އެފްއޭއެމުން މުވައްޒަފުންގެ ޕެންޝަން ފައިސާ ޖަމާ ނުކުރާތާ ދެ އަހަރު!

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އެ އިދާރާގެ މުވައްޒަފުންގެ ޕެންޝަން ފައިސާ ޖަމާ ނުކުރާތާ ދެ އަހަރަށް ވުރެ ގިނަ ދުވަސްވެއްޖެ އެވެ.

މާލީ ބޮޑެތި މައްސަލަތަކާ ކުރިމަތިލާން ޖެހިފައިވާ އެފްއޭއެމުން އެންމެ ފަހުން މުވައްޒަފުންގެ ޕެންޝަން ފައިސާ ޖަމާކޮށްފައި ވަނީ 2021 ވަނަ އަހަރުގެ ޖޫން މަހު އެވެ. އޭގެ ފަހުން މިހާތަނަށް އެއްވެސް މަހެއްގެ ޕެންޝަން ފައިސާ ޖަމާކޮށްފައެއް ނުވެ އެވެ. އޭގެ ތެރޭގައި މީގެ ކުރިން އެ އިދާރާގެ މަސައްކަތް ކުރި މުވައްޒަފުން ވެސް ހިމެނެ އެވެ. އެފްއޭއެމުން މުވައްޒަފުންނަށް ދީފައިވާ މުސާރަ ސްލިޕްތަކުން ފެންނަ ގޮތުގައި ޕެންޝަނަށް ކަނޑައެޅިފައިވާ އަދަދު ކޮންމެ މަހަކު މުސާރާ އިން ކަނޑަ އެވެ. ނަމަވެސް އެ އަދަދު މުވައްޒަފުންގެ ޕެންޝަން ފަންޑަށް ޖަމާކޮށްފައެއް ނުވެ އެވެ.

މާލީ ގިނަ މައްސަތަކެއް އެފްއޭއެމަށް ދިމާވެފައިވާއިރު، ޤަވާއިދުން އެ އިދާރާގެ މުވައްޒަފުންނަށް މުސާރަ ނުދެވޭ މައްސަލަ ވެސް ވަނީ ފެންމަތިވެފަ އެވެ. ނަމަވެސް އެކަމާ ގުޅިގެން އެފްއޭއެމުން ވަނީ އެކި ފަހަރު މަތިން އެކި ބަހަނާތައް ދައްކައިފަ އެވެ. އަނެއްކޮޅުން އެކި އެކި މުއައްސަސާތަކުން ޚިދުމަތް ހޯދުމަށް ފަހު، ފައިސާ ނުދައްކައިގެން އެފްއޭއެމް އަށް ކޯޓުން ވަނީ ޙުކުމް ވެސް އިއްވައިފަ އެވެ. ކަރަންޓު ބިލަށް ފައިސާ ނުދައްކައިގެން އެފްއޭއެމް ހައުސް އިން ސްޓެލްކޯ އިން ވަނީ ކަރަންޓު ވެސް ކަނޑާލައިފަ އެވެ. އެންމެ ފަހުން އެ ފައިސާގެ ޒިންމާ ވެސް ނަގާފައި ވަނީ ސަރުކާރުންނެވެ.