ކުޅެންދާން ކިތަންމެ ބޭނުންވި ނަމަވެސް އަމާޒު ހިފީ ޤުރުއާން ހިތުދަސްކުރަން!

އުމުރުން އެންމެ 17 އަހަރުގެ މުޙައްމަދު ނޫހް އަލް އަނާޒްނާ، އުރުދުންގެ ވެރިރަށް އައްމާންގެ ކުއީން އާލިއާ އިންޓަނޭޝަނަލް އެއާޕޯޓަށް ފޭބުމާއެކު މުޅި ތަނުގައި ގުގުމަން ފެށީ މަރުހަބާއާއި ތައުރީފުގެ ބަސްތަކެވެ. ސަބަބެއް ނެތިއެއް ނޫނެނެވެ. އަނާޒްނާ، އޭނާގެ ގައުމަށް އެނބުރި އެ ދިޔައީ އިތިއޮޕިއާގައި ކުރިއަށް ގެންދިޔަ، ކީރިތި ޤުރުއާން ހިތުދަސް ކުރުމުގެ ބައިނަލްއަގުވާމީ މުބާރާތަކުން 1 ވަނަ ހޯދައިގެންނެވެ.

އަނާޒްނާގެ އެދުރު، ޢުމަރު އަލް ޝުވައްޔަތު ވިދާޅުވާ ގޮތުގައި، އަނާޒްނާއަކީ އެ މުބާރާތުން 1 ވަނަ ކަށަވަރު ކުރި އެންމެ ހަގު ބައިވެރިޔާއެވެ.

ކީރިތި ޤުރުއާން ހިތުދަސް ކުރުމުގެ މާތް މަސައްކަތް ފެށި ދުވަސްވަރު، ހިސާބެއްގެ އުނދަގޫތަކަކާއި ދަތިކަމެއް އަނާޒްނާއަށް ކުރިމަތިވި ކަމުގައިވީ ނަމަވެސް، އެ މަތިވެރި ކަލާމްފުޅުން އޭނާގެ މުޅި ދިރިއުޅުން ބަދަލުކޮށްލި ކަމަށް އަނާޒްނާ ބުނެއެވެ.

ކީރިތި ޤުރުއާން ހިތުދަސް ކުރުމުގެ މަސައްކަތް، އަނާޒްނާ ކުރިއަށް ގެންދިޔައީ ޞާދު ބިން މުއާޛް މިސްކިތުގައެވެ. މީޑިއާއާއި އޭނާ ވާހަކަ ދެއްކީވެސް ހަމަ އެ މިސްކިތުގައި އިނދެގެންނެވެ.

ދުނިޔޭގެ އެކި ކަންކޮޅުތަކުން ގިނަ އަދަދެއްގެ ބައިވެރިންނާ ވާދަކޮށް، މުޅި މުބާރާތުން އަނާޒްނާ 1 ވަނަ ހޯދުމާއެކު، އޭނާގެ އަމިއްލަ ރަށް ކަމުގައިވާ އަންޖާރާގައި ދަނީ އުފާ ފާޅުކުރުންތައް ކުރިއަށް ގެންދަމުންނެވެ. އަދި މިއަދު އަނާޒްނާއަކީ ސޯޝަލް މީޑިއާއާއި އެނޫންވެސް އެކިއެކި މީޑިއާ ޕްލެޓްފޯމްތަކުގައި މަގުބޫލު މޫނަކަށްވެއްޖެއެވެ. އެހުރިހާ ކަމަކަށްވުރެވެސް ބޮޑަށް، އަނާޒްނާއަށް ލިބޭ ހިތުގެ ހަމަޖެހުން މާބޮޑެވެ. ކީރިތި ޤުރުއާނުގެ މޫރިތި އާޔަތްތަކުން، އޭނާގެ ހިތަށް ހަމަޖެހުމާއި އުފާވެރިކަން ގެނެސްދޭ ކަމަށް އަނާޒްނާ ބުނެއެވެ.