ޣައްޒާގެ ބެޓެރި ފަރުބަދަތަކުން އިންޒާރުގެ ރަނގަބީލުގެ އަޑު!

ސަމާލުކަން ހުއްޓުނީ އިޒްރޭލާއި ޣައްޒާ ހިއްސާ ކުރާ އިމުގައި ޖަހާފައިވާ ފެންސުތައް ކައިރީގައި ފުނިޖެހިފައިވާ ބާ ބެޓެރިތަކަށެވެ. އެ ބެޓެރި ފުންޏަކީ، ކޮންމެ ދުވަހަކުމެހެން ކަރަންޓުގެ ޚިދުމަތް މެދުކެނޑޭ ޣައްޒާގެ އާންމު ދިރިއުޅުމާ ގުޅިފައިވާ ބެޓެރި ފުންޏެކެވެ. އެފަދަ އެތައް ސަރަޙައްދެއް، ޣައްޒާގައި ހުރެއެވެ. އޭގެ ތެރެއިން ކޮންމެ ބެޓެރި ފުންޏެއްގައި، އެތައް ހާސް ބެޓެރި ބުރިއެއް ހިމެނެއެވެ. ތިމާވެއްޓާއި ސިއްހީ ނަޒަރަކުން ބަލާއިރު، އެތަނުން ނުރައްކަލުގެ ރަނގަބީލުގެ އަޑު ނޫން އަޑެއް ނީވޭ ފަދައެވެ.

ބާ ދަގަނޑު ފަދަ ސާމާނު އުކާލާ ސަރަޙައްދެއްގެ ބޭރުގައި ފުނި ޖަހާފައިވާ ބެޓެރިތައް މިހާރުވެސް އެ ދަނީ ހަލާކުވެ، ވީރާނާ ވަމުންނެވެ. އެ ބެޓެރިތަކަކީ މިހާރު ބޭނުން ނުކުރާ ސޯލަރ ޕްލާންޓްތަކާއި، ކުއްލި ހާލަތުގައި ކަރަންޓް ފޯރުކޮށްދޭ ސިސްޓަމްތަކުގައި ބޭނުން ކުރުމަށްފަހު އުކާލާފައިވާ ބެޓެރިތަކެކެވެ. ޣައްޒާއިން ކަރަންޓުގެ ޚިދުމަތް މެދުކެނޑިގެން ދާ ވަގުތު، ހަކަތަ ހޯދުމަށް ރައްޔިތުން ބަރޯސާވާ ނިޒާމްގެ ރަމްޒެކެވެ.

ހުރިހާ ކޮޅަކުން ފިތިފައި އޮންނަ ޣައްޒާގައި ބެޓެރި ފުނިޖެހެމުންދާތާ 15 ވަރަކަށް އަހަރު ވެފައި ވާއިރު، އެތައް ހާސް ޓަނެއްގެ ބެޓެރި، އެ ސަރަޙައްދުގައި އެބަ ހުއްޓެވެ. އެ ބެޓެރިތަކުން ކުރާ ނޭދެވޭ އަސަރު ކުޑަ ކުރުމަށް، ތިމާވެއްޓާ ބެހޭ އޮފިޝަލުން ވަނީ، އާންމުން އެންމެ ބޮޑަށް ތޮއްޖެހިފައި ވާ ސަރަޙައްދުތަކުގައި ދުރުގައި، 5 ސްޓޯރޭޖު ޔުނިޓެއް އަޅާފައެވެ.

ކަން މިހެން އޮތް ނަމަވެސް، ބައެއް ކަހަލަ ވިހަ މާއްދާތައް ލީކުވުން، މުޅިއަކުން ނުހުއްޓުވެއެވެ. އިޒްރޭލާއި މިޞްރުން 2007 ވަނަ އަހަރުން ފަށައިގެން ބޯޑަރު ކޮންޓްރޯލް ކުރަމުންދާ ޣައްޒާގެ ކުޑަ ބިންކޮޅުގައި، 2.3 މިލިއަނެއްހާ ދިރިއުޅެމުންދާ އިރު، މި ބެޓެރިތަކުގެ ސަބަބުން، އެމީހުންނަށް އުފުލަންޖެހޭ ތަކުލީފުތަކުގެ ލިސްޓު ދިގުވެއެވެ.

