އުލާގެ "ތަސްވީރާއި ވާހަކަ" އިން ޣައްޒާގެ ބަދުނަޞީބުކަން ސްކްރީންތަކަށް

ހުޅަނގުގެ ބާރުތަކުން ދިއްކުރި އައްޑަނައިގެ ނިވަލުގައި ތިބެގެން މުސްލިމުންގެ ބިންތައް ފޭރި، ލާއިންސާނީ އެތައް ޖަރީމާއެއް ހިންގަމުންދާ ޔަހޫދީ އިޒްރޭލުގެ އަނިޔާވެރިކަން ތަހައްމަލު ކުރަމުން ދާ ފަލަސްޠީނުގެ ރައްޔިތުންގެ ވާހަކަތައް، އާ ގޮތަކަށް ދުނިޔެއަށް ތިލަ ކޮށްދިނުމުގެ ބުރަ މަސައްކަތް ކުރަމުން ދާ އެކަކީ އުލާ ބަރަކާތުއެވެ.

އުލާގެ މަސައްކަތަކީ، ފަލަސްޠީނުގެ ބިންތަކުގައި، އެ ބިމުގެ އަހުލުވެރިންނަށް ކުރިމަތިލާންޖެހޭ އިންސާފެއް ނެތް ތަފާތު ކުރުންތަކާއި، ތަހައްމަލު ކުރަން ޖެހޭ ވޭންދެނިވި އަނިޔާތަކުގެ ވާހަކަ، މުޅި ދުނިޔެއަށް ކިޔައިދިނުމެވެ. އޭނާ އެ ވާހަކަތައް ކިޔައިދެނީ، ޑިޖިޓަލްވެފައި ވާ އަދުގެ ދުނިޔޭގައި ގިނަ ބައެއްގެ ސަމާލުކަން ހޯދާފައިވާ ސްޓޮޕް މޯޝަން އެނިމޭޝަން ފިލްމެއްގެ ގޮތުގައެވެ. އެ މަޝްރޫއަށް ދީފައި ވާ ނަމަކީ، "ޕިކްޗަރ އެންޑް ސްޓޯރީ" ނުވަތަ "ތަސްވީރާއި ވާހަކަ"އެވެ.

"ތަސްވީރާއި ވާހަކަ" މަޝްރޫއު ކުރިއަށް ގެންދިއުމަށްޓަކާ އުލާ ދަނީ ފަލަސްޠީނުގެ ސަރަޙައްދީ ޖަމިއްޔާތަކާ ގުޅިގެން މަސައްކަތްތަކެއް ކުރަމުންނެވެ. އަދި ބައިނަލްއަޤުވާމީ ފިލްމު ފެސްޓިވަލުތަކުގައި އޭނާގެ މަސައްކަތްތައް ދައްކާވެސް ލައެވެ. އެފަދަ އެއް ފެސްޓިވަލަކީ ބޮލޯނިއާގައި ކުރިއަށް ގެންދާ އަހަރީ ފިލްމު ފެސްޓިވަލެއް ކަމަށް ވާ "ތެއްރާ ދި ތޫއްތީ"އެވެ.

"ތެއްރާ ދި ތޫއްތީ" ފިލްމް ފެސްޓިވަލުގައި އެޅުވި ފިލްމަށް ދީފައިވާ ނަމަކީ "ކަމް އެންޑް ގޯ"އެވެ. މި ފިލްމަކީ މިންތީގެ ދައުރާއި ޣައްޒާގައި ދެ ޖިންސުގެ ހަމަހަމަކަން އޮތް ހާލަތު ދައްކުވައިދޭ ފިލްމެކެވެ. ފިލްމުގައި ފެނިގެން ދަނީ ހުރިހާ ކޮޅަކުން ބައްދާލާފައި ވާ ޣައްޒާގައި ދިރިއުޅެމުންދާ އަންހެން ކުއްޖަކާއި އޭނާގެ ބޭބެއާ ދެމެދު ޖެހޭ މައްސަލަތަކެކެވެ.

ސްޓޮޕް މޯޝަން ކާޓޫން ފިލްމު އުފެއްދުމަކީ އިންތިހާ ކަވި، ބުރަ، އަދި އެ ކަމަކަށް އެތައް ވަގުތެއް ހުސް ކުރަން ޖެހޭ ކަމެކެވެ. ކެރެކްޓަރުތައް އުފެއްދުމާއި، މަންޒަރުތައް ނެގުމުގެ އިތުރުން، އެ މަންޒަރުތަކަށް އަޑު އެޅުމާއި ބެކް މިއުޒިކް އެޅުމާއި އެޑިޓް ކުރުން ފަދަ ފަންނީ މަސައްކަތްތަކަށް އެތައް ވަގުތެއް ހޭދަ ކުރަން ޖެހެއެވެ.

އުލާ ކިޔައިދިން ގޮތުގައި އޭނާގެ އެންމެ ފަހުގެ މަސައްކަތް މުޅިން ނިންމާލުމަށް މަހަކަށް ވުރެ ގިނަ ދުވަސް ނެގިއެވެ. އެންމެ ބޮޑު ހުރަހަކަށް ވީ، ޣައްޒާއަށް ކުރިމަތިލާން ޖެހިފައި ވާ އާންމު ދިރިއުޅުމުގެ ތަކުލީފުތަކާއި ގޮންޖެހުންތަކެވެ. ސިލްސިލާ ގޮތެއްގައި ކަރަންޓުގެ ޚިދުމަތް މެދުކެނޑިގެން ދާ ދިއުމަކީ މި ލިސްޓުގައި ހިމެނޭ އެއް ކަމެވެ.

އުލާގެ ސްޓޮޕް މޯޝާން ކާޓޫން ފިލްމުތައް އުފައްދާފައި ވަނީ، ބަލާ މީހުންނަށް މުހިންމު މެސެޖެއްވެސް ލިބޭ ފަދަ ގޮތަކަށެވެ.

އުލާގެ ޢުއްމީދަކީ، ވިހާވެސް ގިނަ ސްކްރީންތަކަކަށް އޭނާގެ ފިލްމުތައް ފުޅާވެގެން ދިއުމެވެ. އަދި ފަލަސްޠީނަށް ކުރިމަތިލާން ޖެހިފައި ވާ މައްސަލަތަކާ މެދު މީހުންގެ މެދުގައި ހޭލުންތެރިކަން އިތުރު ކުރުމަށް އެހީވެދިނުމެވެ.