ބާރަ އަދި ސާދަ އަހަރުންދަށުގެ ޗެމްޕިއަންކަން ޖަމާލުއްދީނާއި މުހްޔިއްދީނަށް

މިހާރު ކުރިއަށްދާ ތިންވަނަ އިންޓަރ ސްކޫލް ހޭންޑްބޯލް މުބާރާތުގެ ބާރާ އަހަރާއި ސާދަ އަހަރުންދަށުގެ އަންހެން ކުދިންގެ ބައިގެ ޗެމްޕިއަންކަން ޖަމާލުއްދީން ސްކޫލާއި މުހްޔިއްދީން ސްކޫލުން ހޯދައިފިއެވެ.

ޖުމްލަ 910 ދަރިވަރުން ބައިވެރިވި މި މުބާރާތުގެ ބާރަ އަހަރުންދަށުގެ ޗެމްޕިއަންކަން ޖަމާލުއްދީން ހޯދީ ބުދަ ދުވަހު ހަވީރު ކުޅުނު ފައިނަލް މެޗުގައި މަޖީދިއްޔާ ސްކޫލާ ވާދަކޮށް ވާދަވެރި ކުޅުމަކަށްފަހު ތިން ޕޮއިންޓް އެއް ޕޮއިންޓުން މެޗު ކާމިޔާބުކޮށްގެންނެވެ.

މުބާރާތުގެ 14 އަހަރުންދަށުގެ އަންހެން ކުދިންގެ ބައިން މުހްޔިއްދީން ސްކޫލް ޗެމްޕިއަންކަން ހޯދީ ފައިނަލުގައި ގިޔާސުއްދީން އިންޓަނޭޝަނަލް ސްކޫލާއި ވާދަކޮށް ފޯރިގަދަ ކުޅުމަކަށްފަހު 6 ޕޮއިންޓް ދެ ޕޮއިންޓުން މެޗު ކާމިޔާބުކޮށްގެންނެވެ.

މި މުބާރާތުގެ ބާރަ އަހަރުންދަށުގެ ފިރިހެން ބައިން ފައިނަލަށް ދަތުރުކޮށްފައި ވަނީ ކަލާފާނު ސްކޫލާއި ޖަމާލުއްދީން ސްކޫލެވެ. މި މެޗު ކުޅުމަށް ހަމަޖެހިފައި ވަނީ ބުރާސްފަތި ދުވަހުގެރޭ އެވެ.

މުބާރާތުގެ 14 އަހަރުންދަށުގެ އުމުރުފުރާގެ ތެރެއިން ފިރިހެން ކުދިންގެ ބައިގެ ފައިނަލަށް ތާޖުއްދީނާއި ދަރުމަވަންތަ ސްކޫލް ދަތުރުކޮށްފައިވާ އިރު، މި މެޗު ކުޅުމަށް ހަމަޖެހިފައި ވަނީ ބުރާސްފަތި ދުވަހުގެ ރޭއެވެ.

މި މުބާރާތުގެ 16 އަހަރުންދަށުގެ ފިރިހެން ކުދިންގެ ބައިން ފައިނަލަށް ދަތުރުކޮށްފައި ވަނީ ދަރުމަވަންތަ ސްކޫލާއި މުހްޔިއްދީން ސްކޫލެވެ.

މި އުމުރުފުރާގެ ފައިނަލަށް ދަރުމަވަންތަ ސްކޫލް ދަތުރުކުރީ އަންގާރަ ދުވަހު ހަވީރު ކުޅުނު ސެމީ ފައިނަލް މެޗުގައި އިސްކަންދަރު ސްކޫލާ ވާދަކޮށް 14 ޕޮއިންޓް 4 ޕޮއިންޓުން މެޗު ކާމިޔާބުކޮށްގެންނެވެ. މި މެޗުގެ މޮޅު ކުޅުންތެރިޔާގެ މަގާމަށް ހޮވުނީ ދަރުމަވަންތަ ސްކޫލުގެ އިބްރާހިމް އައިމަން އަސްލަމެވެ. މި ފައިނަލް މެޗު ކުޅުމަށް ހަމަޖެހިފައި ވަނީ ބުރާސްފަތި ދުވަހު ހަވީރެވެ.

މި އުމުރުފުރާގެ އަންހެން ބައިގެ ފައިނަލަށް މާފުށީ ސްކޫލާއި ތާޖުއްދީން ސްކޫލް ދަތުރުކޮށްފައިވާ އިރު، މި މެޗު ކުޅުމަށް ހަމަޖެހިފައި ވަނީ ބުރާސްފަތި ދުވަހުގެ ރޭގަނޑުއެވެ.