ތަކުލީފު ބޮޑުވި ކަމުގައި ވީ ނަމަވެސް، މި ބެޓެރިތަކަކީ ޣައްޒާގައި ގޮނޑުހޮވާ މީހުންނަށް ހަޒާނާއެކެވެ. ހިމާރު ގާޑިއާތަކުގައި ކޮޅުކޮޅުމައްޗަށް ދުއްވައިގެން ބާ ބެޓެރި އެއްކޮށް، އެ ވިއްކައިގެން އާމްދަނީ ހޯދާ މީހުންގެ ޢަދަދު މަދެއް ނޫނެވެ.

ހަތިޔާރު އުފައްދަން ބޭނުން ކުރެވިދާނެ އެއްވެސް ޒާތެއްގެ ކެމިކަލް، ޣައްޒާއަށް އެތެރެ ކުރުމަށް އިޒްރޭލުން ވަނީ މަނާ ކޮށްފައެވެ. ނަތީޖާއެއްގެ ގޮތުން، ޣައްޒާގައި ރީސައިކަލް ފެސިލިޓީއެއް ހިންގޭ ގޮތް ވަނީ ނުވެފައެވެ. މި ހާލަތުގައި ބެޓެރި ވިއްކަނީ ބޭރަށް އެ ތަކެތި އެކްސްޕޯޓް ކުރަން ތައްޔާރު ކުރާ މީހުންނަށެވެ.

ޣައްޒާގައި އުކާލަން ހުރި ބެޓެރިތައް އެކްސްޕޯޓް ކުރުމަށް މިޞްރުން މި އަހަރު ބޯޑަރު ހުޅުވާލި ފަހުން އެކަނިވެސް 4000 ޓަނުގެ ބެޓެރި ވަނީ ބޭރު ކޮށްފައެވެ. ނަމަވެސް އަދިވެސް 10000 އެއްހާ ޓަނުގެ ބެޓެރި ޣައްޒާގައި އެބަހުއްޓެވެ. ކަރަންޓުގެ މައްސަލައަށް ހައްލެއް ލިބިފައި ނުވާއިރު، ބެޓެރި ކުނީގެ މައްސަލައަށްވެސް ހައްލެއް ނެތެވެ.

ޣައްޒާގައި ހުންނަ ހަމައެކަނި އިންޖީނު ގެއިން އުފައްދަނީ ދުވާލެއްގެ މައްޗަށް 60 މެގަވޮޓްގެ ހަކަތައެވެ. 120 މެގަވޮޓްގެ ހަކަތަ ގެންނަނީ އިޒްރޭލުންނެވެ. ނަމަވެސް ޣައްޒާއަށް ބޭނުންވާ ހަކަތައިގެ މިންވަރަކީ ދުވާލެއްގެ މައްޗަށް 500 މެގަވޮޓް ކަމަށް ވާ އިރު، ހަކަތައިގެ ސަޕްލައި އިންތިހާއަށް ދަށެވެ.

އެ އުނިކަން ފޫބައްދަނީ 165 ޑީސަލް ޖަނަރޭޓަރުންނެވެ. އެ ޖަނަރޭޓަރުތަކުން ފޯރުކޮށްދޭ އަގުބޮޑު ކަރަންޓުގެ ޚިދުމަތް ހޯދެނީ ތަނަވަސްކަން ހުރި މީހުންނަށެވެ. ކުދިކުދި، އަމިއްލަ ޖަނަރޭޓަރުތައް ގެންގުޅޭ މީހުންގެ ޢަދަދުވެސް ޣައްޒާގައި މަދެއް ނޫނެވެ. ވައިގެ ތަޣައްޔަރު ކަމުގެ މައްސަލައަށް އިތުރުވަމުން ދަނީ ބޮޅަކަށް ފަހު ބޮޅެކެވެ.

ހަކަތައިގެ މައްސަލައަށް ހައްލު ހޯދުމަށް 2006 ވަނަ އަހަރުން ފަށައިގެން ޣައްޒާގެ ރައްޔިތުން 2 ބިލިއަން ޑޮލަރު ޚަރަދު ކޮށްފައި ވާ ކަމަށް، ސަރަޙައްދީ ޕަވަރ ޑިސްޓްރިބިއުޝަން ކުންފުނީގެ މުޙައްމަދު ޘާބިތު ވިދާޅުވިއެވެ.

މިޞްރުގެ ގޭސް ފީލްޑްއެއްގެ ބޭނުން ހިފުމަށް ދާދި ފަހުން ވީ އެއްބަސްވުމާއެކު، ޣައްޒާއަށް އުއްމީދު އާވި ނަމަވެސް، ގިނަ މީހުންނަށް އަދި އޮތީ އެހެން ގޮތް ގޮތުން ހަކަތަ ހޯދުމެވެ.