔަމް ދާނިޝް ނަޝީދު
0%
0%
0%
0%
0%
0%
ކޮމެންޓް