އުމުރުން އެންމެ 17 އަހަރުގެ މުޙައްމަދު ނޫހް އަލް އަނާޒްނާ، އުރުދުންގެ ވެރިރަށް އައްމާންގެ ކުއީން އާލިއާ އިންޓަނޭޝަނަލް އެއާޕޯޓަށް ފޭބުމާއެކު މުޅި ތަނުގައި ގުގުމަން ފެށީ މަރުހަބާއާއި ތައުރީފުގެ ބަސްތަކެވެ. ސަބަބެއް ނެތިއެއް ނޫނެނެވެ. އަނާޒްނާ، އޭނާގެ ގައުމަށް އެނބުރި އެ ދިޔައީ އިތިއޮޕިއާގައި ކުރިއަށް ގެންދިޔަ، ކީރިތި ޤުރުއާން ހިތުދަސް ކުރުމުގެ ބައިނަލްއަގުވާމީ މުބާރާތަކުން 1 ވަނަ ހޯދައިގެންނެވެ.
އަނާޒްނާގެ އެދުރު، ޢުމަރު އަލް ޝުވައްޔަތު ވިދާޅުވާ ގޮތުގައި، އަނާޒްނާއަކީ އެ މުބާރާތުން 1 ވަނަ ކަށަވަރު ކުރި އެންމެ ހަގު ބައިވެރިޔާއެވެ.
މުޙައްމަދަކީ ހަނދާނުގެ ބައި ރަނގަޅު، ވަރަށް ކެތްތެރި ކުއްޖެއް. ކީރިތި ޤުރުއާންއާއެކު އޭނާ ދުވާލަކު ހަތަރު ފަސްގަޑިއިރު ހޭދަ ކުރޭ..މަސްކޮޅެއްގެ ތެރޭގަ، ޤުރުއާންގެ ގިނަ ބައިތަކެއް އޭނާ ދަސްކޮށްފި. ކީރިތި ޤުރުއާނާ ގުޅުން ހުރި ކަންކަމުގައި، އޭނާގެ ޢަޒުމު ރަނގަޅު، އެއީ ބޮޑު އެހީއަކަށް ވޭ. އެހެންވެ، އަހަރެންގެ މި ދަރިވަރަކީ ކޮންމެ ޕްރޮގްރާމަކަށްވެސް ތައްޔާރު ދަރިވަރެއް ކަމުގެ އިހްސާސް ކުރެވި، އަހަރެންނަށް ހަމަޖެހުން ގެނުވިޢުމަރު އަލް ޝުވައްޔަތު؛ ޞާދު ބިން މުއާޛް މިސްކިތުގެ އިމާމް
ކީރިތި ޤުރުއާން ހިތުދަސް ކުރުމުގެ މާތް މަސައްކަތް ފެށި ދުވަސްވަރު، ހިސާބެއްގެ އުނދަގޫތަކަކާއި ދަތިކަމެއް އަނާޒްނާއަށް ކުރިމަތިވި ކަމުގައިވީ ނަމަވެސް، އެ މަތިވެރި ކަލާމްފުޅުން އޭނާގެ މުޅި ދިރިއުޅުން ބަދަލުކޮށްލި ކަމަށް އަނާޒްނާ ބުނެއެވެ.
ތެދު ތެދަށް ބުނަންޏާ، އެންމެ ފުރަތަމަ، ކީރިތި ޤުރުއާން ހިތުދަސް ކުރާކަށް އަހަރެން ބޭނުމެއް ނުވި. އެކަމަކު، އަހަރެންގެ މައިންބަފައިން އެކަމަށް ހިތްވަރު ދިން. ކީރިތި ޤުރުއާން ހިތުދަސް ކުރުމަށް، ބައްޕަ، އަހަރެންގެ ކިބައިން އެދުނު. އަހަރެން އެކަމާ ދެކޮޅެއް ނުހަދަން. އެހެންވެސް އެކަމަށް މަސައްކަތްކޮށްލަން ނިންމީ. ބައެއް ފަހަރު މަރުކަޒުން އެނބުރި ގެއަށް ދާއިރު ހުންނަނީ މާ ރަނގަޅަކަށް ނޫން. އަނބުރާ މަރުކަޒަށް ދާން ބޭނުން ނުވާ ފަހަރުވެސް އާދޭ. ރައްޓެހިންނާއެކު ކުޅެލާ، ބޭރަށް ގޮސްލާ ހަދަންވެސް ބޭނުންވެފަ ހުންނަނީ. އެހެންވެ، އަހަރެންގެ ރޫޙު ދިރުވާ އަލާ ކުރަން، މައިންބަފައިން ވަރަށް މަސައްކަތް ކުރި. ޝައިޚަކު ދިޔައީ، ކީރިތި ޤުރުއާންގެ މަތިވެރިކަން، އަހަރަމެންނަށް ކިޔައިދެމުންމުޙައްމަދު ނޫހް އަލް އަނާޒްނާ؛ އުރުދުންގެ ކުއްޖެއް
ކީރިތި ޤުރުއާން ހިތުދަސް ކުރުމުގެ މަސައްކަތް، އަނާޒްނާ ކުރިއަށް ގެންދިޔައީ ޞާދު ބިން މުއާޛް މިސްކިތުގައެވެ. މީޑިއާއާއި އޭނާ ވާހަކަ ދެއްކީވެސް ހަމަ އެ މިސްކިތުގައި އިނދެގެންނެވެ.
މޮޅުވި ވާހަކަ އެމީހުން ބުނީމަ އަހަރެންނަށް އިނދެވުނީ ވިސްނަން. ބަޔާންވެސް ކޮށްދޭން ނޭނގޭ ކަހަލަ އުފާވެރި ޖަޒުބާތުތަކެއް ހަށިގަނޑު ތެރޭގައި ދައުރުވަމުން ދިޔަ. އަހަރެން ވަރަށް، ވަރަށް އުފާވި. އަހަރެންނަކަށް ޤަބޫލެއްވެސް ނުކުރެވުނު. މުބާރާތަށް ދިޔައީވެސް މޮޅުވާނެ ކަމުގެ އުއްމީދުގައިމުޙައްމަދު ނޫހް އަލް އަނާޒްނާ؛ އުރުދުންގެ ކުއްޖެއް
ދުނިޔޭގެ އެކި ކަންކޮޅުތަކުން ގިނަ އަދަދެއްގެ ބައިވެރިންނާ ވާދަކޮށް، މުޅި މުބާރާތުން އަނާޒްނާ 1 ވަނަ ހޯދުމާއެކު، އޭނާގެ އަމިއްލަ ރަށް ކަމުގައިވާ އަންޖާރާގައި ދަނީ އުފާ ފާޅުކުރުންތައް ކުރިއަށް ގެންދަމުންނެވެ. އަދި މިއަދު އަނާޒްނާއަކީ ސޯޝަލް މީޑިއާއާއި އެނޫންވެސް އެކިއެކި މީޑިއާ ޕްލެޓްފޯމްތަކުގައި މަގުބޫލު މޫނަކަށްވެއްޖެއެވެ. އެހުރިހާ ކަމަކަށްވުރެވެސް ބޮޑަށް، އަނާޒްނާއަށް ލިބޭ ހިތުގެ ހަމަޖެހުން މާބޮޑެވެ. ކީރިތި ޤުރުއާނުގެ މޫރިތި އާޔަތްތަކުން، އޭނާގެ ހިތަށް ހަމަޖެހުމާއި އުފާވެރިކަން ގެނެސްދޭ ކަމަށް އަނާޒްނާ ބުނެއެވެ.
